‘‘ทารุณํ นิรยํ คนฺตฺวา, มหาทุกฺขสมปฺปิตา;
ตโต จุตา มนุสฺเสสุ, อุปปนฺนา ตปสฺสินีฯ
[210]
‘‘ทสชาติสหสฺสานิ, คณิกตฺตมการยิํ;
ตมฺหา ปาปา น มุจฺจิสฺสํ, ภุตฺวา ทุฏฺฐวิสํ ยถาฯ
[211]
‘‘พฺรหฺมจริยมเสวิสฺสํ [พฺรหฺมเวสมเสวิสฺสํ (สฺยา.), พฺรหฺมเจรมเสวิสฺสํ (ปี.)], กสฺสเป ชินสาสเน;
เตน กมฺมวิปาเกน, อชายิํ ติทเส ปุเรฯ
[212]
‘‘ปจฺฉิเม ภเว สมฺปตฺเต, อโหสิํ โอปปาติกา;
อมฺพสาขนฺตเร ชาตา, อมฺพปาลีติ เตนหํฯ
[213]
‘‘ปริวุตา ปาณโกฏีหิ, ปพฺพชิํ ชินสาสเน;
ปตฺตาหํ อจลํ ฐานํ, ธีตา พุทฺธสฺส โอรสาฯ
[214]
‘‘อิทฺธีสุ จ วสี โหมิ, โสตธาตุวิสุทฺธิยา;
เจโตปริยญาณสฺส, วสี โหมิ มหามุเนฯ
[215]
‘‘ปุพฺเพนิวาสํ ชานามิ, ทิพฺพจกฺขุ วิโสธิตํ;
สพฺพาสวปริกฺขีณา, นตฺถิ ทานิ ปุนพฺภโวฯ
[216]
‘‘อตฺถธมฺมนิรุตฺตีสุ, ปฏิภาเน ตเถว จ;
ญาณํ เม วิมลํ สุทฺธํ, พุทฺธเสฏฺฐสฺส วาหสาฯ
[217]
‘‘กิเลสา ฌาปิตา มยฺหํ…เป.… วิหรามิ อนาสวาฯ
[218]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[219]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อมฺพปาลิ ภิกฺขุนี อิมา คาถาโย
อภาสิตฺถาติฯ
อมฺพปาลิเถริยาปทานํ นวมํฯ
10. เปสลาเถรีอปทานํ
[220]
‘‘อิมมฺหิ ภทฺทเก กปฺเป, พฺรหฺมพนฺธุ มหายโส;
กสฺสโป นาม โคตฺเตน, อุปฺปชฺชิ วทตํ วโรฯ
[221]
‘‘สาวตฺถิยํ ปุเร วเร, อุปาสกกุเล อหํ;
ปสูตา ตํ [นํ (สฺยา.)] ชินวรํ, ทิสฺวา สุตฺวา จ เทสนํฯ
[222]
‘‘ตํ วีรํ สรณํ คนฺตฺวา, สีลานิ จ สมาทิยิํ;
กทาจิ โส มหาวีโร, มหาชนสมาคเมฯ
[223]
‘‘อตฺตโน อภิสมฺโพธิํ, ปกาเสสิ นราสโภ;
อนนุสฺสุตธมฺเมสุ, ปุพฺเพ ทุกฺขาทิเกสุ จฯ
[224]
‘‘จกฺขุ ญาณญฺจ ปญฺญา จ, วิชฺชาโลโก จ อาสิ เม;
ตํ สุตฺวา อุคฺคเหตฺวาน, ปริปุจฺฉิญฺจ ภิกฺขโวฯ
[225]
‘‘เตน กมฺเมน สุกเตน, เจตนาปณิธีหิ จ;
ชหิตฺวา มานุสํ เทหํ, ตาวติํสมคจฺฉหํฯ
[226]
‘‘ปจฺฉิเม จ ภเว ทานิ, ชาตา เสฏฺฐิมหากุเล;
อุเปจฺจ พุทฺธํ สทฺธมฺมํ, สุตฺวา สจฺจูปสํหิตํฯ
[227]
‘‘ปพฺพชิตฺวาจิเรเนว, สจฺจตฺถานิ [สพฺพตฺถานิ (สฺยา. ก.)] วิจินฺตยํ;
เขเปตฺวา อาสเว สพฺเพ, อรหตฺตมปาปุณิํฯ
[228]
‘‘อิทฺธีสุ จ วสี โหมิ, ทิพฺพาย โสตธาตุยา;
เจโตปริยญาณสฺส, วสี โหมิ มหามุเนฯ
[229]
‘‘ปุพฺเพนิวาสํ ชานามิ, ทิพฺพจกฺขุ วิโสธิตํ;
สพฺพาสวปริกฺขีณา, นตฺถิ ทานิ ปุนพฺภโวฯ
[230]
‘‘อตฺถธมฺมนิรุตฺตีสุ, ปฏิภาเน ตเถว จ;
ญาณํ เม วิมลํ สุทฺธํ, พุทฺธเสฏฺฐสฺส วาหสาฯ
[231]
‘‘กิเลสา ฌาปิตา มยฺหํ, ภวา สพฺเพ สมูหตา;
นาคีว พนฺธนํ เฉตฺวา, วิหรามิ อนาสวาฯ
[232]
‘‘สฺวาคตํ วต เม อาสิ, มม พุทฺธสฺส สนฺติเก;
ติสฺโส วิชฺชา อนุปฺปตฺตา, กตํ พุทฺธสฺส สาสนํฯ
[233]
‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
อิตฺถํ สุทํ เปสลา [เสลา (สฺยา. ปี.)] ภิกฺขุนี อิมา คาถาโย อภาสิตฺถาติฯ
เปสลาเถริยาปทานํ ทสมํฯ
ขตฺติยาวคฺโค จตุตฺโถฯ
ตสฺสุทฺทานํ –
ขตฺติยา พฺราหฺมณี เจว, ตถา อุปฺปลทายิกา;
สิงฺคาลมาตา สุกฺกา จ, อภิรูปา อฑฺฒกาสิกาฯ
ปุณฺณา จ อมฺพปาลี จ, เปสลาติ จ ตา ทส;
คาถาโย ทฺวิสตาเนตฺถ, ทฺวิจตฺตาลีส จุตฺตริฯ
อถ วคฺคุทฺทานํ –
สุเมธา เอกูโปสถา, กุณฺฑลเกสี ขตฺติยา;
สหสฺสํ ติสตา คาถา, สตฺตตาลีส ปิณฺฑิตาฯ
สห อุทฺทานคาถาหิ, คณิตาโย วิภาวิภิ;
สหสฺสํ ติสตํ คาถา, สตฺตปญฺญาสเมว จาติฯ
เถริกาปทานํ สมตฺตํฯ
อปทานปาฬิ สมตฺตาฯ