‘‘ตตฺถ เม วสมานสฺส, ปุญฺญกมฺมสมงฺคิโน;
ปทานิ อุทฺธรนฺตสฺส, โสณฺณปีฐา ภวนฺติ เมฯ
[54]
‘‘ลาภา เตสํ สุลทฺธํ โว, เย ลภนฺติ อุปสฺสุติํ;
นิพฺพุเต การํ กตฺวาน, ลภนฺติ วิปุลํ สุขํฯ
[55]
‘‘มยาปิ สุกตํ กมฺมํ, วาณิชฺชํ สุปฺปโยชิตํ;
ปาทปีฐํ กริตฺวาน, โสณฺณปีฐํ ลภามหํฯ
[56]
‘‘ยํ ยํ ทิสํ ปกฺกมามิ, เกนจิ กิจฺจเยนหํ [ปจฺจเยนหํ (สี. ปี.)];
โสณฺณปีเฐ อกฺกมามิ [โสณฺณปีเฐน กมามิ (ก.)], ปุญฺญกมฺมสฺสิทํ ผลํฯ
[57]
‘‘ติํสกปฺปสหสฺสมฺหิ, ยํ กมฺมมกริํ ตทา;
ทุคฺคติํ นาภิชานามิ, ปาทปีฐสฺสิทํ ผลํฯ
[58]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[59]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[60]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปาทปีฐิโย เถโร อิมา คาถาโย
อภาสิตฺถาติฯ
ปาทปีฐิยตฺเถรสฺสาปทานํ อฏฺฐมํฯ
9. เวทิการกตฺเถรอปทานํ
[61]
‘‘ปทุมุตฺตรสฺส ภควโต, โพธิยา ปาทปุตฺตเม;
เวทิกํ สุกตํ กตฺวา, สกํ จิตฺตํ ปสาทยิํฯ
[62]
‘‘อโตฬารานิ [อโถฬารานิ (สี. ปี.), อคฺโคฬารานิ (สฺยา.)] ภณฺฑานิ, กตานิ อกตานิ จ;
อนฺตลิกฺขา ปวสฺสนฺติ, เวทิกาย อิทํ ผลํฯ
[63]
‘‘อุภโต พฺยูฬฺหสงฺคาเม, ปกฺขนฺทนฺโต ภยานเก;
ภยเภรวํ น ปสฺสามิ, เวทิกาย อิทํ ผลํฯ
[64]
‘‘มม สงฺกปฺปมญฺญาย, พฺยมฺหํ นิพฺพตฺตเต สุภํ;
สยนานิ มหคฺฆานิ, เวทิกาย อิทํ ผลํฯ
[65]
‘‘สตสหสฺสิโต กปฺเป, ยํ เวทิกมการยิํ;
ทุคฺคติํ นาภิชานามิ, เวทิกาย อิทํ ผลํฯ
[66]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[67]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[68]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา เวทิการโก เถโร อิมา คาถาโย
อภาสิตฺถาติฯ
เวทิการกตฺเถรสฺสาปทานํ นวมํฯ
10. โพธิฆรทายกตฺเถรอปทานํ
[69]
‘‘สิทฺธตฺถสฺส ภควโต, ทฺวิปทินฺทสฺส ตาทิโน;
ปสนฺนจิตฺโต สุมโน, โพธิฆรมการยิํฯ
[70]
‘‘ตุสิตํ อุปปนฺโนมฺหิ, วสามิ รตเน ฆเร;
น เม สีตํ วา อุณฺหํ วา, วาโต คตฺเต น สมฺผุเสฯ
[71]
‘‘ปญฺจสฏฺฐิมฺหิโต กปฺเป, จกฺกวตฺตี อโหสหํ;
กาสิกํ นาม นครํ, วิสฺสกมฺเมน [วิสุกมฺเมน (สฺยา. ก.)] มาปิตํฯ
[72]
‘‘ทสโยชนอายามํ, อฏฺฐโยชนวิตฺถตํ;
น ตมฺหิ นคเร อตฺถิ, กฏฺฐํ วลฺลี จ มตฺติกาฯ
[73]
‘‘ติริยํ โยชนํ อาสิ, อทฺธโยชนวิตฺถตํ;
มงฺคโล นาม ปาสาโท, วิสฺสกมฺเมน มาปิโตฯ
[74]
‘‘จุลฺลาสีติสหสฺสานิ, ถมฺภา โสณฺณมยา อหุํ;
มณิมยา จ นิยฺยูหา, ฉทนํ รูปิยํ อหุฯ
[75]