‘‘ยทา ปพฺพชิตา อาสิ, โคตมี ชินโปสิกา;
ตทาหํ ตมุปคนฺตฺวา, พุทฺเธน อนุสาสิตาฯ
[306]
‘‘น จิเรเนว กาเลน, อรหตฺตมปาปุณิํ;
อโห กลฺยาณมิตฺตตฺตํ, กสฺสปสฺส สิรีมโตฯ
[307]
‘‘สุโต พุทฺธสฺส ทายาโท, กสฺสโป สุสมาหิโต;
ปุพฺเพนิวาสํ โย เวทิ, สคฺคาปายญฺจ ปสฺสติฯ
[308]
‘‘อโถ ชาติกฺขยํ ปตฺโต, อภิญฺญาโวสิโต มุนิ;
เอตาหิ ตีหิ วิชฺชาหิ, เตวิชฺโช โหติ พฺราหฺมโณฯ
[309]
‘‘ตเถว ภทฺทกาปิลานี [ภทฺทากาปิลานี (สี. ปี.)], เตวิชฺชา มจฺจุหายินี;
ธาเรติ อนฺติมํ เทหํ, ชิตฺวา มารํ สวาหนํฯ
[310]
‘‘ทิสฺวา อาทีนวํ โลเก, อุโภ ปพฺพชิตา มยํ;
ตฺยมฺห ขีณาสวา ทนฺตา, สีติภูตามฺห นิพฺพุตาฯ
[311]
‘‘กิเลสา ฌาปิตา มยฺหํ…เป.… วิหรามิ อนาสวาฯ
[312]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[313]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ ภทฺทกาปิลานี ภิกฺขุนี อิมา คาถาโย อภาสิตฺถาติฯ
ภทฺทกาปิลานีเถริยาปทานํ สตฺตมํฯ
8. ยโสธราเถรีอปทานํ
[314]
เอกสฺมิํ สมเย รมฺเม, อิทฺเธ ราชคเห ปุเร;
ปพฺภารมฺหิ วเรกมฺหิ, วสนฺเต นรนายเกฯ
[315]
วสนฺติยา ตมฺหิ นคเร, รมฺเม ภิกฺขุนุปสฺสเย;
ยโสธราภิกฺขุนิยา, เอวํ อาสิ วิตกฺกิตํฯ
[316]
‘‘สุทฺโธทโน มหาราชา, โคตมี จ ปชาปตี;
อภิญฺญาตา มหาเถรา, เถริโย จ มหิทฺธิกาฯ
[317]
‘‘สนฺติํ คตาว อาสุํ เต, ทีปจฺจีว นิราสวา;
โลกนาเถ ธรนฺเตว, อหมฺปิ จ สิวํ ปทํฯ
[318]
‘‘คมิสฺสามีติ จินฺเตตฺวา, ปสฺสนฺตี อายุมตฺตโน;
ปสฺสิตฺวา อายุสงฺขารํ, ตทเหว ขยํ คตํฯ
[319]
‘‘ปตฺตจีวรมาทาย, นิกฺขมิตฺวา สกสฺสมา;
ปุรกฺขตา ภิกฺขุนีภิ, สเตหิ สหสฺเสหิ สา [สห ปญฺจหิ (สี. ปี.)]ฯ
[320]
‘‘มหิทฺธิกา มหาปญฺญา, สมฺพุทฺธํ อุปสงฺกมิ;
สมฺพุทฺธํ อภิวาเทตฺวา, สตฺถุโน จกฺกลกฺขเณ;
นิสินฺนา เอกมนฺตมฺหิ, อิทํ วจนมพฺรวิฯ
