‘‘ปจฺฉิเม ภเว สมฺปตฺเต, สกฺยปุตฺตนิเวสเน;
นานากุลูปปนฺนาโย, อจฺฉรา กามวณฺณินีฯ
[420]
‘‘ลาภคฺเคน ยสํ ปตฺตา, ปูชิตา สพฺพสกฺกตา;
ลาภิโย อนฺนปานานํ, สทา สมฺมานิตา มยํฯ
[421]
‘‘อคารํ ปชหิตฺวาน, ปพฺพชิมฺหนคาริยํ;
อฑฺฒมาเส อสมฺปตฺเต, สพฺพา ปตฺตามฺห นิพฺพุติํฯ
[422]
‘‘ลาภิโย อนฺนปานานํ, วตฺถเสนาสนานิ จ;
อุเปนฺติ ปจฺจยา สพฺเพ, สทา สกฺกตปูชิตาฯ
[423]
‘‘กิเลสา ฌาปิตา อมฺหํ…เป.… วิหราม อนาสวาฯ
[424]
‘‘สฺวาคตํ วต โน อาสิ…เป.… กตํ พุทฺธสฺส สาสนํฯ
[425]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ ยโสธราปมุขานิ ทสภิกฺขุนีสหสฺสานิ ภควโต สมฺมุขา อิมา คาถาโย อภาสิตฺถาติฯ
ยโสธราปมุขทสภิกฺขุนีสหสฺสาปทานํ นวมํฯ
10. ยโสธราปมุขอฏฺฐารสภิกฺขุนีสหสฺสอปทานํ
[426]
‘‘อฏฺฐารสสหสฺสานิ , ภิกฺขุนี สกฺยสมฺภวา;
ยโสธราปมุขานิ, สมฺพุทฺธํ อุปสงฺกมุํฯ
[427]
‘‘อฏฺฐารสสหสฺสานิ, สพฺพา โหนฺติ มหิทฺธิกา;
วนฺทนฺตี มุนิโน ปาเท, อาโรเจนฺติ ยถาพลํฯ
[428]
‘‘‘ชาติ ขีณา ชรา พฺยาธิ, มรณญฺจ มหามุนิ;
อนาสวํ ปทํ สนฺตํ, อมตํ ยาม นายกฯ
[429]
‘‘‘ขลิตญฺเจ ปุเร อตฺถิ, สพฺพาสมฺปิ มหามุนิ;
อปราธมชานนฺตี, ขม อมฺหํ วินายกฯ
[430]
‘‘‘อิทฺธิญฺจาปิ นิทสฺเสถ, มม สาสนการิกา;
ปริสานญฺจ สพฺพาสํ, กงฺขํ ฉินฺทถ ยาวตาฯ
[431]
‘‘‘ยโสธรา มหาวีร, มนาปา ปิยทสฺสนา;
สพฺพา ตุยฺหํ มหาวีร, อคารสฺมิํ ปชาปติฯ
[432]
‘‘‘ถีนํ สตสหสฺสานํ, นวุตีนํ ฉทุตฺตริ;
อคาเร เต มยํ วีร, ปาโมกฺขา สพฺพา อิสฺสราฯ
[433]
‘‘‘รูปาจารคุณูเปตา, โยพฺพนฏฺฐา ปิยํวทา;
สพฺพา โน อปจายนฺติ, เทวตา วิย มานุสาฯ
[434]
‘‘‘อฏฺฐารสสหสฺสานิ, สพฺพา สากิยสมฺภวา;
ยโสธราสหสฺสานิ, ปาโมกฺขา อิสฺสรา ตทาฯ
[435]
‘‘‘กามธาตุมติกฺกมฺม , สณฺฐิตา รูปธาตุยา;
รูเปน สทิสา นตฺถิ, สหสฺสานํ มหามุนิฯ
[436]
‘‘‘สมฺพุทฺธํ อภิวาเทตฺวา, อิทฺธิํ ทสฺสํสุ สตฺถุโน;
เนกา นานาวิธาการา, มหาอิทฺธีปิ ทสฺสยุํฯ
