8. อโมทผลิยตฺเถรอปทานํ
[80]
‘‘สุวณฺณวณฺณํ สมฺพุทฺธํ, อาหุตีนํ ปฏิคฺคหํ;
รถิยํ ปฏิปชฺชนฺตํ, อโมทมททิํ ผลํฯ
[81]
‘‘เอกนวุติโต กปฺเป, ยํ ผลํ อททิํ ตทา;
ทุคฺคติํ นาภิชานามิ, ผลทานสฺสิทํ ผลํฯ
[82]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[83]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[84]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อโมทผลิโย เถโร อิมา คาถาโย
อภาสิตฺถาติฯ
อโมทผลิยตฺเถรสฺสาปทานํ อฏฺฐมํฯ
9. ตาลผลทายกตฺเถรอปทานํ
[85]
‘‘สตรํสี นาม ภควา, สยมฺภู อปราชิโต;
วิเวกา วุฏฺฐหิตฺวาน, โคจรายาภินิกฺขมิฯ
[86]
‘‘ผลหตฺโถ อหํ ทิสฺวา, อุปคจฺฉิํ นราสภํ;
ปสนฺนจิตฺโต สุมโน, ตาลผลํ อทาสหํฯ
[87]
‘‘จตุนฺนวุติโต กปฺเป, ยํ ผลํ อททิํ ตทา;
ทุคฺคติํ นาภิชานามิ, ผลทานสฺสิทํ ผลํฯ
[88]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[89]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[90]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ตาลผลทายโก เถโร อิมา คาถาโย
อภาสิตฺถาติฯ
ตาลผลทายกตฺเถรสฺสาปทานํ นวมํฯ
10. นาฬิเกรผลทายกตฺเถรอปทานํ
[91]
‘‘นคเร พนฺธุมติยา, อารามิโก อหํ ตทา;
อทฺทสํ วิรชํ พุทฺธํ, คจฺฉนฺตํ อนิลญฺชเสฯ
[92]
‘‘นาฬิเกรผลํ คยฺห, พุทฺธเสฏฺฐสฺสทาสหํ;
อากาเส ฐิตโก สนฺโต, ปฏิคฺคณฺหิ มหายโสฯ
[93]
‘‘วิตฺติสญฺชนโน มยฺหํ, ทิฏฺฐธมฺมสุขาวโห;
ผลํ พุทฺธสฺส ทตฺวาน, วิปฺปสนฺเนน เจตสาฯ
[94]
‘‘อธิคจฺฉิํ ตทา ปีติํ, วิปุลญฺจ สุขุตฺตมํ;
อุปฺปชฺชเตว รตนํ, นิพฺพตฺตสฺส ตหิํ ตหิํฯ
[95]
‘‘เอกนวุติโต กปฺเป, ยํ ผลํ อททิํ ตทา;
ทุคฺคติํ นาภิชานามิ, ผลทานสฺสิทํ ผลํฯ
[96]
‘‘ทิพฺพจกฺขุ วิสุทฺธํ เม, สมาธิกุสโล อหํ;
อภิญฺญาปารมิปฺปตฺโต, ผลทานสฺสิทํ ผลํฯ
[97]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[98]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[99]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา นาฬิเกรผลทายโก เถโร อิมา
คาถาโย อภาสิตฺถาติฯ
นาฬิเกรผลทายกตฺเถรสฺสาปทานํ ทสมํฯ
กณิการวคฺโค เอกปญฺญาสโมฯ
ตสฺสุทฺทานํ –
กณิกาเรกปตฺตา จ, กาสุมารี ตถาวฏา;
ปาทญฺจ มาตุลุงฺคญฺจ, อเชลีโมทเมว จฯ
ตาลํ ตถา นาฬิเกรํ, คาถาโย คณิตา วิห;
เอกํ คาถาสตํ โหติ, อูนาธิกวิวชฺชิตํฯ
52. ผลทายกวคฺโค