1. ชคติทายกตฺเถรอปทานํ
[1]
‘‘ธมฺมทสฺสิสฺส มุนิโน, โพธิยา ปาทปุตฺตเม;
ปสนฺนจิตฺโต สุมโน, ชคติํ การยิํ อหํฯ
[2]
‘‘ทริโต ปพฺพตโต วา, รุกฺขโต ปติโต อหํ;
จุโต ปติฏฺฐํ วินฺทามิ, ชคติยา อิทํ ผลํฯ
[3]
‘‘น เม โจรา วิเหสนฺติ, นาติมญฺญนฺติ ขตฺติยา [ปสหนฺติ, นาติมญฺญติ ขตฺติโย (สี. ปี.)];
สพฺพามิตฺเตติกฺกมามิ, ชคติยา อิทํ ผลํฯ
[4]
‘‘ยํ ยํ โยนุปปชฺชามิ, เทวตฺตํ อถ มานุสํ;
สพฺพตฺถ ปูชิโต โหมิ, ชคติยา อิทํ ผลํฯ
[5]
‘‘อฏฺฐารเส กปฺปสเต, ชคติํ การยิํ อหํ;
ทุคฺคติํ นาภิชานามิ, ชคติทานสฺสิทํ ผลํฯ
[6]
‘‘กิเลสา ฌาปิตา มยฺหํ, ภวา สพฺเพ สมูหตา;
นาโคว พนฺธนํ เฉตฺวา, วิหรามิ อนาสโวฯ
[7]
‘‘สฺวาคตํ วต เม อาสิ, มม พุทฺธสฺส สนฺติเก;
ติสฺโส วิชฺชา อนุปฺปตฺตา, กตํ พุทฺธสฺส สาสนํฯ
[8]
‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
อิตฺถํ สุทํ อายสฺมา ชคติทายโก เถโร อิมา คาถาโย
อภาสิตฺถาติฯ
ชคติทายกตฺเถรสฺสาปทานํ ปฐมํฯ
2. โมรหตฺถิยตฺเถรอปทานํ
[9]
‘‘โมรหตฺถํ คเหตฺวาน, อุเปสิํ โลกนายกํ;
ปสนฺนจิตฺโต สุมโน, โมรหตฺถมทาสหํฯ
[10]
‘‘อิมินา โมรหตฺเถน, เจตนาปณิธีหิ จ;
นิพฺพายิํสุ ตโย อคฺคี, ลภามิ วิปุลํ สุขํฯ
[11]
‘‘อโห พุทฺโธ อโห ธมฺโม, อโห โน สตฺถุสมฺปทา;
ทตฺวานหํ โมรหตฺถํ, ลภามิ วิปุลํ สุขํฯ
[12]
‘‘ติยคฺคี [ติธคฺคี (สฺยา. ก.), ติวคฺคี (ปี.)] นิพฺพุตา มยฺหํ, ภวา สพฺเพ สมูหตา;
สพฺพาสวา ปริกฺขีณา, นตฺถิ ทานิ ปุนพฺภโวฯ
[13]
‘‘เอกติํเส อิโต กปฺเป, ยํ ทานมททิํ ตทา;
ทุคฺคติํ นาภิชานามิ, โมรหตฺถสฺสิทํ ผลํฯ
[14]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[15]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[16]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา โมรหตฺถิโย เถโร อิมา คาถาโย
อภาสิตฺถาติฯ
โมรหตฺถิยตฺเถรสฺสาปทานํ ทุติยํฯ
3. สีหาสนพีชิยตฺเถรอปทานํ
[17]
‘‘ติสฺสสฺสาหํ ภควโต, โพธิรุกฺขมวนฺทิยํ;
ปคฺคยฺห พีชนิํ ตตฺถ, สีหาสนมพีชหํ [มพีชยิํ (สี.), มวิชฺชหํ (สฺยา.)]ฯ
[18]
‘‘ทฺเวนวุเต อิโต กปฺเป, สีหาสนมพีชหํ;
ทุคฺคติํ นาภิชานามิ, พีชนาย อิทํ ผลํฯ
[19]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[20]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[21]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา สีหาสนพีชิโย เถโร อิมา
คาถาโย อภาสิตฺถาติฯ
สีหาสนพีชิยตฺเถรสฺสาปทานํ ตติยํฯ
