‘‘กิเลสา ฌาปิตา มยฺหํ…เป.… วิหรามิ อนาสโวฯ
[109]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[110]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ธาตุปูชโก เถโร อิมา คาถาโย
อภาสิตฺถาติฯ
ธาตุปูชกตฺเถรสฺสาปทานํ ฉฏฺฐํฯ
7. ปุลินุปฺปาทกตฺเถรอปทานํ
[111]
‘‘ปพฺพเต หิมวนฺตมฺหิ, เทวโล นาม ตาปโส;
ตตฺถ เม จงฺกโม อาสิ, อมนุสฺเสหิ มาปิโตฯ
[112]
‘‘ชฏาภาเรน [ชฏาภารสฺส (สฺยา. ก.)] ภริโต, กมณฺฑลุธโร สทา;
อุตฺตมตฺถํ คเวสนฺโต, วิปินา นิกฺขมิํ ตทาฯ
[113]
‘‘จุลฺลาสีติสหสฺสานิ, สิสฺสา มยฺหํ อุปฏฺฐหุํ;
สกกมฺมาภิปสุตา, วสนฺติ วิปิเน ตทาฯ
[114]
‘‘อสฺสมา อภินิกฺขมฺม, อกํ ปุลินเจติยํ;
นานาปุปฺผํ สมาเนตฺวา, ตํ เจติยมปูชยิํฯ
[115]
‘‘ตตฺถ จิตฺตํ ปสาเทตฺวา, อสฺสมํ ปวิสามหํ;
สพฺเพ สิสฺสา สมาคนฺตฺวา, เอตมตฺถํ ปุจฺฉิํสุ มํ [เอตมตฺถมปุจฺฉุ มํ (สี.), เอตมตฺตํ อปุจฺฉิํสุ (สฺยา. ก.)]ฯ
[116]
‘‘‘ปุลิเนน กโต ถูโป [กโต ถูเป (สี.)], ยํ ตฺวํ เทว [เทวํ (สี. ปี.)] มสฺสติ;
มยมฺปิ ญาตุมิจฺฉาม, ปุฏฺโฐ อาจิกฺข โน ตุวํ’ฯ
[117]
‘‘‘นิทฺทิฏฺฐา นุ [นิทฺทิฏฺฐา โน (สี. ปี.), ทิฏฺฐาโน โว (สฺยา.)] มนฺตปเท, จกฺขุมนฺโต มหายสา;
เต โข อหํ นมสฺสามิ, พุทฺธเสฏฺเฐ มหายเส’ฯ
[118]
‘‘‘กีทิสา เต มหาวีรา, สพฺพญฺญู โลกนายกา;
กถํวณฺณา กถํสีลา, กีทิสา เต มหายสา’ฯ
[119]
‘‘‘พาตฺติํสลกฺขณา พุทฺธา, จตฺตาลีสทิชาปิ จ;
เนตฺตา โคปขุมา เตสํ, ชิญฺชุกา ผลสนฺนิภาฯ
[120]
‘‘‘คจฺฉมานา จ เต พุทฺธา, ยุคมตฺตญฺจ เปกฺขเร;
น เตสํ ชาณุ นทติ, สนฺธิสทฺโท น สุยฺยติฯ
[121]
‘‘‘คจฺฉมานา จ สุคตา, อุทฺธรนฺตาว คจฺฉเร;
ปฐมํ ทกฺขิณํ ปาทํ, พุทฺธานํ เอส ธมฺมตาฯ
[122]
‘‘‘อสมฺภีตา จ เต พุทฺธา, มิคราชาว เกสรี;
เนวุกฺกํเสนฺติ อตฺตานํ, โน จ วมฺเภนฺติ ปาณินํฯ
[123]
‘‘‘มานาวมานโต มุตฺตา, สมา สพฺเพสุ ปาณิสุ;
อนตฺตุกฺกํสกา พุทฺธา, พุทฺธานํ เอส ธมฺมตาฯ
