1. กุรญฺจิยผลทายกตฺเถรอปทานํ
[1]
‘‘มิคลุทฺโท ปุเร อาสิํ, วิปิเน วิจรํ อหํ;
อทฺทสํ วิรชํ พุทฺธํ, สพฺพธมฺมาน ปารคุํฯ
[2]
‘‘กุรญฺจิยผลํ คยฺห, พุทฺธเสฏฺฐสฺสทาสหํ;
ปุญฺญกฺเขตฺตสฺส ตาทิโน, ปสนฺโน เสหิ ปาณิภิฯ
[3]
‘‘เอกติํเส อิโต กปฺเป, ยํ ผลํ อททิํ ตทา;
ทุคฺคติํ นาภิชานามิ, ผลทานสฺสิทํ ผลํฯ
[4]
‘‘กิเลสา ฌาปิตา มยฺหํ, ภวา สพฺเพ สมูหตา;
นาโคว พนฺธนํ เฉตฺวา, วิหรามิ อนาสโวฯ
[5]
‘‘สฺวาคตํ วต เม อาสิ, พุทฺธเสฏฺฐสฺส สนฺติเก;
ติสฺโส วิชฺชา อนุปฺปตฺตา, กตํ พุทฺธสฺส สาสนํฯ
[6]
‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
อิตฺถํ สุทํ อายสฺมา กุรญฺจิยผลทายโก เถโร อิมา
คาถาโย อภาสิตฺถาติฯ
กุรญฺจิยผลทายกตฺเถรสฺสาปทานํ ปฐมํฯ
2. กปิตฺถผลทายกตฺเถรอปทานํ
[7]
‘‘สุวณฺณวณฺณํ สมฺพุทฺธํ, อาหุตีนํ ปฏิคฺคหํ;
รถิยํ ปฏิปชฺชนฺตํ, กปิตฺถํ [กปิฏฺฐํ (สฺยา.)] อททิํ ผลํฯ
[8]
‘‘เอกนวุติโต กปฺเป, ยํ ผลํ อททิํ ตทา;
ทุคฺคติํ นาภิชานามิ, ผลทานสฺสิทํ ผลํฯ
[9]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[10]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[11]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา กปิตฺถผลทายโก เถโร อิมา
คาถาโย อภาสิตฺถาติฯ
กปิตฺถผลทายกตฺเถรสฺสาปทานํ ทุติยํฯ
3. โกสมฺพผลิยตฺเถรอปทานํ
[12]
‘‘กกุธํ วิลสนฺตํว, เทวเทวํ นราสภํ;
รถิยํ ปฏิปชฺชนฺตํ, โกสมฺพํ [โกสุมฺพํ (สี. สฺยา. ปี.)] อททิํ ตทาฯ
[13]
‘‘เอกติํเส อิโต กปฺเป, ยํ ผลํ อททิํ ตทา;
ทุคฺคติํ นาภิชานามิ, ผลทานสฺสิทํ ผลํฯ
[14]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[15]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[16]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา โกสมฺพผลิโย เถโร อิมา คาถาโย
อภาสิตฺถาติฯ
โกสมฺพผลิยตฺเถรสฺสาปทานํ ตติยํฯ
4. เกตกปุปฺผิยตฺเถรอปทานํ
[17]
‘‘วินตานทิยา ตีเร, วิหาสิ ปุริสุตฺตโม;
อทฺทสํ วิรชํ พุทฺธํ, เอกคฺคํ สุสมาหิตํฯ
[18]
‘‘มธุคนฺธสฺส ปุปฺเผน, เกตกสฺส อหํ ตทา;
ปสนฺนจิตฺโต สุมโน, พุทฺธเสฏฺฐมปูชยิํฯ
[19]