‘‘กิเลสา ฌาปิตา มยฺหํ…เป.… วิหรามิ อนาสโวฯ
[73]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[74]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ญาณถวิโก เถโร อิมา คาถาโย
อภาสิตฺถาติฯ
ญาณถวิกตฺเถรสฺสาปทานํ จตุตฺถํฯ
5. จนฺทนมาลิยตฺเถรอปทานํ
[75]
‘‘ปญฺจ กามคุเณ หิตฺวา, ปิยรูเป มโนรเม;
อสีติโกฏิโย หิตฺวา, ปพฺพชิํ อนคาริยํฯ
[76]
‘‘ปพฺพชิตฺวาน กาเยน, ปาปกมฺมํ วิวชฺชยิํ;
วจีทุจฺจริตํ หิตฺวา, นทีกูเล วสามหํฯ
[77]
‘‘เอกกํ มํ วิหรนฺตํ, พุทฺธเสฏฺโฐ อุปาคมิ;
นาหํ ชานามิ พุทฺโธติ, อกาสิํ ปฏิสนฺถรํ [ปฏิสนฺธารํ (ก.)]ฯ
[78]
‘‘กริตฺวา ปฏิสนฺถารํ, นามโคตฺตมปุจฺฉหํ;
‘เทวตานุสิ คนฺธพฺโพ, อทุ สกฺโก ปุรินฺทโทฯ
[79]
‘‘‘โก วา ตฺวํ กสฺส วา ปุตฺโต, มหาพฺรหฺมา อิธาคโต;
วิโรเจสิ ทิสา สพฺพา, อุทยํ สูริโย ยถาฯ
[80]
‘‘‘สหสฺสารานิ จกฺกานิ, ปาเท ทิสฺสนฺติ มาริส;
โก วา ตฺวํ กสฺส วา ปุตฺโต, กถํ ชาเนมุ ตํ มยํ;
นามโคตฺตํ ปเวเทหิ, สํสยํ อปเนหิ เม’ฯ
[81]
‘‘‘นมฺหิ เทโว น คนฺธพฺโพ, นมฺหิ [นาปิ (สี.)] สกฺโก ปุรินฺทโท;
พฺรหฺมภาโว จ เม นตฺถิ, เอเตสํ อุตฺตโม อหํฯ
[82]
‘‘‘อตีโต วิสยํ เตสํ, ทาลยิํ กามพนฺธนํ;
สพฺเพ กิเลเส ฌาเปตฺวา, ปตฺโต สมฺโพธิมุตฺตมํ’ฯ
[83]
‘‘ตสฺส วาจํ สุณิตฺวาหํ, อิทํ วจนมพฺรวิํ;
‘ยทิ พุทฺโธติ สพฺพญฺญู, นิสีท ตฺวํ มหามุเนฯ
[84]
‘ตมหํ ปูชยิสฺสามิ, ทุกฺขสฺสนฺตกโร ตุวํ’;
‘‘ปตฺถริตฺวา ชินจมฺมํ, อทาสิ สตฺถุโน อหํฯ
[85]
‘‘นิสีทิ ตตฺถ ภควา, สีโหว คิริคพฺภเร;
ขิปฺปํ ปพฺพตมารุยฺห, อมฺพสฺส ผลมคฺคหิํฯ
[86]
‘‘สาลกลฺยาณิกํ ปุปฺผํ, จนฺทนญฺจ มหารหํ;
ขิปฺปํ ปคฺคยฺห ตํ สพฺพํ, อุเปตฺวา โลกนายกํฯ
[87]
‘‘ผลํ พุทฺธสฺส ทตฺวาน, สาลปุปฺผมปูชยิํ;
จนฺทนํ อนุลิมฺปิตฺวา, อวนฺทิํ สตฺถุโน อหํฯ
[88]
‘‘ปสนฺนจิตฺโต สุมโน, วิปุลาย จ ปีติยา;
อชินมฺหิ นิสีทิตฺวา, สุเมโธ โลกนายโกฯ
[89]
‘‘มม กมฺมํ ปกิตฺเตสิ, หาสยนฺโต มมํ ตทา;
‘อิมินา ผลทาเนน, คนฺธมาเลหิ จูภยํฯ
