‘‘ปจฺฉิเม ภเว สมฺปตฺเต, ชาตามฺห พฺราหฺมเณ กุเล;
สุขุมาลหตฺถปาทา, สกฺยปุตฺตนิเวสเนฯ
[50]
‘‘สพฺพกาลมฺปิ ปถวิํ, น ปสฺสาม น ลงฺกตํ;
จิกฺขลฺลภูมิมสุจิํ [จิกฺขลฺลํ ภูมิํ คมนํ (สฺยา.)], น ปสฺสาม มหามุเนฯ
[51]
‘‘อคารํ วสนฺเต อมฺเห, สกฺการํ สพฺพกาลิกํ;
อุปเนนฺติ สทา สพฺพํ, ปุพฺพกมฺมผเลน โน [ปุพฺพกมฺมผลํ ตโต (สี. ปี.)]ฯ
[52]
‘‘อคารํ ปชหิตฺวาน, ปพฺพชิตฺวานคาริยํ;
สํสารปถนิตฺถิณฺณา, วีตราคา ภวามเส [นตฺถิ ทานิ ปุนพฺภโว (สี. สฺยา. ปี.)]ฯ
[53]
‘‘จีวรํ ปิณฺฑปาตญฺจ, ปจฺจยํ สยนาสนํ;
อุปเนนฺติ สทา อมฺเห, สหสฺสานิ ตโต ตโตฯ
[54]
‘‘กิเลสา ฌาปิตา อมฺหํ…เป.… วิหราม อนาสวาฯ
[55]
‘‘สฺวาคตํ วต โน อาสิ…เป.… กตํ พุทฺธสฺส สาสนํฯ
[56]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ จตุราสีติพฺราหฺมณกญฺญาภิกฺขุนีสหสฺสานิ ภควโต สมฺมุขา อิมา คาถาโย อภาสิตฺถาติฯ
จตุราสีติภิกฺขุนีสหสฺสาปทานํ ทุติยํฯ
3. อุปฺปลทายิกาเถรีอปทานํ
[57]
‘‘นคเร อรุณวติยา, อรุโณ นาม ขตฺติโย;
ตสฺส รญฺโญ อหุํ ภริยา, เอกชฺฌํ จารยามหํฯ
[58]
‘‘รโหคตา นิสีทิตฺวา, เอวํ จินฺเตสหํ ตทา;
‘กุสลํ เม กตํ นตฺถิ, อาทาย คมิยํ มมฯ
[59]
‘‘‘มหาภิตาปํ กฏุกํ, โฆรรูปํ สุทารุณํ;
นิรยํ นูน คจฺฉามิ, เอตฺถ เม นตฺถิ สํสโย’ฯ
[60]
‘‘เอวาหํ จินฺตยิตฺวาน, ปหํเสตฺวาน มานสํ;
ราชานํ อุปคนฺตฺวาน, อิทํ วจนมพฺรวิํฯ
[61]
‘‘‘อิตฺถี นาม มยํ เทว, ปุริสานิตฺตรา อหุ [ปุริสานุคตา สทา (สี.), ปุริสา น ภวาม โน (สฺยา.), ปุริสานํ ภรา มยํ (ปี.)];
เอกํ เม สมณํ เทหิ, โภชยิสฺสามิ ขตฺติย’ฯ
[62]
‘‘อทาสิ เม ตทา ราชา, สมณํ ภาวิตินฺทฺริยํ;
ตสฺส ปตฺตํ คเหตฺวาน, ปรมนฺเนน ปูรยิํฯ
[63]
‘‘ปูเรตฺวา ปรมํ อนฺนํ, สห สุคนฺธเลปนํ;
มหาเจเลน ฉาทิตฺวา, อทาสิํ ตุฏฺฐมานสาฯ
[64]
‘‘เตน กมฺเมน สุกเตน, เจตนาปณิธีหิ จ;
ชหิตฺวา มานุสํ เทหํ, ตาวติํสมคจฺฉหํฯ
[65]
‘‘สหสฺสเทวราชูนํ, มเหสิตฺตมการยิํ;
สหสฺสจกฺกวตฺตีนํ, มเหสิตฺตมการยิํฯ
[66]
‘‘ปเทสรชฺชํ วิปุลํ, คณนาโต อสงฺขิยํ;
