‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
อิตฺถํ สุทํ ยสวตีปมุขานิ ขตฺติยกญฺญาภิกฺขุนิโย อฏฺฐารสสหสฺสานิ ภควโต สมฺมุขา อิมา คาถาโย อภาสิตฺถาติฯ
ยสวตีปมุขอฏฺฐารสภิกฺขุนีสหสฺสาปทานํ ปฐมํฯ
2. จตุราสีติภิกฺขุนีสหสฺสอปทานํ
[13]
‘‘จุลฺลาสีติสหสฺสานิ , พฺราหฺมญฺญกุลสมฺภวา [พฺราหฺมณกุลสมฺภวา (สฺยา. ก.)];
สุขุมาลหตฺถปาทา, ปุเร ตุยฺหํ มหามุเนฯ
[14]
‘‘เวสฺสสุทฺทกุเล ชาตา, เทวา นาคา จ กินฺนรา;
จาตุทฺทีปา พหู กญฺญา, ปุเร ตุยฺหํ มหามุเนฯ
[15]
‘‘กาจิ ปพฺพชิตา อตฺถิ, สพฺพทสฺสาวิโน [สจฺจทสฺสาวิโน (สี. ปี.)] หู;
เทวา จ กินฺนรา นาคา, ผุสิสฺสนฺติ อนาคเตฯ
[16]
‘‘อนุโภตฺวา ยสํ สพฺพํ, ปตฺวาน สพฺพสมฺปทา;
ตุมฺหํ [ตฺวยิ (สี. ปี.)] ปสาทํ ปฏิลทฺธา, พุชฺฌิสฺสนฺติ อนาคเตฯ
[17]
‘‘อมฺเห พฺราหฺมณธีตา ตุ, พฺราหฺมญฺญกุลสมฺภวา;
เปกฺขโต โน [ลกฺขณา จ (สฺยา.)] มหาวีร, ปาเท วนฺทาม จกฺขุมฯ
[18]
‘‘อุปหตา ภวา สพฺเพ, มูลตณฺหา สมูหตา;
สมุจฺฉินฺนา อนุสยา, ปุญฺญสงฺขารทาลิตาฯ
[19]
‘‘สมาธิโคจรา สพฺพา, สมาปตฺติวสี กตา;
ฌาเนน ธมฺมรติยา, วิหริสฺสาม โน สทาฯ
[20]
‘‘ภวเนตฺติ อวิชฺชา จ, สงฺขาราปิ จ เขปิตา;
สุทุทฺทสํ ปทํ คนฺตฺวา, อนุชานาถ [อนุชานิมฺห (สฺยา. ปี. ก.)] นายกฯ
[21]
‘‘อุปการา มมํ ตุมฺเห, ทีฆรตฺตํ กตาวิโน;
จตุนฺนํ สํสยํ เฉตฺวา, สพฺพา คจฺฉนฺตุ นิพฺพุติํฯ
[22]
‘‘วนฺทิตฺวา มุนิโน ปาเท, กตฺวา อิทฺธิวิกุพฺพนํ;
กาจิ ทสฺเสนฺติ อาโลกํ, อนฺธการมถาปราฯ
[23]
‘‘ทสฺเสนฺติ จนฺทสูริเย, สาครญฺจ สมจฺฉกํ;
สิเนรุํ ปริภณฺฑญฺจ, ทสฺเสนฺติ ปาริฉตฺตกํฯ
[24]
‘‘ตาวติํสญฺจ ภวนํ, ยามํ ทสฺเสนฺติ อิทฺธิยา;
ตุสิตํ นิมฺมิเต เทเว, วสวตฺตี มหิสฺสเรฯ
[25]
‘‘พฺรหฺมาโน กาจิ ทสฺเสนฺติ, จงฺกมญฺจ มหารหํ;
พฺรหฺมวณฺณญฺจ มาเปตฺวา, ธมฺมํ เทเสนฺติ สุญฺญตํฯ
[26]
‘‘นานาวิกุพฺพนํ กตฺวา, อิทฺธิํ ทสฺสิย สตฺถุโน;