[90]
‘‘‘ปญฺจวีเส กปฺปสเต, เทวโลเก รมิสฺสติ;
อนูนมนสงฺกปฺโป, วสวตฺตี ภวิสฺสติฯ
[91]
‘‘‘ฉพฺพีสติกปฺปสเต, มนุสฺสตฺตํ คมิสฺสติ;
ภวิสฺสติ จกฺกวตฺตี, จาตุรนฺโต มหิทฺธิโกฯ
[92]
‘‘‘เวภารํ นาม นครํ, วิสฺสกมฺเมน มาปิตํ;
เหสฺสติ สพฺพโสวณฺณํ, นานารตนภูสิตํฯ
[93]
‘‘‘เอเตเนว อุปาเยน, สํสริสฺสติ โส ภเว [โยนิโส (สฺยา. ปี.)];
สพฺพตฺถ ปูชิโต หุตฺวา, เทวตฺเต อถ มานุเสฯ
[94]
‘‘‘ปจฺฉิเม ภเว สมฺปตฺเต, พฺรหฺมพนฺธุ ภวิสฺสติ;
อคารา อภินิกฺขมฺม, อนคารี ภวิสฺสติ;
อภิญฺญาปารคู หุตฺวา, นิพฺพายิสฺสตินาสโว’ฯ
[95]
‘‘อิทํ วตฺวาน สมฺพุทฺโธ, สุเมโธ โลกนายโก;
มม นิชฺฌายมานสฺส, ปกฺกามิ อนิลญฺชเสฯ
[96]
‘‘เตน กมฺเมน สุกเตน, เจตนาปณิธีหิ จ;
ชหิตฺวา มานุสํ เทหํ, ตาวติํสมคจฺฉหํฯ
[97]
‘‘ตุสิตโต จวิตฺวาน, นิพฺพตฺติํ มาตุกุจฺฉิยํ;
โภเค เม อูนตา นตฺถิ, ยมฺหิ คพฺเภ วสามหํฯ
[98]
‘‘มาตุกุจฺฉิคเต มยิ, อนฺนปานญฺจ โภชนํ;
มาตุยา มม ฉนฺเทน, นิพฺพตฺตติ ยทิจฺฉกํฯ
[99]
‘‘ชาติยา ปญฺจวสฺเสน, ปพฺพชิํ อนคาริยํ;
โอโรปิตมฺหิ เกสมฺหิ, อรหตฺตมปาปุณิํฯ
[100]
‘‘ปุพฺพกมฺมํ คเวสนฺโต, โอเรน นาทฺทสํ อหํ;
ติํสกปฺปสหสฺสมฺหิ, มม กมฺมมนุสฺสริํฯ
[101]
‘‘นโม เต ปุริสาชญฺญ, นโม เต ปุริสุตฺตม;
ตว สาสนมาคมฺม, ปตฺโตมฺหิ อจลํ ปทํฯ
[102]
‘‘ติํสกปฺปสหสฺสมฺหิ, ยํ พุทฺธมภิปูชยิํ;
ทุคฺคติํ นาภิชานามิ, พุทฺธปูชายิทํ ผลํฯ
[103]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[104]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[105]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา จนฺทนมาลิโย เถโร อิมา คาถาโย
อภาสิตฺถาติฯ
จนฺทนมาลิยตฺเถรสฺสาปทานํ ปญฺจมํฯ
6. ธาตุปูชกตฺเถรอปทานํ
[106]
‘‘นิพฺพุเต โลกนาถมฺหิ, สิทฺธตฺเถ โลกนายเก;
มม ญาตี สมาเนตฺวา, ธาตุปูชํ อกาสหํฯ
[107]
‘‘จตุนฺนวุติโต กปฺเป, ยํ ธาตุมภิปูชยิํ;
ทุคฺคติํ นาภิชานามิ, ธาตุปูชายิทํ ผลํฯ
[108]