‘‘นิพฺพานาย วทนฺตีนํ, กิํ โว วกฺขาม อุตฺตริ;

สนฺตสงฺขตโทสญฺหิ, ปปฺโปถ [สนฺตสงฺขตโทโส โย, ปชฺโชตํ (สฺยา. ปี. ก.)] อมตํ ปทํ’’ฯ

อิตฺถํ สุทํ ยโสธราปมุขานิ อฏฺฐารสภิกฺขุนีสหสฺสานิ ภควโต สมฺมุขา อิมา คาถาโย อภาสิตฺถาติฯ

ยโสธราปมุขอฏฺฐารสภิกฺขุนีสหสฺสาปทานํ ทสมํฯ

กุณฺฑลเกสีวคฺโค ตติโยฯ

ตสฺสุทฺทานํ –

กุณฺฑลา โคตมี เจว, ธมฺมทินฺนา จ สกุลา;

วรนนฺทา จ โสณา จ, กาปิลานี ยโสธราฯ

ทสสหสฺสภิกฺขุนี, อฏฺฐารสสหสฺสกา;

คาถาสตานิ จตฺตาริ, ฉ จ สตฺตติเมว จ [อฏฺฐสตฺตติเมว จ (สฺยา.)]ฯ

4. ขตฺติยาวคฺโค

1. ยสวตีปมุขอฏฺฐารสภิกฺขุนีสหสฺสอปทานํ

[1]

‘‘ภวา สพฺเพ ปริกฺขีณา, ภวา สนฺติ วิโมจิตา;

สพฺพาสวา จ โน นตฺถิ, อาโรเจม มหามุเนฯ

[2]

‘‘ปุริมํ กุสลํ กมฺมํ [ปริกมฺมญฺจ กุสลํ (สฺยา.)], ยํ กิญฺจิ สาธุปตฺถิตํ;

ปริโภคมยํ ทินฺนํ, ตุยฺหตฺถาย มหามุเนฯ

[3]

‘‘พุทฺธปจฺเจกพุทฺธานํ, สาวกานญฺจ ปตฺถิตํ [พุทฺธานํ สาวกานญฺจ (สี. ก.)];

ปริโภคมยํ ทินฺนํ, ตุยฺหตฺถาย มหามุเนฯ

[4]

‘‘อุจฺจนีจมยํ กมฺมํ, ภิกฺขูนํ สาธุปตฺถิตํ;

อุจฺจากุลปริกมฺมํ, กตเมตํ มหามุเน [กตมฺเหหิ มหามุเน (สฺยา. ปี.)]ฯ

[5]

‘‘เตเนว สุกฺกมูเลน, โจทิตา กมฺมสมฺปทา;

มานุสิกมติกฺกนฺตา, ชายิํสุ ขตฺติเย กุเลฯ

[6]

‘‘อุปฺปตฺเต จ กเต กมฺเม, ชาติยา วาปิ เอกโต;

ปจฺฉิเม เอกโต ชาตา, ขตฺติยา กุลสมฺภวาฯ

[7]

‘‘รูปวตี โภควตี, ลาภสกฺการปูชิตา;

อนฺเตปุเร มหาวีร, เทวานํ วิย นนฺทเนฯ

[8]

‘‘นิพฺพินฺทิตฺวา อคารมฺหา, ปพฺพชิมฺหนคาริยํ;

กติปาหํ อุปาทาย, สพฺพา ปตฺตามฺห นิพฺพุติํฯ

[9]

‘‘จีวรํ ปิณฺฑปาตญฺจ, ปจฺจยํ สยนาสนํ;

อุปเนนฺติ พหู อมฺเห, สทา สกฺกตปูชิตาฯ

[10]

‘‘กิเลสา ฌาปิตา อมฺหํ, ภวา สพฺเพ สมูหตา;

นาคีว พนฺธนํ เฉตฺวา, วิหราม อนาสวาฯ

[11]

‘‘สฺวาคตํ วต โน อาสิ, มม พุทฺธสฺส สนฺติเก;

ติสฺโส วิชฺชา อนุปฺปตฺตา, กตํ พุทฺธสฺส สาสนํฯ

[12]