‘‘ทิวสญฺเจว รตฺติญฺจ, อาโลโก โหติ เม สทา;
สมนฺตา โยชนสตํ, โอภาเสน ผรามหํฯ
[36]
‘‘ปญฺจปญฺญาสกปฺปมฺหิ, จกฺกวตฺตี อโหสหํ;
จาตุรนฺโต วิชิตาวี, ชมฺพุมณฺฑสฺส [ชมฺพุสณฺฑสฺส (ปี.)] อิสฺสโรฯ
[37]
‘‘ตทา เม นครํ อาสิ, อิทฺธํ ผีตํ สุนิมฺมิตํ;
ติํสโยชนมายามํ, วิตฺถาเรน จ วีสติฯ
[38]
‘‘โสภณํ นาม นครํ, วิสฺสกมฺเมน มาปิตํ;
ทสสทฺทาวิวิตฺตํ ตํ, สมฺมตาฬสมาหิตํฯ
[39]
‘‘น ตมฺหิ นคเร อตฺถิ, วลฺลิกฏฺฐญฺจ มตฺติกา;
สพฺพโสณฺณมยํเยว, โชตเต นิจฺจกาลิกํฯ
[40]
‘‘จตุปาการปริกฺขิตฺตํ, ตโย อาสุํ มณิมยา;
เวมชฺเฌ ตาลปนฺตี จ, วิสฺสกมฺเมน มาปิตาฯ
[41]
‘‘ทสสหสฺสโปกฺขรญฺโญ, ปทุมุปฺปลฉาทิตา;
ปุณฺฑรีเกหิ [ปุณฺฑรีกาทิ (สฺยา.)] สญฺฉนฺนา, นานาคนฺธสมีริตาฯ
[42]
‘‘จตุนฺนวุติโต กปฺเป, ยํ อุกฺกํ ธารยิํ อหํ;
ทุคฺคติํ นาภิชานามิ, อุกฺกธารสฺสิทํ ผลํฯ
[43]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[44]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[45]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อุกฺกาสติโก เถโร อิมา คาถาโย
อภาสิตฺถาติฯ
อุกฺกาสติกตฺเถรสฺสาปทานํ ตติยํฯ
4. สุมนพีชนิยตฺเถรอปทานํ
[46]
‘‘วิปสฺสิโน ภควโต, โพธิยา ปาทปุตฺตเม;
สุมโน พีชนิํ คยฺห, อพีชิํ โพธิมุตฺตมํฯ
[47]
‘‘เอกนวุติโต กปฺเป, อพีชิํ โพธิมุตฺตมํ;
ทุคฺคติํ นาภิชานามิ, พีชนาย อิทํ ผลํฯ
[48]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[49]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[50]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา สุมนพีชนิโย เถโร อิมา คาถาโย
อภาสิตฺถาติฯ
สุมนพีชนิยตฺเถรสฺสาปทานํ จตุตฺถํฯ
5. กุมฺมาสทายกตฺเถรอปทานํ
[51]
‘‘เอสนาย จรนฺตสฺส, วิปสฺสิสฺส มเหสิโน;
ริตฺตกํ ปตฺตํ ทิสฺวาน, กุมฺมาสํ ปูรยิํ อหํฯ
[52]
‘‘เอกนวุติโต กปฺเป, ยํ ภิกฺขํ อททิํ ตทา;
ทุคฺคติํ นาภิชานามิ, กุมฺมาสสฺส อิทํ ผลํฯ
[53]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[54]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[55]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา กุมฺมาสทายโก เถโร อิมา คาถาโย
อภาสิตฺถาติฯ
กุมฺมาสทายกตฺเถรสฺสาปทานํ ปญฺจมํฯ
6. กุสฏฺฐกทายกตฺเถรอปทานํ
[56]
‘‘กสฺสปสฺส ภควโต, พฺราหฺมณสฺส วุสีมโต;
ปสนฺนจิตฺโต สุมโน, กุสฏฺฐกมทาสหํฯ
[57]
‘‘อิมสฺมิํเยว กปฺปสฺมิํ, กุสฏฺฐกมทาสหํ;
ทุคฺคติํ นาภิชานามิ, กุสฏฺฐกสฺสิทํ ผลํฯ
[58]