[124]
‘‘‘อุปฺปชฺชนฺตา จ สมฺพุทฺธา, อาโลกํ ทสฺสยนฺติ เต;
ฉปฺปการํ ปกมฺเปนฺติ, เกวลํ วสุธํ อิมํฯ
[125]
‘‘‘ปสฺสนฺติ นิรยญฺเจเต, นิพฺพาติ นิรโย ตทา;
ปวสฺสติ มหาเมโฆ, พุทฺธานํ เอส ธมฺมตาฯ
[126]
‘‘‘อีทิสา เต มหานาคา, อตุลา จ [เต (สฺยา. ก.)] มหายสา;
วณฺณโต อนติกฺกนฺตา, อปฺปเมยฺยา ตถาคตา’ฯ
[127]
‘‘‘อนุโมทิํสุ เม วากฺยํ, สพฺเพ สิสฺสา สคารวา;
ตถา จ ปฏิปชฺชิํสุ, ยถาสตฺติ ยถาพลํ’ฯ
[128]
‘‘ปฏิปูเชนฺติ ปุลินํ, สกกมฺมาภิลาสิโน;
สทฺทหนฺตา มม วากฺยํ, พุทฺธสกฺกตมานสา [พุทฺธตฺตคตมานสา (สี. สฺยา. ปี.)]ฯ
[129]
‘‘ตทา จวิตฺวา ตุสิตา, เทวปุตฺโต มหายโส;
อุปฺปชฺชิ มาตุกุจฺฉิมฺหิ, ทสสหสฺสิ กมฺปถฯ
[130]
‘‘อสฺสมสฺสาวิทูรมฺหิ, จงฺกมมฺหิ ฐิโต อหํ;
สพฺเพ สิสฺสา สมาคนฺตฺวา, อาคจฺฉุํ มม สนฺติเกฯ
[131]
‘‘อุสโภว มหี นทติ, มิคราชาว กูชติ;
สุสุมาโรว [สุํสุมาโรว (สี. สฺยา. ปี.)] สฬติ, กิํ วิปาโก ภวิสฺสติฯ
[132]
‘‘ยํ ปกิตฺเตมิ สมฺพุทฺธํ, สิกตาถูปสนฺติเก;
โส ทานิ ภควา สตฺถา, มาตุกุจฺฉิมุปาคมิฯ
[133]
‘‘เตสํ ธมฺมกถํ วตฺวา, กิตฺตยิตฺวา มหามุนิํ;
อุยฺโยเชตฺวา สเก สิสฺเส, ปลฺลงฺกมาภุชิํ อหํฯ
[134]
‘‘พลญฺจ วต เม ขีณํ, พฺยาธินา [พฺยาธิโต (สี. สฺยา. ปี. ก.)] ปรเมน ตํ;
พุทฺธเสฏฺฐํ สริตฺวาน, ตตฺถ กาลงฺกโต [กาลกโต (สี. ปี.)] อหํฯ
[135]
‘‘สพฺเพ สิสฺสา สมาคนฺตฺวา, อกํสุ จิตกํ ตทา;
กเฬวรญฺจ เม คยฺห, จิตกํ อภิโรปยุํฯ
[136]
‘‘จิตกํ ปริวาเรตฺวา, สีเส กตฺวาน อญฺชลิํ;
โสกสลฺลปเรตา เต, วิกฺกนฺทิํสุ สมาคตาฯ
[137]
‘‘เตสํ ลาลปฺปมานานํ, อคมํ จิตกํ ตทา;
‘อหํ อาจริโย ตุมฺหํ, มา โสจิตฺถ สุเมธสาฯ
[138]
‘‘‘สทตฺเถ วายเมยฺยาถ, รตฺตินฺทิวมตนฺทิตา;
มา โว ปมตฺตา อหุตฺถ [อหุวตฺถ (สี.)], ขโณ โว ปฏิปาทิโต’ฯ
[139]
‘‘สเก สิสฺเสนุสาสิตฺวา, เทวโลกํ ปุนาคมิํ;
อฏฺฐารส จ กปฺปานิ, เทวโลเก รมามหํฯ
