‘‘ตญฺจ อปฺปฏิวานียํ, อเสจนกโมชวํ;

ปิวนฺติ มญฺเญ สปฺปญฺญา, วลาหกมิวทฺธคูฯ

[137]

‘‘อิทฺธีสุ จ วสี โหมิ, ทิพฺพาย โสตธาตุยา;

เจโตปริยญาณสฺส, วสี โหมิ มหามุเนฯ

[138]

‘‘ปุพฺเพนิวาสํ ชานามิ, ทิพฺพจกฺขุ วิโสธิตํ;

สพฺพาสวปริกฺขีณา, นตฺถิ ทานิ ปุนพฺภโวฯ

[139]

‘‘อตฺถธมฺมนิรุตฺตีสุ , ปฏิภาเน ตเถว จ;

ญาณํ มม มหาวีร, อุปฺปนฺนํ ตว สนฺติเกฯ

[140]

‘‘กิเลสา ฌาปิตา มยฺหํ…เป.… วิหรามิ อนาสวาฯ

[141]

‘‘สฺวาคตํ วต เม อาสิ…เป.… กตํ พุทฺธสฺส สาสนํฯ

[142]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ สุกฺกา ภิกฺขุนี อิมา คาถาโย อภาสิตฺถาติฯ

สุกฺกาเถริยาปทานํ ปญฺจมํฯ

ปญฺจมํ ภาณวารํฯ

6. อภิรูปนนฺทาเถรีอปทานํ

[143]

‘‘เอกนวุติโต กปฺเป, วิปสฺสี นาม นายโก;

อุปฺปชฺชิ จารุทสฺสโน, สพฺพธมฺเมสุ จกฺขุมาฯ

[144]

‘‘ตทาหํ พนฺธุมติยํ, อิทฺเธ ผีเต มหากุเล;

ชาตา สุรูปา ทยิตา, ปูชนียา ชนสฺส จฯ

[145]

‘‘อุปคนฺตฺวา มหาวีรํ, วิปสฺสิํ โลกนายกํ;

ธมฺมํ สุณิตฺวา สรณํ, อุเปสิํ นรนายกํฯ

[146]

‘‘สีเลสุ สํวุตา หุตฺวา, นิพฺพุเต จ นรุตฺตเม;

ธาตุถูปสฺส อุปริ, โสณฺณจฺฉตฺตมปูชยิํฯ

[147]

‘‘มุตฺตจาคา สีลวตี, ยาวชีวํ ตโต จุตา;

ชหิตฺวา มานุสํ เทหํ, ตาวติํสูปคา อหํฯ

[148]

‘‘ตทา ทสหิ ฐาเนหิ, อธิโภตฺวาน เสสเก [อธิโภตฺวา อเสสโต (สฺยา.)];

รูปสทฺเทหิ คนฺเธหิ, รเสหิ ผุสเนหิ จฯ

[149]

‘‘อายุนาปิ จ วณฺเณน, สุเขน ยสสาปิ จ;

ตเถวาธิปเตยฺเยน, อธิคยฺห วิโรจหํฯ

[150]

‘‘ปจฺฉิเม จ ภเว ทานิ, ชาตาหํ กปิลวฺหเย;

ธีตา เขมกสกฺกสฺส, นนฺทา นามาติ วิสฺสุตาฯ

[151]

‘‘อภิรูปสมฺปทมฺปิ [อภิรุปํ อุปปทํ (สี.), อภิรุปํ อุปฺปาทํ (ปี.)], อหุ เม กนฺติสูจกํ;

ยทาหํ โยพฺพนปฺปตฺตา, รูปลาวญฺญภูสิตาฯ

[152]

‘‘ตทา [ตทา มมตฺถํ (สี.), อิธ มมตฺเต (สฺยา. ก.)] มตฺเถ สกฺยานํ, วิวาโท สุมหา อหุ;

ปพฺพาเชสิ ตโต ตาโต, มา สกฺยา วินสฺสิํสุติฯ

[153]

‘‘ปพฺพชิตฺวา ตถาคตํ, รูปเทสฺสิํ นรุตฺตมํ;

สุตฺวาน โนปคจฺฉามิ, มม รูเปน คพฺพิตาฯ

[154]

‘‘โอวาทมฺปิ น คจฺฉามิ, พุทฺธทสฺสนภีรุตา;