นานาวิธํ พหุํ อญฺญํ, ตสฺส กมฺมผลํ ตโตฯ
[67]
‘‘อุปฺปลสฺเสว เม วณฺโณ, อภิรูปา สุทสฺสนา;
อิตฺถิสพฺพงฺคสมฺปนฺนา, อภิชาตา ชุตินฺธราฯ
[68]
‘‘ปจฺฉิเม ภเว สมฺปตฺเต, อชายิํ สากิเย กุเล;
นารีสหสฺสปาโมกฺขา, สุทฺโธทนสุตสฺสหํฯ
[69]
‘‘นิพฺพินฺทิตฺวา อคาเรหํ, ปพฺพชิํ อนคาริยํ;
สตฺตมีรตฺติสมฺปตฺตา [สตฺตมิํรตฺติมปตฺตา (สี. สฺยา. ปี.)], จตุสจฺจมปาปุณิํฯ
[70]
‘‘จีวรํ ปิณฺฑปาตญฺจ, ปจฺจยํ สยนาสนํ;
ปริเมตุํ น สกฺโกมิ, ปิณฺฑปาตสฺสิทํ ผลํฯ
[71]
‘‘ยํ มยฺหํ ปูริตํ กมฺมํ, กุสลํ สรเส มุนิ;
ตุยฺหตฺถาย มหาวีร, ปริจตฺตํ พหุํ มยาฯ
[72]
‘‘เอกตฺติํเส อิโต กปฺเป, ยํ ทานมททิํ ตทา;
ทุคฺคติํ นาภิชานามิ, ปิณฺฑปาตสฺสิทํ ผลํฯ
[73]
‘‘ทฺเว คติโย ปชานามิ, เทวตฺตํ อถ มานุสํ;
อญฺญํ คติํ น ชานามิ, ปิณฺฑปาตสฺสิทํ ผลํฯ
[74]
‘‘อุจฺเจ กุเล ปชายามิ, มหาสาเล [ตโย สาล (ก.)] มหทฺธเน;
อญฺเญ กุเล น ชายามิ, ปิณฺฑปาตสฺสิทํ ผลํฯ
[75]
‘‘ภวาภเว สํสริตฺวา, สุกฺกมูเลน โจทิตา;
อมนาปํ น ปสฺสามิ, โสมนสฺสกตํ ผลํฯ
[76]
‘‘อิทฺธีสุ จ วสี โหมิ, ทิพฺพาย โสตธาตุยา;
เจโตปริยญาณสฺส, วสี โหมิ มหามุเนฯ
[77]
‘‘ปุพฺเพนิวาสํ ชานามิ, ทิพฺพจกฺขุ วิโสธิตํ;
สพฺพาสวปริกฺขีณา, นตฺถิ ทานิ ปุนพฺภโวฯ
[78]
‘‘อตฺถธมฺมนิรุตฺตีสุ, ปฏิภาเน ตเถว จ;
ญาณํ มม มหาวีร, อุปฺปนฺนํ ตว สนฺติเกฯ
[79]
‘‘กิเลสา ฌาปิตา มยฺหํ…เป.… วิหรามิ อนาสวาฯ
[80]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[81]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อุปฺปลทายิกา ภิกฺขุนี ภควโต สมฺมุขา อิมา คาถาโย อภาสิตฺถาติฯ
อุปฺปลทายิกาเถริยาปทานํ ตติยํฯ
4. สิงฺคาลมาตุเถรีอปทานํ
[82]
‘‘ปทุมุตฺตโร นาม ชิโน, สพฺพธมฺมาน ปารคู;
อิโต สตสหสฺสมฺหิ, กปฺเป อุปฺปชฺชิ นายโกฯ
[83]
‘‘ตทาหํ หํสวติยํ, ชาตามจฺจกุเล อหุํ;
นานารตนปชฺโชเต, อิทฺเธ ผีเต มหทฺธเนฯ
[84]
‘‘ปิตุนา สห คนฺตฺวาน, มหาชนปุรกฺขตา;
ธมฺมํ พุทฺธสฺส สุตฺวาน, ปพฺพชิํ อนคาริยํฯ
[85]