[437]
‘‘‘จกฺกวาฬสมํ กายํ, สีสํ อุตฺตรโต กุรุ;
อุโภ ปกฺขา ทุเว ทีปา, ชมฺพุทีปํ สรีรโตฯ
[438]
‘‘‘ทกฺขิณญฺจ สรํ ปิญฺฉํ, นานาสาขา ตุ ปตฺตกา;
จนฺทญฺจ สูริยญฺจกฺขิ, เมรุปพฺพตโต สิขํฯ
[439]
‘‘‘จกฺกวาฬคิริํ ตุณฺฑํ, ชมฺพุรุกฺขํ สมูลกํ;
พีชมานา อุปาคนฺตฺวา, วนฺทนฺตี โลกนายกํฯ
[440]
‘‘‘หตฺถิวณฺณํ ตเถวสฺสํ, ปพฺพตํ ชลธิํ ตถา;
จนฺทญฺจ สูริยํ เมรุํ, สกฺกวณฺณญฺจ ทสฺสยุํฯ
[441]
‘‘‘ยโสธรา มยํ วีร, ปาเท วนฺทาม จกฺขุม;
ตว จิรปภาเวน, นิปฺผนฺนา นรนายกฯ
[442]
‘‘‘อิทฺธีสุ จ วสี โหม, ทิพฺพาย โสตธาตุยา;
เจโตปริยญาณสฺส, วสี โหม มหามุเนฯ
[443]
‘‘‘ปุพฺเพนิวาสํ ชานาม, ทิพฺพจกฺขุ วิโสธิตํ;
สพฺพาสวปริกฺขีณา, นตฺถิ ทานิ ปุนพฺภโวฯ
[444]
‘‘‘อตฺถธมฺมนิรุตฺตีสุ, ปฏิภาเน ตเถว จ;
ญาณํ อมฺหํ มหาวีร, อุปฺปนฺนํ ตว สนฺติเกฯ
[445]
‘‘‘ปุพฺพานํ โลกนาถานํ, สงฺคมํ โน นิทสฺสิตํ;
อธิการา พหู อมฺหํ, ตุยฺหตฺถาย มหามุเนฯ
[446]
‘‘‘ยํ อมฺหํ ปูริตํ กมฺมํ, กุสลํ สรเส มุเน;
ตุยฺหตฺถาย มหาวีร, ปุญฺญานุปจิตานิ โนฯ
[447]
‘‘‘อภพฺพฏฺฐาเน วชฺเชตฺวา, วารยิมฺห อนาจรํ;
ตุยฺหตฺถาย มหาวีร, จตฺตานิ ชีวิตานิ โน [สญฺจตฺตํ ชีวิตมฺปิ โน (สฺยา.)]ฯ
[448]
‘‘‘เนกโกฏิสหสฺสานิ , ภริยตฺถายทาสิ โน;
น ตตฺถ วิมนา โหม, ตุยฺหตฺถาย มหามุเนฯ
[449]
‘‘‘เนกโกฏิสหสฺสานิ, อุปการายทาสิ โน;
น ตตฺถ วิมนา โหม, ตุยฺหตฺถาย มหามุเนฯ
[450]
‘‘‘เนกโกฏิสหสฺสานิ, โภชนตฺถายทาสิ โน;
น ตตฺถ วิมนา โหม, ตุยฺหตฺถาย มหามุเนฯ
[451]
‘‘‘เนกโกฏิสหสฺสานิ , ชีวิตานิ จชิมฺหเส [จชิมฺห โน (ปี. ก.)];
ภยโมกฺขํ กริสฺสาม, ชีวิตานิ จชิมฺหเสฯ
[452]
‘‘‘องฺคคเต อลงฺกาเร, วตฺเถ นานาวิเธ พหู;
อิตฺถิภณฺเฑ น คูหาม, ตุยฺหตฺถาย มหามุเนฯ
[453]
‘‘‘ธนธญฺญปริจฺจาคํ , คามานิ นิคมานิ จ;
เขตฺตํ ปุตฺตา จ ธีตา จ, ปริจฺจตฺตา มหามุเนฯ
[454]
‘‘‘หตฺถี อสฺสา ควา จาปิ, ทาสิโย ปริจาริกา;