ทสฺสยิํสุ พลํ สพฺพา, ปาเท วนฺทิํสุ สตฺถุโนฯ
[27]
‘‘อิทฺธีสุ จ วสี โหม, ทิพฺพาย โสตธาตุยา;
เจโตปริยญาณสฺส, วสี โหม มหามุเนฯ
[28]
‘‘ปุพฺเพนิวาสํ ชานาม, ทิพฺพจกฺขุ วิโสธิตํ;
สพฺพาสวปริกฺขีณา, นตฺถิ ทานิ ปุนพฺภโวฯ
[29]
‘‘อตฺถธมฺมนิรุตฺตีสุ, ปฏิภาเน ตเถว จ;
ญาณํ อมฺหํ มหาวีร, อุปฺปนฺนํ ตว สนฺติเกฯ
[30]
‘‘ปุพฺพานํ โลกนาถานํ, สงฺคมํ โน นิทสฺสิตํ;
อธิการํ พหุํ อมฺหํ, ตุยฺหตฺถาย มหามุเนฯ
[31]
‘‘ยํ อมฺเหหิ กตํ กมฺมํ, กุสลํ สร ตํ มุเน;
ตุยฺหตฺถาย มหาวีร, ปุญฺญานุปจิตานิ โนฯ
[32]
‘‘สตสหสฺสิโต กปฺเป, ปทุมุตฺตโร มหามุนิ;
ปุรํ หํสวตี นาม, สมฺพุทฺธสฺส กุลาสยํฯ
[33]
‘‘ทฺวาเรน หํสวติยา, คงฺคา สนฺทติ สพฺพทา;
อุพฺพฬฺหา นทิยา ภิกฺขู, คมนํ น ลภนฺติ เตฯ
[34]
‘‘ทิวสํ ทฺเว ตโย เจว, สตฺตาหํ มาสิกํ ตโต;
จตุมาสมฺปิ สมฺปุณฺณํ, คมนํ น ลภนฺติ เตฯ
[35]
‘‘ตทา อหุ สตฺตสาโร, ชฏิโล นาม รฏฺฐิโก;
โอรุทฺเธ [โอรตีเร (สฺยา.)] ภิกฺขโว ทิสฺวา, เสตุํ คงฺคาย การยิฯ
[36]
‘‘ตทา สตสหสฺเสหิ, เสตุํ คงฺคาย การยิ;
สงฺฆสฺส โอริเม ตีเร, วิหารญฺจ อการยิฯ
[37]
‘‘อิตฺถิโย ปุริสา เจว, อุจฺจนีจกุลานิ จ;
ตสฺส เสตุํ วิหารญฺจ [เตสุ เสตุวิหาเรสุ (สี.), ตสฺส เสตู วิหาเร จ (ปี.)], สมภาคํ อกํสุ เตฯ
[38]
‘‘อมฺเห อญฺเญ จ มานุชา, วิปฺปสนฺเนน เจตสา;
ตสฺส ธมฺเมสุ ทายาทา, นคเร ชนปเทสุ จฯ
[39]
‘‘อิตฺถี ปุมา กุมารา จ, พหู เจว กุมาริกา;
เสตุโน จ วิหารสฺส, วาลุกา อากิริํสุ เตฯ
[40]
‘‘วีถิํ สมฺมชฺชนํ กตฺวา, กทลีปุณฺณฆเฏ ธเช;
ธูปํ จุณฺณญฺจ มาลญฺจ, การํ กตฺวาน สตฺถุโนฯ
[41]
‘‘เสตุวิหาเร กาเรตฺวา, นิมนฺเตตฺวา วินายกํ;
มหาทานํ ททิตฺวาน, สมฺโพธิํ อภิปตฺถยิํฯ
[42]
‘‘ปทุมุตฺตโร มหาวีโร, ตารโก สพฺพปาณินํ;
อนุโมทนียํกาสิ, ชฏิลสฺส มหามุนิ [กตฺวา, วิยากาสิ มหามุนิ (สฺยา.)]ฯ
[43]
‘‘‘สตสหสฺสาติกฺกนฺเต, กปฺโป เหสฺสติ ภทฺทโก;
