‘‘ทุเว ภเว สํสรามิ, เทวตฺเต อถ มานุเส;
ทุเว กุเล ปชายามิ, ขตฺติเย อถ พฺราหฺมเณฯ
[56]
‘‘เอกาสนํ ททิตฺวาน, ปุญฺญกฺเขตฺเต อนุตฺตเร;
ธมฺมปลฺลงฺกมาทาย [ธมฺมปลฺลงฺกมญฺญาย (สฺยา. ก.)], วิหรามิ อนาสโวฯ
[57]
‘‘สตสหสฺสิโต กปฺเป, ยํ ทานมททิํ ตทา;
ทุคฺคติํ นาภิชานามิ, เอกาสนสฺสิทํ ผลํฯ
[58]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[59]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[60]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา เอกาสนทายโก เถโร อิมา คาถาโย
อภาสิตฺถาติฯ
เอกาสนทายกตฺเถรสฺสาปทานํ ตติยํฯ
4. สตฺตกทมฺพปุปฺผิยตฺเถรอปทานํ
[61]
‘‘หิมวนฺตสฺสาวิทูเร, กุกฺกุโฏ [กทมฺโพ (สี. สฺยา. ปี.)] นาม ปพฺพโต;
ตมฺหิ ปพฺพตปาทมฺหิ, สตฺต พุทฺธา วสิํสุ เตฯ
[62]
‘‘กทมฺพํ ปุปฺผิตํ ทิสฺวา, ปคฺคเหตฺวาน อญฺชลิํ;
สตฺต มาลา คเหตฺวาน, ปุญฺญจิตฺเตน [ปุณฺณจิตฺเตน (ก.)] โอกิริํฯ
[63]
‘‘เตน กมฺเมน สุกเตน, เจตนาปณิธีหิ จ;
ชหิตฺวา มานุสํ เทหํ, ตาวติํสมคจฺฉหํฯ
[64]
‘‘จตุนฺนวุติโต กปฺเป, ยํ กมฺมมกริํ ตทา;
ทุคฺคติํ นาภิชานามิ, พุทฺธปูชายิทํ ผลํฯ
[65]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[66]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[67]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา สตฺตกทมฺพปุปฺผิโย เถโร อิมา
คาถาโย อภาสิตฺถาติฯ
สตฺตกทมฺพปุปฺผิยตฺเถรสฺสาปทานํ จตุตฺถํฯ
5. โกรณฺฑปุปฺผิยตฺเถรอปทานํ
[68]
‘‘วนกมฺมิโก ปุเร อาสิํ, ปิตุมาตุมเตนหํ [ปิตุปิตามเหนหํ (สี. สฺยา. ปี.)];
ปสุมาเรน ชีวามิ, กุสลํ เม น วิชฺชติฯ
[69]
‘‘มม อาสยสามนฺตา, ติสฺโส โลกคฺคนายโก;
ปทานิ ตีณิ ทสฺเสสิ, อนุกมฺปาย จกฺขุมาฯ
[70]
‘‘อกฺกนฺเต จ ปเท ทิสฺวา, ติสฺสนามสฺส สตฺถุโน;
หฏฺโฐ หฏฺเฐน จิตฺเตน, ปเท จิตฺตํ ปสาทยิํฯ
[71]
‘‘โกรณฺฑํ ปุปฺผิตํ ทิสฺวา, ปาทปํ ธรณีรุหํ;
สโกสกํ คเหตฺวาน, ปทเสฏฺฐมปูชยิํฯ
[72]
‘‘เตน กมฺเมน สุกเตน, เจตนาปณิธีหิ จ;
ชหิตฺวา มานุสํ เทหํ, ตาวติํสมคจฺฉหํฯ
[73]
‘‘ยํ ยํ โยนุปปชฺชามิ, เทวตฺตํ อถ มานุสํ;
โกรณฺฑวณฺณโกเยว, สุปฺปภาโส ภวามหํฯ
[74]
‘‘ทฺเวนวุเต อิโต กปฺเป, ยํ กมฺมมกริํ ตทา;
ทุคฺคติํ นาภิชานามิ, ปทปูชายิทํ ผลํฯ
[75]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[76]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[77]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา โกรณฺฑปุปฺผิโย เถโร อิมา คาถาโย อภาสิตฺถาติ;
โกรณฺฑปุปฺผิยตฺเถรสฺสาปทานํ ปญฺจมํฯ