‘‘ตโต ภิสํ คเหตฺวาน, อาคจฺฉิํ มม อสฺสมํ;
ภิสํ รุกฺเข ลเคตฺวาน [ลคฺคิตฺวาน (สฺยา. ก.)], มม ทานมนุสฺสริํฯ
[36]
‘‘มหาวาโต วุฏฺฐหิตฺวา, สญฺจาเลสิ วนํ ตทา;
อากาโส อภินาทิตฺถ, อสนิยา ผลนฺติยาฯ
[37]
‘‘ตโต เม อสนิปาโต, มตฺถเก นิปตี ตทา;
โสหํ นิสินฺนโก สนฺโต, ตตฺถ กาลงฺกโต อหุํฯ
[38]
‘‘ปุญฺญกมฺเมน สํยุตฺโต, ตุสิตํ อุปปชฺชหํ;
กเฬวรํ เม ปติตํ, เทวโลเก รมิํ อหํฯ
[39]
‘‘ฉฬสีติสหสฺสานิ, นาริโย สมลงฺกตา;
สายปาตํ [สายํ ปาตํ (สฺยา. ก.)] อุปฏฺฐนฺติ, ภิสทานสฺสิทํ ผลํฯ
[40]
‘‘มนุสฺสโยนิมาคนฺตฺวา, สุขิโต โหมหํ สทา;
โภเค เม อูนตา นตฺถิ, ภิสทานสฺสิทํ ผลํฯ
[41]
‘‘อนุกมฺปิตโก เตน, เทวเทเวน ตาทินา;
สพฺพาสวา ปริกฺขีณา, นตฺถิ ทานิ ปุนพฺภโวฯ
[42]
‘‘สตสหสฺสิโต กปฺเป, ยํ ภิสํ [ภิกฺขํ (สพฺพตฺถ)] อททิํ ตทา;
ทุคฺคติํ นาภิชานามิ, ภิสทานสฺสิทํ ผลํฯ
[43]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[44]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[45]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ภิสทายโก เถโร อิมา คาถาโย
อภาสิตฺถาติฯ
ภิสทายกตฺเถรสฺสาปทานํ ตติยํฯ
4. ญาณถวิกตฺเถรอปทานํ
[46]
‘‘ทกฺขิเณ หิมวนฺตสฺส, สุกโต อสฺสโม มม;
อุตฺตมตฺถํ คเวสนฺโต, วสามิ วิปิเน ตทาฯ
[47]
‘‘ลาภาลาเภน สนฺตุฏฺโฐ, มูเลน จ ผเลน จ;
อนฺเวสนฺโต อาจริยํ, วสามิ เอกโก อหํฯ
[48]
‘‘สุเมโธ นาม สมฺพุทฺโธ, โลเก อุปฺปชฺชิ ตาวเท;
จตุสจฺจํ ปกาเสติ, อุทฺธรนฺโต มหาชนํฯ
[49]
‘‘นาหํ สุโณมิ สมฺพุทฺธํ, นปิ เม โกจิ สํสติ [ภาสติ (สี.), สาสติ (สฺยา. ปี.)];
อฏฺฐวสฺเส อติกฺกนฺเต, อสฺโสสิํ โลกนายกํฯ
[50]
‘‘อคฺคิทารุํ นีหริตฺวา, สมฺมชฺชิตฺวาน อสฺสมํ;
ขาริภารํ คเหตฺวาน, นิกฺขมิํ วิปินา อหํฯ
[51]
‘‘เอกรตฺติํ วสนฺโตหํ, คาเมสุ นิคเมสุ จ;
อนุปุพฺเพน จนฺทวติํ, ตทาหํ อุปสงฺกมิํฯ
[52]
‘‘ภควา ตมฺหิ สมเย, สุเมโธ โลกนายโก;
อุทฺธรนฺโต พหู สตฺเต, เทเสติ อมตํ ปทํฯ
[53]
‘‘ชนกายมติกฺกมฺม, วนฺทิตฺวา ชินสาครํ;
เอกํสํ อชินํ กตฺวา, สนฺถวิํ โลกนายกํฯ
[54]
‘‘‘ตุวํ สตฺถา จ เกตุ จ, ธโช ยูโป จ ปาณินํ;
ปรายโน [ปรายโณ (สี. ปี.)] ปติฏฺฐา จ, ทีโป จ ทฺวิปทุตฺตโมฯ
เอกวีสติมํ ภาณวารํฯ
[55]
‘‘‘เนปุญฺโญ ทสฺสเน วีโร, ตาเรสิ ชนตํ ตุวํ;
นตฺถญฺโญ ตารโก โลเก, ตวุตฺตริตโร มุเนฯ
[56]
‘‘‘สกฺกา เถเว [หเว (สี. ปี.) ภเว (สฺยา. ก.)] กุสคฺเคน, ปเมตุํ สาครุตฺตเม [สาครุตฺตโม (สี. สฺยา. ปี.)];
นตฺเวว ตว สพฺพญฺญุ, ญาณํ สกฺกา ปเมตเวฯ
[57]
‘‘‘ตุลทณฺเฑ [ตุลมณฺฑเล (สี. ปี.)] ฐเปตฺวาน, มหิํ [มหี (สฺยา. ปี.)] สกฺกา ธเรตเว;
นตฺเวว ตว ปญฺญาย, ปมาณมตฺถิ จกฺขุมฯ
[58]
‘‘‘อากาโส มินิตุํ สกฺกา, รชฺชุยา องฺคุเลน วา;