[321]
‘‘‘อฏฺฐสตฺตติวสฺสาหํ, ปจฺฉิโม วตฺตเต วโย [ปจฺฉิมา วตฺตยิ วยา (สฺยา.)];
ปพฺภารมฺหิ อนุปฺปตฺตา, อาโรเจมิ มหามุนิฯ
[322]
‘‘‘ปริปกฺโก วโย มยฺหํ, ปริตฺตํ มม ชีวิตํ;
ปหาย โว คมิสฺสามิ, กตํ เม สรณมตฺตโนฯ
[323]
‘‘‘วยมฺหิ ปจฺฉิเม กาเล, มรณํ อุปรุทฺธติ;
อชฺชรตฺติํ มหาวีร, ปาปุณิสฺสามิ นิพฺพุติํฯ
[324]
‘‘‘นตฺถิ ชาติ ชรา พฺยาธิ, มรณญฺจ มหามุเน;
อชรามรณํ ปุรํ, คมิสฺสามิ อสงฺขตํฯ
[325]
‘‘‘ยาวตา ปริสา นาม, สมุปาสนฺติ สตฺถุโน;
อปราธมชานนฺตี [สเจ เมตฺถิ (สี.), ปชานนฺตี (ก.)], ขมนฺตํ สมฺมุขา มุเนฯ
[326]
‘‘‘สํสริตฺวา จ สํสาเร, ขลิตญฺเจ มมํ ตยิ;
อาโรเจมิ มหาวีร, อปราธํ ขมสฺสุ เม’ฯ
[327]
‘‘สุตฺวาน วจนํ ตสฺสา, มุนินฺโท อิทมพฺรวิ;
‘กิมุตฺตรํ เต วกฺขามิ, นิพฺพานาย วชนฺติยาฯ
[328]
‘‘‘อิทฺธิญฺจาปิ นิทสฺเสหิ, มม สาสนการิเก;
ปริสานญฺจ สพฺพาสํ, กงฺขํ ฉินฺทสฺสุ ยาวตา’ฯ
[329]
‘‘สุตฺวา ตํ มุนิโน วาจํ, ภิกฺขุนี สา ยโสธรา;
วนฺทิตฺวา มุนิราชํ ตํ, อิทํ วจนมพฺรวิฯ
[330]
‘‘‘ยโสธรา อหํ วีร, อคาเร เต ปชาปติ;
สากิยมฺหิ กุเล ชาตา, อิตฺถิองฺเค ปติฏฺฐิตาฯ
[331]
‘‘‘ถีนํ สตสหสฺสานํ, นวุตีนํ ฉทุตฺตริ;
อคาเร เต อหํ วีร, ปาโมกฺขา สพฺพา อิสฺสราฯ
[332]
‘‘‘รูปาจารคุณูเปตา , โยพฺพนฏฺฐา ปิยํวทา;
สพฺพา มํ อปจายนฺติ, เทวตา วิย มานุสาฯ
[333]
‘‘‘กญฺญาสตสหสฺสปมุขา, สกฺยปุตฺตนิเวสเน;
สมานสุขทุกฺขตา, เทวตา วิย นนฺทเนฯ
[334]
‘‘‘กามธาตุมติกฺกมฺม [กามธาตุมติกฺกนฺตา (สี. สฺยา. ปี. ก.)], สณฺฐิตา รูปธาตุยา;
รูเปน สทิสา นตฺถิ, ฐเปตฺวา โลกนายกํฯ
[335]
‘‘‘สมฺพุทฺธํ อภิวาเทตฺวา, อิทฺธิํ ทสฺเสสิ สตฺถุโน;
เนกา นานาวิธาการา, มหาอิทฺธีปิ ทสฺสยี [เอวมาทีนิ วตฺวาน, อุปติตฺวาน อมฺพรํ; อิทฺธี อเนกา ทสฺเสสิ, พุทฺธานุญฺญา ยโสธรา; (สี.)]ฯ
