‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปิลกฺขผลทายโก เถโร อิมา
คาถาโย อภาสิตฺถาติฯ
ปิลกฺขผลทายกตฺเถรสฺสาปทานํ อฏฺฐมํฯ
9. สยํปฏิภานิยตฺเถรอปทานํ
[45]
‘‘กกุธํ วิลสนฺตํว, เทวเทวํ นราสภํ;
รถิยํ ปฏิปชฺชนฺตํ, โก ทิสฺวา น ปสีทติฯ
[46]
‘‘ตมนฺธการํ นาเสตฺวา, สนฺตาเรตฺวา พหุํ ชนํ;
ญาณาโลเกน โชตนฺตํ, โก ทิสฺวา น ปสีทติฯ
[47]
‘‘วสีสตสหสฺเสหิ, นียนฺตํ โลกนายกํ;
อุทฺธรนฺตํ พหู สตฺเต, โก ทิสฺวา น ปสีทติฯ
[48]
‘‘อาหนนฺตํ [อาหนิตฺวา (สฺยา. ก.)] ธมฺมเภริํ, มทฺทนฺตํ ติตฺถิเย คเณ;
สีหนาทํ วินทนฺตํ, โก ทิสฺวา น ปสีทติฯ
[49]
‘‘ยาวตา พฺรหฺมโลกโต, อาคนฺตฺวาน สพฺรหฺมกา;
ปุจฺฉนฺติ นิปุเณ ปญฺเห, โก ทิสฺวา น ปสีทติฯ
[50]
‘‘ยสฺสญฺชลิํ กริตฺวาน, อายาจนฺติ สเทวกา;
เตน ปุญฺญํ อนุโภนฺติ, โก ทิสฺวา น ปสีทติฯ
[51]
‘‘สพฺเพ ชนา สมาคนฺตฺวา, สมฺปวาเรนฺติ จกฺขุมํ;
น วิกมฺปติ อชฺฌิฏฺโฐ, โก ทิสฺวา น ปสีทติฯ
[52]
‘‘นครํ ปวิสโต ยสฺส, รวนฺติ เภริโย พหู;
วินทนฺติ คชา มตฺตา, โก ทิสฺวา น ปสีทติฯ
[53]
‘‘วีถิยา [รถิยา (สี.)] คจฺฉโต ยสฺส, สพฺพาภา โชตเต สทา;
อพฺภุนฺนตา สมา โหนฺติ, โก ทิสฺวา น ปสีทติฯ
[54]
‘‘พฺยาหรนฺตสฺส พุทฺธสฺส, จกฺกวาฬมฺปิ สุยฺยติ;
สพฺเพ สตฺเต วิญฺญาเปติ, โก ทิสฺวา น ปสีทติฯ
[55]
‘‘สตสหสฺสิโต กปฺเป, ยํ พุทฺธมภิกิตฺตยิํ;
ทุคฺคติํ นาภิชานามิ, กิตฺตนาย อิทํ ผลํฯ
[56]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[57]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[58]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา สยํปฏิภานิโย เถโร อิมา คาถาโย
อภาสิตฺถาติฯ
สยํปฏิภานิยตฺเถรสฺสาปทานํ นวมํฯ
10. นิมิตฺตพฺยากรณิยตฺเถรอปทานํ
[59]
‘‘อชฺโฌคาเหตฺวา หิมวํ, มนฺเต วาเจ มหํ ตทา;
จตุปญฺญาสสหสฺสานิ, สิสฺสา มยฺหํ อุปฏฺฐหุํฯ
[60]
‘‘อธิตา เวทคู สพฺเพ, ฉฬงฺเค ปารมิํ คตา;
สกวิชฺชาหุปตฺถทฺธา, หิมวนฺเต วสนฺติ เตฯ
[61]
‘‘จวิตฺวา ตุสิตา กายา, เทวปุตฺโต มหายโส;
อุปฺปชฺชิ มาตุกุจฺฉิสฺมิํ, สมฺปชาโน ปติสฺสโตฯ
[62]
‘‘สมฺพุทฺเธ อุปปชฺชนฺเต, ทสสหสฺสิ กมฺปถ;
อนฺธา จกฺขุํ อลภิํสุ, อุปฺปชฺชนฺตมฺหิ นายเกฯ
[63]
‘‘สพฺพาการํ ปกมฺปิตฺถ, เกวลา วสุธา อยํ;
นิคฺโฆสสทฺทํ สุตฺวาน, อุพฺพิชฺชิํสุ [วิมฺหยิํสุ (สฺยา. ก.)] มหาชนาฯ
[64]
‘‘สพฺเพ ชนา สมาคมฺม, อาคจฺฉุํ มม สนฺติกํ;
วสุธายํ ปกมฺปิตฺถ, กิํ วิปาโก ภวิสฺสติฯ
[65]
‘‘อวจาสิํ [วิทสฺสามิ (สฺยา.)] ตทา เตสํ, มา เภถ [มา โรท (ก.), มาภายิตฺถ (สฺยา.)] นตฺถิ โว ภยํ;
วิสฏฺฐา โหถ สพฺเพปิ, อุปฺปาโทยํ สุวตฺถิโก [สุขตฺถิโก (สฺยา.)]ฯ
[66]