ตุยฺหตฺถาย มหาวีร, ปริจฺจตฺตํ อสงฺขิยํฯ
[455]
‘‘‘ยํ อมฺเห ปฏิมนฺเตสิ, ทานํ ทสฺสาม ยาจเก;
วิมนํ โน น ปสฺสาม, ททโต ทานมุตฺตมํฯ
[456]
‘‘‘นานาวิธํ พหุํ ทุกฺขํ, สํสาเร จ พหุพฺพิเธ;
ตุยฺหตฺถาย มหาวีร, อนุภุตฺตํ อสงฺขิยํฯ
[457]
‘‘‘สุขปฺปตฺตานุโมทาม, น จ ทุกฺเขสุ ทุมฺมนา;
สพฺพตฺถ ตุลิตา โหม, ตุยฺหตฺถาย มหามุเนฯ
[458]
‘‘‘อนุมคฺเคน สมฺพุทฺโธ, ยํ ธมฺมํ อภินีหริ;
อนุโภตฺวา สุขํ ทุกฺขํ, ปตฺโต โพธิํ มหามุเนฯ
[459]
‘‘‘พฺรหฺมเทวญฺจ สมฺพุทฺธํ, โคตมํ โลกนายกํ;
อญฺเญสํ โลกนาถานํ, สงฺคมํ เตหิ โน พหูฯ
[460]
‘‘‘อธิการํ พหุํ อมฺเห, ตุยฺหตฺถาย มหามุเน;
คเวสโต พุทฺธธมฺเม, มยํ เต ปริจาริกาฯ
[461]
‘‘‘กปฺเป จ สตสหสฺเส, จตุโร จ อสงฺขิเย;
ทีปงฺกโร มหาวีโร, อุปฺปชฺชิ โลกนายโกฯ
[462]
‘‘‘ปจฺจนฺตเทสวิสเย, นิมนฺเตตฺวา ตถาคตํ;
ตสฺส อาคมนํ มคฺคํ, โสเธนฺติ ตุฏฺฐมานสาฯ
[463]
‘‘‘เตน กาเลน โส อาสิ, สุเมโธ นาม พฺราหฺมโณ;
มคฺคญฺจ ปฏิยาเทสิ, อายโต สพฺพทสฺสิโนฯ
[464]
‘‘‘เตน กาเลน อหุมฺห, สพฺพา พฺราหฺมณสมฺภวา;
ถลูทชานิ ปุปฺผานิ, อาหริมฺห สมาคมํฯ
[465]
‘‘‘ตสฺมิํ โส สมเย พุทฺโธ, ทีปงฺกโร มหายโส;
วิยากาสิ มหาวีโร, อิสิมุคฺคตมานสํฯ
[466]
‘‘‘จลตี รวตี ปุถวี, สงฺกมฺปติ สเทวเก;
ตสฺส กมฺมํ ปกิตฺเตนฺเต, อิสิมุคฺคตมานสํฯ
[467]
‘‘‘เทวกญฺญา มนุสฺสา จ, มยญฺจาปิ สเทวกา;
นานาปูชนียํ ภณฺฑํ, ปูชยิตฺวาน ปตฺถยุํฯ
[468]
‘‘‘เตสํ พุทฺโธ วิยากาสิ, โชติทีป สนามโก;
อชฺช เย ปตฺถิตา อตฺถิ, เต ภวิสฺสนฺติ สมฺมุขาฯ
[469]
‘‘‘อปริเมยฺเย อิโต กปฺเป, ยํ โน พุทฺโธ วิยากริ;
ตํ วาจมนุโมเทนฺตา, เอวํการี อหุมฺห โนฯ
[470]
‘‘‘ตสฺส กมฺมสฺส สุกตสฺส, ตสฺส จิตฺตํ ปสาทยุํ;
เทวมานุสิกํ โยนิํ, อนุโภตฺวา อสงฺขิยํฯ
[471]
‘‘‘สุขทุกฺเขนุโภตฺวาน , เทเวสุ มานุเสสุ จ;
ปจฺฉิเม ภเว สมฺปตฺเต, ชาตามฺห สากิเย กุเลฯ
[472]
‘‘‘รูปวตี โภควตี, ยสสีลวตี ตโต;
สพฺพงฺคสมฺปทา โหม, กุเลสุ อภิสกฺกตาฯ