[336]
‘‘‘จกฺกวาฬสมํ กายํ, สีสํ อุตฺตรโต กุรุ;
อุโภ ปกฺขา ทุเว ทีปา, ชมฺพุทีปํ สรีรโตฯ
[337]
‘‘‘ทกฺขิณญฺจ สรํ ปิญฺฉํ, นานาสาขา ตุ ปตฺตกา;
จนฺทญฺจ สูริยญฺจกฺขิ, เมรุปพฺพตโต สิขํฯ
[338]
‘‘‘จกฺกวาลคิริํ ตุณฺฑํ, ชมฺพุรุกฺขํ สมูลกํ;
พีชมานา อุปาคนฺตฺวา, วนฺทนฺตี โลกนายกํฯ
[339]
‘‘‘หตฺถิวณฺณํ ตเถวสฺสํ, ปพฺพตํ ชลธิํ ตถา;
จนฺทิมํ สูริยํ เมรุํ, สกฺกวณฺณญฺจ ทสฺสยิฯ
[340]
‘‘‘ยโสธรา อหํ วีร, ปาเท วนฺทามิ จกฺขุม;
สหสฺสโลกธาตูนํ, ผุลฺลปทฺเมน ฉาทยิฯ
[341]
‘‘‘พฺรหฺมวณฺณญฺจ มาเปตฺวา, ธมฺมํ เทเสสิ สุญฺญตํ;
ยโสธรา อหํ วีร, ปาเท วนฺทามิ จกฺขุมฯ
[342]
‘‘‘อิทฺธีสุ จ วสี โหมิ, ทิพฺพาย โสตธาตุยา;
เจโตปริยญาณสฺส, วสี โหมิ มหามุนิฯ
[343]
‘‘‘ปุพฺเพนิวาสํ ชานามิ, ทิพฺพจกฺขุ วิโสธิตํ;
สพฺพาสวปริกฺขีณา, นตฺถิ ทานิ ปุนพฺภโวฯ
[344]
‘‘‘อตฺถธมฺมนิรุตฺตีสุ, ปฏิภาเน ตเถว จ;
ญาณํ มยฺหํ มหาวีร, อุปฺปนฺนํ ตว สนฺติเกฯ
[345]
‘‘‘ปุพฺพานํ โลกนาถานํ, สงฺคมํ เต นิทสฺสิตํ [สุทสฺสิตํ (สฺยา. ปี. ก.)];
อธิการํ พหุํ มยฺหํ, ตุยฺหตฺถาย มหามุเนฯ
[346]
‘‘‘ยํ มยฺหํ ปูริตํ กมฺมํ, กุสลํ สรเส มุเน;
ตุยฺหตฺถาย มหาวีร, ปุญฺญํ อุปจิตํ มยาฯ
[347]
‘‘‘อภพฺพฏฺฐาเน วชฺเชตฺวา, วารยิตฺวา อนาจรํ;
ตุยฺหตฺถาย มหาวีร, สญฺจตฺตํ ชีวิตํ มยาฯ
[348]
‘‘‘เนกโกฏิสหสฺสานิ , ภริยตฺถายทาสิ มํ;
น ตตฺถ วิมนา โหมิ, ตุยฺหตฺถาย มหามุนิฯ
[349]
‘‘‘เนกโกฏิสหสฺสานิ, อุปการายทาสิ มํ;
น ตตฺถ วิมนา โหมิ, ตุยฺหตฺถาย มหามุนิฯ
[350]
‘‘‘เนกโกฏิสหสฺสานิ, โภชนตฺถายทาสิ มํ;
น ตตฺถ วิมนา โหมิ, ตุยฺหตฺถาย มหามุนิฯ
[351]
‘‘‘เนกโกฏิสหสฺสานิ, ชีวิตานิ ปริจฺจชิํ;
ภยโมกฺขํ กริสฺสนฺติ, ททามิ มม ชีวิตํฯ
[352]
‘‘‘องฺคคเต [องฺเค เอวํ (ก.)] อลงฺกาเร, วตฺเถ นานาวิเธ พหู;
