1. ยสวตีปมุขอฏฺฐารสภิกฺขุนีสหสฺสอปทานํ
[1]
‘‘ภวา สพฺเพ ปริกฺขีณา, ภวา สนฺติ วิโมจิตา;
สพฺพาสวา จ โน นตฺถิ, อาโรเจม มหามุเนฯ
[2]
‘‘ปุริมํ กุสลํ กมฺมํ [ปริกมฺมญฺจ กุสลํ (สฺยา.)], ยํ กิญฺจิ สาธุปตฺถิตํ;
ปริโภคมยํ ทินฺนํ, ตุยฺหตฺถาย มหามุเนฯ
[3]
‘‘พุทฺธปจฺเจกพุทฺธานํ, สาวกานญฺจ ปตฺถิตํ [พุทฺธานํ สาวกานญฺจ (สี. ก.)];
ปริโภคมยํ ทินฺนํ, ตุยฺหตฺถาย มหามุเนฯ
[4]
‘‘อุจฺจนีจมยํ กมฺมํ, ภิกฺขูนํ สาธุปตฺถิตํ;
อุจฺจากุลปริกมฺมํ, กตเมตํ มหามุเน [กตมฺเหหิ มหามุเน (สฺยา. ปี.)]ฯ
[5]
‘‘เตเนว สุกฺกมูเลน, โจทิตา กมฺมสมฺปทา;
มานุสิกมติกฺกนฺตา, ชายิํสุ ขตฺติเย กุเลฯ
[6]
‘‘อุปฺปตฺเต จ กเต กมฺเม, ชาติยา วาปิ เอกโต;
ปจฺฉิเม เอกโต ชาตา, ขตฺติยา กุลสมฺภวาฯ
[7]
‘‘รูปวตี โภควตี, ลาภสกฺการปูชิตา;
อนฺเตปุเร มหาวีร, เทวานํ วิย นนฺทเนฯ
[8]
‘‘นิพฺพินฺทิตฺวา อคารมฺหา, ปพฺพชิมฺหนคาริยํ;
กติปาหํ อุปาทาย, สพฺพา ปตฺตามฺห นิพฺพุติํฯ
[9]
‘‘จีวรํ ปิณฺฑปาตญฺจ, ปจฺจยํ สยนาสนํ;
อุปเนนฺติ พหู อมฺเห, สทา สกฺกตปูชิตาฯ
[10]
‘‘กิเลสา ฌาปิตา อมฺหํ, ภวา สพฺเพ สมูหตา;
นาคีว พนฺธนํ เฉตฺวา, วิหราม อนาสวาฯ
[11]
‘‘สฺวาคตํ วต โน อาสิ, มม พุทฺธสฺส สนฺติเก;
ติสฺโส วิชฺชา อนุปฺปตฺตา, กตํ พุทฺธสฺส สาสนํฯ
[12]
‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
อิตฺถํ สุทํ ยสวตีปมุขานิ ขตฺติยกญฺญาภิกฺขุนิโย อฏฺฐารสสหสฺสานิ ภควโต สมฺมุขา อิมา คาถาโย อภาสิตฺถาติฯ
ยสวตีปมุขอฏฺฐารสภิกฺขุนีสหสฺสาปทานํ ปฐมํฯ
2. จตุราสีติภิกฺขุนีสหสฺสอปทานํ
[13]
‘‘จุลฺลาสีติสหสฺสานิ , พฺราหฺมญฺญกุลสมฺภวา [พฺราหฺมณกุลสมฺภวา (สฺยา. ก.)];
สุขุมาลหตฺถปาทา, ปุเร ตุยฺหํ มหามุเนฯ
[14]
‘‘เวสฺสสุทฺทกุเล ชาตา, เทวา นาคา จ กินฺนรา;
จาตุทฺทีปา พหู กญฺญา, ปุเร ตุยฺหํ มหามุเนฯ
[15]
‘‘กาจิ ปพฺพชิตา อตฺถิ, สพฺพทสฺสาวิโน [สจฺจทสฺสาวิโน (สี. ปี.)] หู;
เทวา จ กินฺนรา นาคา, ผุสิสฺสนฺติ อนาคเตฯ
[16]
‘‘อนุโภตฺวา ยสํ สพฺพํ, ปตฺวาน สพฺพสมฺปทา;
ตุมฺหํ [ตฺวยิ (สี. ปี.)] ปสาทํ ปฏิลทฺธา, พุชฺฌิสฺสนฺติ อนาคเตฯ
[17]
‘‘อมฺเห พฺราหฺมณธีตา ตุ, พฺราหฺมญฺญกุลสมฺภวา;
เปกฺขโต โน [ลกฺขณา จ (สฺยา.)] มหาวีร, ปาเท วนฺทาม จกฺขุมฯ
[18]
‘‘อุปหตา ภวา สพฺเพ, มูลตณฺหา สมูหตา;
สมุจฺฉินฺนา อนุสยา, ปุญฺญสงฺขารทาลิตาฯ
[19]
‘‘สมาธิโคจรา สพฺพา, สมาปตฺติวสี กตา;
ฌาเนน ธมฺมรติยา, วิหริสฺสาม โน สทาฯ
[20]
‘‘ภวเนตฺติ อวิชฺชา จ, สงฺขาราปิ จ เขปิตา;
สุทุทฺทสํ ปทํ คนฺตฺวา, อนุชานาถ [อนุชานิมฺห (สฺยา. ปี. ก.)] นายกฯ
[21]
‘‘อุปการา มมํ ตุมฺเห, ทีฆรตฺตํ กตาวิโน;
จตุนฺนํ สํสยํ เฉตฺวา, สพฺพา คจฺฉนฺตุ นิพฺพุติํฯ
[22]