นตฺเวว ตว สพฺพญฺญุ, สีลํ สกฺกา ปเมตเวฯ
[59]
‘‘‘มหาสมุทฺเท อุทกํ, อากาโส จ วสุนฺธรา;
ปริเมยฺยานิ เอตานิ, อปฺปเมยฺโยสิ จกฺขุม’ฯ
[60]
‘‘ฉหิ คาถาหิ สพฺพญฺญุํ, กิตฺตยิตฺวา มหายสํ;
อญฺชลิํ ปคฺคเหตฺวาน, ตุณฺหี อฏฺฐาสหํ ตทาฯ
[61]
‘‘ยํ วทนฺติ สุเมโธติ, ภูริปญฺญํ สุเมธสํ;
ภิกฺขุสงฺเฆ นิสีทิตฺวา, อิมา คาถา อภาสถฯ
[62]
‘‘‘โย เม ญาณํ ปกิตฺเตสิ, วิปฺปสนฺเนน เจตสา;
ตมหํ กิตฺตยิสฺสามิ, สุณาถ มม ภาสโตฯ
[63]
‘‘‘สตฺตสตฺตติ กปฺปานิ, เทวโลเก รมิสฺสติ;
สหสฺสกฺขตฺตุํ เทวินฺโท, เทวรชฺชํ กริสฺสติฯ
[64]
‘‘‘อเนกสตกฺขตฺตุญฺจ, จกฺกวตฺตี ภวิสฺสติ;
ปเทสรชฺชํ วิปุลํ, คณนาโต อสงฺขิยํฯ
[65]
‘‘‘เทวภูโต มนุสฺโส วา, ปุญฺญกมฺมสมาหิโต;
อนูนมนสงฺกปฺโป, ติกฺขปญฺโญ ภวิสฺสติ’ฯ
[66]
‘‘ติํสกปฺปสหสฺสมฺหิ, โอกฺกากกุลสมฺภโว;
โคตโม นาม โคตฺเตน, สตฺถา โลเก ภวิสฺสติฯ
[67]
‘‘อคารา อภินิกฺขมฺม, ปพฺพชิสฺสติ กิญฺจโน;
ชาติยา สตฺตวสฺเสน, อรหตฺตํ ผุสิสฺสติฯ
[68]
‘‘ยโต สรามิ อตฺตานํ, ยโต ปตฺโตสฺมิ สาสนํ;
เอตฺถนฺตเร น ชานามิ, เจตนํ อมโนรมํฯ
[69]
‘‘สํสริตฺวา ภเว สพฺเพ, สมฺปตฺตานุภวิํ อหํ;
โภเค เม อูนตา นตฺถิ, ผลํ ญาณสฺส โถมเนฯ
[70]
‘‘ติยคฺคี นิพฺพุตา มยฺหํ, ภวา สพฺเพ สมูหตา;
สพฺพาสวา ปริกฺขีณา, นตฺถิ ทานิ ปุนพฺภโวฯ
[71]
‘‘ติํสกปฺปสหสฺสมฺหิ , ยํ ญาณมถวิํ อหํ [มภิโถมยิํ (สี. ปี.), มภิโถมหํ (สฺยา.)];
ทุคฺคติํ นาภิชานามิ, ผลํ ญาณสฺส โถมเนฯ
[72]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[73]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[74]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ญาณถวิโก เถโร อิมา คาถาโย
อภาสิตฺถาติฯ
ญาณถวิกตฺเถรสฺสาปทานํ จตุตฺถํฯ
5. จนฺทนมาลิยตฺเถรอปทานํ
[75]
‘‘ปญฺจ กามคุเณ หิตฺวา, ปิยรูเป มโนรเม;
อสีติโกฏิโย หิตฺวา, ปพฺพชิํ อนคาริยํฯ
[76]
‘‘ปพฺพชิตฺวาน กาเยน, ปาปกมฺมํ วิวชฺชยิํ;
วจีทุจฺจริตํ หิตฺวา, นทีกูเล วสามหํฯ
[77]
‘‘เอกกํ มํ วิหรนฺตํ, พุทฺธเสฏฺโฐ อุปาคมิ;
นาหํ ชานามิ พุทฺโธติ, อกาสิํ ปฏิสนฺถรํ [ปฏิสนฺธารํ (ก.)]ฯ
[78]
‘‘กริตฺวา ปฏิสนฺถารํ, นามโคตฺตมปุจฺฉหํ;
‘เทวตานุสิ คนฺธพฺโพ, อทุ สกฺโก ปุรินฺทโทฯ
[79]
‘‘‘โก วา ตฺวํ กสฺส วา ปุตฺโต, มหาพฺรหฺมา อิธาคโต;
วิโรเจสิ ทิสา สพฺพา, อุทยํ สูริโย ยถาฯ
[80]
‘‘‘สหสฺสารานิ จกฺกานิ, ปาเท ทิสฺสนฺติ มาริส;
โก วา ตฺวํ กสฺส วา ปุตฺโต, กถํ ชาเนมุ ตํ มยํ;
นามโคตฺตํ ปเวเทหิ, สํสยํ อปเนหิ เม’ฯ
[81]
‘‘‘นมฺหิ เทโว น คนฺธพฺโพ, นมฺหิ [นาปิ (สี.)] สกฺโก ปุรินฺทโท;
พฺรหฺมภาโว จ เม นตฺถิ, เอเตสํ อุตฺตโม อหํฯ
[82]
‘‘‘อตีโต วิสยํ เตสํ, ทาลยิํ กามพนฺธนํ;
สพฺเพ กิเลเส ฌาเปตฺวา, ปตฺโต สมฺโพธิมุตฺตมํ’ฯ
[83]