‘‘มาตุลุงฺคผลํ คยฺห, อทาสิํ สตฺถุโน อหํ;
ทกฺขิเณยฺยสฺส วีรสฺส [ธีรสฺส (สี.)], ปสนฺโน เสหิ ปาณิภิฯ
[70]
‘‘เอกติํเส อิโต กปฺเป, ยํ ผลํ อททิํ ตทา;
ทุคฺคติํ นาภิชานามิ, ผลทานสฺสิทํ ผลํฯ
[71]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[72]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[73]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา มาตุลุงฺคผลทายโก เถโร อิมา
คาถาโย อภาสิตฺถาติฯ
มาตุลุงฺคผลทายกตฺเถรสฺสาปทานํ ฉฏฺฐํฯ
7. อเชลิผลทายกตฺเถรอปทานํ
[74]
‘‘อชฺชุโน [อชิโน (สฺยา.)] นาม สมฺพุทฺโธ, หิมวนฺเต วสี ตทา;
จรเณน จ สมฺปนฺโน, สมาธิกุสโล มุนิฯ
[75]
‘‘กุมฺภมตฺตํ คเหตฺวาน, อเชลิํ [อญฺชลิํ (สฺยา.), อเชลํ (ปี.)] ชีวชีวกํ;
ฉตฺตปณฺณํ คเหตฺวาน, อทาสิํ สตฺถุโน อหํฯ
[76]
‘‘จตุนฺนวุติโต กปฺเป, ยํ ผลํ อททิํ ตทา;
ทุคฺคติํ นาภิชานามิ, ผลทานสฺสิทํ ผลํฯ
[77]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[78]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[79]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อเชลิผลทายโก เถโร อิมา
คาถาโย อภาสิตฺถาติฯ
อเชลิผลทายกตฺเถรสฺสาปทานํ สตฺตมํฯ