ตทา ชิโน อุปาเยน, อุปเนตฺวา สสนฺติกํฯ

[155]

‘‘ติสฺสิตฺถิโย [ติสฺโส ถีโย (สี. ปี.)] นิทสฺเสสิ, อิทฺธิยา มคฺคโกวิโท;

อจฺฉรารูปสทิสํ, ตรุณิํ ชริตํ [ชริกํ (สฺยา. ก.)] มตํฯ

[156]

‘‘ตาโย ทิสฺวา สุสํวิคฺคา, วิรตฺตาเส กเฬวเร;

อฏฺฐาสิํ ภวนิพฺพินฺทา, ตทา มํ อาห นายโกฯ

[157]

‘‘‘อาตุรํ อสุจิํ ปูติํ, ปสฺส นนฺเท สมุสฺสยํ;

อุคฺฆรนฺตํ ปคฺฆรนฺตํ, พาลานํ อภินนฺทิตํฯ

[158]

‘‘‘อสุภาย จิตฺตํ ภาเวหิ, เอกคฺคํ สุสมาหิตํ;

ยถา อิทํ ตถา เอตํ, ยถา เอตํ ตถา อิทํฯ

[159]

‘‘‘เอวเมตํ อเวกฺขนฺตี, รตฺตินฺทิวมตนฺทิตา;

ตโต สกาย ปญฺญาย, อภินิพฺพิชฺฌ วจฺฉสิ’ฯ

[160]

‘‘ตสฺสา เม อปฺปมตฺตาย, วิจรนฺติยา [วิจรนฺตฺวาธ (สี.), วิจินนฺตีธ (สฺยา. ปี.)] โยนิโส;

ยถาภูตํ อยํ กาโย, ทิฏฺโฐ สนฺตรพาหิโรฯ

[161]

‘‘อถ นิพฺพินฺทหํ กาเย, อชฺฌตฺตญฺจ วิรชฺชหํ;

อปฺปมตฺตา วิสํยุตฺตา, อุปสนฺตามฺหิ นิพฺพุตาฯ

[162]

‘‘อิทฺธีสุ จ วสี โหมิ, ทิพฺพาย โสตธาตุยา;

เจโตปริยญาณสฺส, วสี โหมิ มหามุเนฯ

[163]

‘‘ปุพฺเพนิวาสํ ชานามิ, ทิพฺพจกฺขุ วิโสธิตํ;

สพฺพาสวปริกฺขีณา , นตฺถิ ทานิ ปุนพฺภโวฯ

[164]

‘‘อตฺถธมฺมนิรุตฺตีสุ, ปฏิภาเน ตเถว จ;

ญาณํ มม มหาวีร, อุปฺปนฺนํ ตว สนฺติเกฯ

[165]

‘‘กิเลสา ฌาปิตา มยฺหํ…เป.… วิหรามิ อนาสวาฯ

[166]

‘‘สฺวาคตํ วต เม อาสิ…เป.… กตํ พุทฺธสฺส สาสนํฯ

[167]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อภิรูปนนฺทา ภิกฺขุนี อิมา คาถาโย อภาสิตฺถาติฯ

อภิรูปนนฺทาเถริยาปทานํ ฉฏฺฐํฯ

7. อฑฺฒกาสิเถรีอปทานํ

[168]

‘‘อิมมฺหิ ภทฺทเก กปฺเป, พฺรหฺมพนฺธุ มหายโส;

กสฺสโป นาม โคตฺเตน, อุปฺปชฺชิ วทตํ วโรฯ

[169]

‘‘ตทาหํ ปพฺพชิตฺวาน, ตสฺส พุทฺธสฺส สาสเน;

สํวุตา ปาติโมกฺขมฺหิ, อินฺทฺริเยสุ จ ปญฺจสุฯ

[170]

‘‘มตฺตญฺญุนี จ อสเน, ยุตฺตา ชาคริเยปิ จ;

วสนฺตี ยุตฺตโยคาหํ, ภิกฺขุนิํ วิคตาสวํฯ

[171]

‘‘อกฺโกสิํ ทุฏฺฐจิตฺตาหํ, คณิเกติ ภณิํ ตทา;

เตน ปาเปน กมฺเมน, นิรยมฺหิ อปจฺจิสํฯ

[172]