ภวาภเวนุโภตฺวาน, ปาปุณิสฺสติ โพธิยํฯ
[44]
‘‘‘กาจิ หตฺถปริกมฺมํ, กตาวี นรนาริโย;
อนาคตมฺหิ อทฺธาเน, สพฺพา เหสฺสนฺติ สมฺมุขา’ฯ
[45]
‘‘เตน กมฺมวิปาเกน, เจตนาปณิธีหิ จ;
อุปฺปนฺนา เทวภวนํ, ตุยฺหํ ตา ปริจาริกาฯ
[46]
‘‘ทิพฺพสุขํ อสงฺขิยํ, มานุสญฺจ อสงฺขิยํ;
ตุยฺหํ เต ปริจาเรม, สํสริมฺห ภวาภเวฯ
[47]
‘‘สตสหสฺสิโต กปฺเป, สุกตํ กมฺมสมฺปทํ;
สุขุมาลี มนุสฺสานํ, อโถ เทวปุเร วเรฯ
[48]
‘‘รูปโภคยเส เจว, อโถ กิตฺติญฺจ สกฺกตํ [กิตฺติสุขํ ปิยํ (สฺยา.)];
ลภาม สตตํ สพฺพํ, สุกตํ กมฺมสมฺปทํฯ
[49]
‘‘ปจฺฉิเม ภเว สมฺปตฺเต, ชาตามฺห พฺราหฺมเณ กุเล;
สุขุมาลหตฺถปาทา, สกฺยปุตฺตนิเวสเนฯ
[50]
‘‘สพฺพกาลมฺปิ ปถวิํ, น ปสฺสาม น ลงฺกตํ;
จิกฺขลฺลภูมิมสุจิํ [จิกฺขลฺลํ ภูมิํ คมนํ (สฺยา.)], น ปสฺสาม มหามุเนฯ
[51]
‘‘อคารํ วสนฺเต อมฺเห, สกฺการํ สพฺพกาลิกํ;
อุปเนนฺติ สทา สพฺพํ, ปุพฺพกมฺมผเลน โน [ปุพฺพกมฺมผลํ ตโต (สี. ปี.)]ฯ
[52]
‘‘อคารํ ปชหิตฺวาน, ปพฺพชิตฺวานคาริยํ;
สํสารปถนิตฺถิณฺณา, วีตราคา ภวามเส [นตฺถิ ทานิ ปุนพฺภโว (สี. สฺยา. ปี.)]ฯ
[53]
‘‘จีวรํ ปิณฺฑปาตญฺจ, ปจฺจยํ สยนาสนํ;
อุปเนนฺติ สทา อมฺเห, สหสฺสานิ ตโต ตโตฯ
[54]
‘‘กิเลสา ฌาปิตา อมฺหํ…เป.… วิหราม อนาสวาฯ
[55]
‘‘สฺวาคตํ วต โน อาสิ…เป.… กตํ พุทฺธสฺส สาสนํฯ
[56]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ จตุราสีติพฺราหฺมณกญฺญาภิกฺขุนีสหสฺสานิ ภควโต สมฺมุขา อิมา คาถาโย อภาสิตฺถาติฯ
จตุราสีติภิกฺขุนีสหสฺสาปทานํ ทุติยํฯ
3. อุปฺปลทายิกาเถรีอปทานํ
[57]
‘‘นคเร อรุณวติยา, อรุโณ นาม ขตฺติโย;
ตสฺส รญฺโญ อหุํ ภริยา, เอกชฺฌํ จารยามหํฯ
[58]
‘‘รโหคตา นิสีทิตฺวา, เอวํ จินฺเตสหํ ตทา;
‘กุสลํ เม กตํ นตฺถิ, อาทาย คมิยํ มมฯ
[59]
‘‘‘มหาภิตาปํ กฏุกํ, โฆรรูปํ สุทารุณํ;
นิรยํ นูน คจฺฉามิ, เอตฺถ เม นตฺถิ สํสโย’ฯ
[60]