[473]
‘‘‘ลาภํ สิโลกํ สกฺการํ, โลกธมฺมสมาคมํ;
จิตฺตญฺจ ทุกฺขิตํ นตฺถิ, วสาม อกุโตภยาฯ
[474]
‘‘‘วุตฺตญฺเหตํ ภควตา, รญฺโญ อนฺเตปุเร ตทา;
ขตฺติยานํ ปุเร วีร [ตาสํ (สฺยา.)], อุปการญฺจ นิทฺทิสิฯ
[475]
‘‘‘อุปการา จ ยา นารี, ยา จ นารี สุเข ทุเข;
อตฺถกฺขายี จ ยา นารี, ยา จ นารีนุกมฺปิกาฯ
[476]
‘‘‘ธมฺมํ จเร สุจริตํ, น นํ ทุจฺจริตํ จเร;
ธมฺมจารี สุขํ เสติ, อสฺมิํ โลเก ปรมฺหิ จฯ
[477]
‘‘‘อคารํ วิชหิตฺวาน, ปพฺพชิมฺหนคาริยํ;
อฑฺฒมาเส อสมฺปตฺเต, จตุสจฺจํ ผุสิมฺห โนฯ
[478]
‘‘‘จีวรํ ปิณฺฑปาตญฺจ, ปจฺจยํ สยนาสนํ;
อุปเนนฺติ พหู อมฺเห, สาครสฺเสว อูมิโยฯ
[479]
‘‘‘กิเลสา ฌาปิตา อมฺหํ [มยฺหํ (สฺยา.), อมฺหากํ (ก.)], ภวา สพฺเพ สมูหตา;
นาคีว พนฺธนํ เฉตฺวา, วิหราม อนาสวาฯ
[480]
‘‘‘สฺวาคตํ วต โน อาสิ, มม พุทฺธสฺส สนฺติเก;
ติสฺโส วิชฺชา อนุปฺปตฺตา, กตํ พุทฺธสฺส สาสนํฯ
[481]
‘‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนํ’ฯ
[482]
‘‘เอวํ พหุวิธํ ทุกฺขํ, สมฺปตฺตี จ พหุพฺพิธา;
วิสุทฺธภาวํ สมฺปตฺตา, ลภาม สพฺพสมฺปทาฯ
[483]
‘‘ยา ททนฺติ สกตฺตานํ, ปุญฺญตฺถาย มเหสิโน;
สหายสมฺปทา โหนฺติ, นิพฺพานปทมสงฺขตํฯ
[484]
‘‘ปริกฺขีณํ อตีตญฺจ, ปจฺจุปฺปนฺนํ อนาคตํ;
สพฺพกมฺมมฺปิ โน ขีณํ, ปาเท วนฺทาม จกฺขุมฯ
[485]
‘‘นิพฺพานาย วทนฺตีนํ, กิํ โว วกฺขาม อุตฺตริ;
สนฺตสงฺขตโทสญฺหิ, ปปฺโปถ [สนฺตสงฺขตโทโส โย, ปชฺโชตํ (สฺยา. ปี. ก.)] อมตํ ปทํ’’ฯ
อิตฺถํ สุทํ ยโสธราปมุขานิ อฏฺฐารสภิกฺขุนีสหสฺสานิ ภควโต สมฺมุขา อิมา คาถาโย อภาสิตฺถาติฯ
ยโสธราปมุขอฏฺฐารสภิกฺขุนีสหสฺสาปทานํ ทสมํฯ
กุณฺฑลเกสีวคฺโค ตติโยฯ
ตสฺสุทฺทานํ –
กุณฺฑลา โคตมี เจว, ธมฺมทินฺนา จ สกุลา;
วรนนฺทา จ โสณา จ, กาปิลานี ยโสธราฯ
ทสสหสฺสภิกฺขุนี, อฏฺฐารสสหสฺสกา;
คาถาสตานิ จตฺตาริ, ฉ จ สตฺตติเมว จ [อฏฺฐสตฺตติเมว จ (สฺยา.)]ฯ
4. ขตฺติยาวคฺโค