5. อุตฺตลิปุปฺผิยตฺเถรอปทานํ
[31]
‘‘นิคฺโรเธ หริโตภาเส, สํวิรุฬฺหมฺหิ ปาทเป;
อุตฺตลิมาลํ [อุมฺมา มาลํ หิ (สฺยา.)] ปคฺคยฺห, โพธิยา อภิโรปยิํฯ
[32]
‘‘อิมสฺมิํเยว กปฺปมฺหิ, ยํ โพธิมภิปูชยิํ;
ทุคฺคติํ นาภิชานามิ, โพธิปูชายิทํ ผลํฯ
[33]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[34]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[35]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อุตฺตลิปุปฺผิโย เถโร อิมา คาถาโย
อภาสิตฺถาติฯ
อุตฺตลิปุปฺผิยตฺเถรสฺสาปทานํ ปญฺจมํฯ
6. อมฺพาฏกิยตฺเถรอปทานํ
[36]
‘‘สุปุปฺผิตํ สาลวนํ, โอคยฺห เวสฺสภู มุนิ;
นิสีทิ คิริทุคฺเคสุ, อภิชาโตว เกสรีฯ
[37]
‘‘ปสนฺนจิตฺโต สุมโน, อมฺพาฏกมปูชยิํ;
ปุญฺญกฺเขตฺตํ อนุตฺตรํ [มหาวีรํ (สี. สฺยา.)], ปสนฺโน เสหิ ปาณิภิฯ
[38]
‘‘เอกติํเส อิโต กปฺเป, ยํ ปุปฺผมภิโรปยิํ;
ทุคฺคติ นาภิชานามิ, พุทฺธปูชายิทํ ผลํฯ
[39]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[40]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[41]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อมฺพาฏกิโย เถโร อิมา คาถาโย
อภาสิตฺถาติฯ
อมฺพาฏกิยตฺเถรสฺสาปทานํ ฉฏฺฐํฯ
7. สีหาสนิกตฺเถรอปทานํ
[42]
‘‘ปทุมุตฺตรสฺส ภควโต, สพฺพภูตหิเตสิโน;
ปสนฺนจิตฺโต สุมโน, สีหาสนมทาสหํฯ
[43]
‘‘เทวโลเก มนุสฺเส วา, ยตฺถ ยตฺถ วสามหํ;
ลภามิ วิปุลํ พฺยมฺหํ, สีหาสนสฺสิทํ ผลํฯ
[44]
‘‘โสณฺณมยา รูปิมยา, โลหิตงฺคมยา [โลหิตงฺกมยา (สี. สฺยา. ปี.)] พหู;
มณิมยา จ ปลฺลงฺกา, นิพฺพตฺตนฺติ มมํ สทาฯ
[45]
‘‘โพธิยา อาสนํ กตฺวา, ชลชุตฺตมนามิโน;
อุจฺเจ กุเล ปชายามิ, อโห ธมฺมสุธมฺมตาฯ
[46]
‘‘สตสหสฺสิโต กปฺเป, สีหาสนมกาสหํ;
ทุคฺคติํ นาภิชานามิ, สีหาสนสฺสิทํ ผลํฯ
[47]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[48]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[49]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา สีหาสนิโก เถโร อิมา คาถาโย
อภาสิตฺถาติฯ
สีหาสนิกตฺเถรสฺสาปทานํ สตฺตมํฯ
8. ปาทปีฐิยตฺเถรอปทานํ
[50]
‘‘สุเมโธ นาม สมฺพุทฺโธ, อคฺโค การุณิโก มุนิ;
ตารยิตฺวา พหู สตฺเต, นิพฺพุโต โส มหายโสฯ
[51]
‘‘สีหาสนสฺส สามนฺตา, สุเมธสฺส มเหสิโน;
ปสนฺนจิตฺโต สุมโน, ปาทปีฐมการยิํฯ
[52]
‘‘กตฺวาน กุสลํ กมฺมํ, สุขปากํ สุขุทฺรยํ;
ปุญฺญกมฺเมน สํยุตฺโต, ตาวติํสมคจฺฉหํฯ
[53]
