7. สีหาสนิกตฺเถรอปทานํ
[42]
‘‘ปทุมุตฺตรสฺส ภควโต, สพฺพภูตหิเตสิโน;
ปสนฺนจิตฺโต สุมโน, สีหาสนมทาสหํฯ
[43]
‘‘เทวโลเก มนุสฺเส วา, ยตฺถ ยตฺถ วสามหํ;
ลภามิ วิปุลํ พฺยมฺหํ, สีหาสนสฺสิทํ ผลํฯ
[44]
‘‘โสณฺณมยา รูปิมยา, โลหิตงฺคมยา [โลหิตงฺกมยา (สี. สฺยา. ปี.)] พหู;
มณิมยา จ ปลฺลงฺกา, นิพฺพตฺตนฺติ มมํ สทาฯ
[45]
‘‘โพธิยา อาสนํ กตฺวา, ชลชุตฺตมนามิโน;
อุจฺเจ กุเล ปชายามิ, อโห ธมฺมสุธมฺมตาฯ
[46]
‘‘สตสหสฺสิโต กปฺเป, สีหาสนมกาสหํ;
ทุคฺคติํ นาภิชานามิ, สีหาสนสฺสิทํ ผลํฯ
[47]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[48]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[49]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา สีหาสนิโก เถโร อิมา คาถาโย
อภาสิตฺถาติฯ
สีหาสนิกตฺเถรสฺสาปทานํ สตฺตมํฯ
8. ปาทปีฐิยตฺเถรอปทานํ
[50]
‘‘สุเมโธ นาม สมฺพุทฺโธ, อคฺโค การุณิโก มุนิ;
ตารยิตฺวา พหู สตฺเต, นิพฺพุโต โส มหายโสฯ
[51]
‘‘สีหาสนสฺส สามนฺตา, สุเมธสฺส มเหสิโน;
ปสนฺนจิตฺโต สุมโน, ปาทปีฐมการยิํฯ
[52]
‘‘กตฺวาน กุสลํ กมฺมํ, สุขปากํ สุขุทฺรยํ;
ปุญฺญกมฺเมน สํยุตฺโต, ตาวติํสมคจฺฉหํฯ
[53]
‘‘ตตฺถ เม วสมานสฺส, ปุญฺญกมฺมสมงฺคิโน;
ปทานิ อุทฺธรนฺตสฺส, โสณฺณปีฐา ภวนฺติ เมฯ
[54]
‘‘ลาภา เตสํ สุลทฺธํ โว, เย ลภนฺติ อุปสฺสุติํ;
นิพฺพุเต การํ กตฺวาน, ลภนฺติ วิปุลํ สุขํฯ
[55]
‘‘มยาปิ สุกตํ กมฺมํ, วาณิชฺชํ สุปฺปโยชิตํ;
ปาทปีฐํ กริตฺวาน, โสณฺณปีฐํ ลภามหํฯ
[56]
‘‘ยํ ยํ ทิสํ ปกฺกมามิ, เกนจิ กิจฺจเยนหํ [ปจฺจเยนหํ (สี. ปี.)];
โสณฺณปีเฐ อกฺกมามิ [โสณฺณปีเฐน กมามิ (ก.)], ปุญฺญกมฺมสฺสิทํ ผลํฯ
[57]
‘‘ติํสกปฺปสหสฺสมฺหิ, ยํ กมฺมมกริํ ตทา;
ทุคฺคติํ นาภิชานามิ, ปาทปีฐสฺสิทํ ผลํฯ
[58]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[59]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[60]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปาทปีฐิโย เถโร อิมา คาถาโย
อภาสิตฺถาติฯ
ปาทปีฐิยตฺเถรสฺสาปทานํ อฏฺฐมํฯ
9. เวทิการกตฺเถรอปทานํ
[61]
‘‘ปทุมุตฺตรสฺส ภควโต, โพธิยา ปาทปุตฺตเม;
เวทิกํ สุกตํ กตฺวา, สกํ จิตฺตํ ปสาทยิํฯ
[62]
‘‘อโตฬารานิ [อโถฬารานิ (สี. ปี.), อคฺโคฬารานิ (สฺยา.)] ภณฺฑานิ, กตานิ อกตานิ จ;
อนฺตลิกฺขา ปวสฺสนฺติ, เวทิกาย อิทํ ผลํฯ
[63]
‘‘อุภโต พฺยูฬฺหสงฺคาเม, ปกฺขนฺทนฺโต ภยานเก;
ภยเภรวํ น ปสฺสามิ, เวทิกาย อิทํ ผลํฯ
[64]