[140]
‘‘สตานํ ปญฺจกฺขตฺตุญฺจ, จกฺกวตฺตี อโหสหํ;
อเนกสตกฺขตฺตุญฺจ, เทวรชฺชมการยิํฯ
[141]
‘‘อวเสเสสุ กปฺเปสุ, โวกิณฺโณ [โวกิณฺณํ (สี. สฺยา. ก.)] สํสริํ อหํ;
ทุคฺคติํ นาภิชานามิ, อุปฺปาทสฺส อิทํ ผลํ [ปุลินปูชายิทํ ผลํ (สี.)]ฯ
[142]
‘‘ยถา โกมุทิเก มาเส, พหู ปุปฺผนฺติ ปาทปา;
ตเถวาหมฺปิ สมเย, ปุปฺผิโตมฺหิ มเหสินาฯ
[143]
‘‘วีริยํ เม ธุรโธรยฺหํ, โยคกฺเขมาธิวาหนํ;
นาโคว พนฺธนํ เฉตฺวา, วิหรามิ อนาสโวฯ
[144]
‘‘สตสหสฺสิโต กปฺเป, ยํ พุทฺธมภิกิตฺตยิํ;
ทุคฺคติํ นาภิชานามิ, กิตฺตนาย อิทํ ผลํฯ
[145]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[146]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[147]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปุลินุปฺปาทโก เถโร อิมา คาถาโย
อภาสิตฺถาติฯ
ปุลินุปฺปาทกตฺเถรสฺสาปทานํ สตฺตมํฯ
8. ตรณิยตฺเถรอปทานํ
[148]
‘‘อตฺถทสฺสี ตุ ภควา, สยมฺภู โลกนายโก;
วินตา นทิยา ตีรํ [ตีเร (สฺยา. ปี. ก.)], อุปาคจฺฉิ ตถาคโตฯ
[149]
‘‘อุทกา อภินิกฺขมฺม, กจฺฉโป วาริโคจโร;
พุทฺธํ ตาเรตุกาโมหํ, อุเปสิํ โลกนายกํฯ
[150]
‘‘‘อภิรูหตุ มํ พุทฺโธ, อตฺถทสฺสี มหามุนิ;
อหํ ตํ ตารยิสฺสามิ, ทุกฺขสฺสนฺตกโร ตุวํ’ฯ
[151]
‘‘มม สงฺกปฺปมญฺญาย, อตฺถทสฺสี มหายโส;
อภิรูหิตฺวา เม ปิฏฺฐิํ, อฏฺฐาสิ โลกนายโกฯ
[152]
‘‘ยโต สรามิ อตฺตานํ, ยโต ปตฺโตสฺมิ วิญฺญุตํ;
สุขํ เม ตาทิสํ นตฺถิ, ผุฏฺเฐ ปาทตเล ยถาฯ
[153]
‘‘อุตฺตริตฺวาน สมฺพุทฺโธ, อตฺถทสฺสี มหายโส;
นทีตีรมฺหิ ฐตฺวาน, อิมา คาถา อภาสถฯ
[154]
‘‘‘ยาวตา วตฺตเต จิตฺตํ, คงฺคาโสตํ ตรามหํ;
อยญฺจ กจฺฉโป ราชา, ตาเรสิ มม ปญฺญวาฯ
[155]
‘‘‘อิมินา พุทฺธตรเณน, เมตฺตจิตฺตวตาย จ;
อฏฺฐารเส กปฺปสเต, เทวโลเก รมิสฺสติฯ
[156]
‘‘‘เทวโลกา อิธาคนฺตฺวา, สุกฺกมูเลน โจทิโต;
เอกาสเน นิสีทิตฺวา, กงฺขาโสตํ ตริสฺสติฯ
[157]