อิตฺถิมณฺเฑ น คูหามิ, ตุยฺหตฺถาย มหามุนิฯ
[353]
‘‘‘ธนธญฺญปริจฺจาคํ , คามานิ นิคมานิ จ;
เขตฺตํ ปุตฺตา จ ธีตา จ, ปริจฺจตฺตา มหามุนิฯ
[354]
‘‘‘หตฺถี อสฺสา ควา จาปิ, ทาสิโย ปริจาริกา;
ตุยฺหตฺถาย มหาวีร, ปริจฺจตฺตา อสงฺขิยาฯ
[355]
‘‘‘ยํ มยฺหํ ปฏิมนฺเตสิ [ปติมนฺเตสิ (สี.)], ทานํ ทสฺสามิ ยาจเก;
วิมนํ เม น ปสฺสามิ, ททโต ทานมุตฺตมํฯ
[356]
‘‘‘นานาวิธํ พหุํ ทุกฺขํ, สํสาเร จ พหุพฺพิเธ;
ตุยฺหตฺถาย มหาวีร, อนุภุตฺตํ อสงฺขิยํฯ
[357]
‘‘‘สุขปฺปตฺตานุโมทามิ, น จ ทุกฺเขสุ ทุมฺมนา;
สพฺพตฺถ ตุลิตา โหมิ, ตุยฺหตฺถาย มหามุนิฯ
[358]
‘‘‘อนุมคฺเคน สมฺพุทฺโธ, ยํ ธมฺมํ อภินีหริ;
อนุโภตฺวา สุขํ ทุกฺขํ, ปตฺโต โพธิํ มหามุนิฯ
[359]
‘‘‘พฺรหฺมเทวญฺจ สมฺพุทฺธํ, โคตมํ โลกนายกํ;
อญฺเญสํ โลกนาถานํ, สงฺคมํ เต พหุํ มยาฯ
[360]
‘‘‘อธิการํ พหุํ มยฺหํ, ตุยฺหตฺถาย มหามุนิ;
คเวสโต พุทฺธธมฺเม, อหํ เต ปริจาริกาฯ
[361]
‘‘‘กปฺเป จ สตสหสฺเส, จตุโร จ อสงฺขิเย;
ทีปงฺกโร มหาวีโร, อุปฺปชฺชิ โลกนายโกฯ
[362]
‘‘‘ปจฺจนฺตเทสวิสเย, นิมนฺเตตฺวา ตถาคตํ;
ตสฺส อาคมนํ มคฺคํ, โสเธนฺติ ตุฏฺฐมานสาฯ
[363]
‘‘‘เตน กาเลน โส อาสิ, สุเมโธ นาม พฺราหฺมโณ;
มคฺคญฺจ ปฏิยาเทสิ, อายโต [อายตํ (สี.)] สพฺพทสฺสิโนฯ
[364]
‘‘‘เตน กาเลนหํ อาสิํ, กญฺญา พฺราหฺมณสมฺภวา;
สุมิตฺตานาม นาเมน, อุปคจฺฉิํ สมาคมํฯ
[365]
‘‘‘อฏฺฐ อุปฺปลหตฺถานิ, ปูชนตฺถาย สตฺถุโน;
อาทาย ชนสํมชฺเฌ, อทฺทสํ อิสิ มุคฺคตํฯ
[366]
‘‘‘จิรานุคตํ ทยิตํ [จิรานุปริ อาสีนํ (สี.)], อติกฺกนฺตํ มโนหรํ;
ทิสฺวา ตทา อมญฺญิสฺสํ, สผลํ ชีวิตํ มมฯ
[367]
‘‘‘ปรกฺกมํ ตํ สผลํ, อทฺทสํ อิสิโน ตทา;
ปุพฺพกมฺเมน สมฺพุทฺเธ, จิตฺตญฺจาปิ ปสีทิ เมฯ
[368]
‘‘‘ภิยฺโย จิตฺตํ ปสาเทสิํ, อิเส อุคฺคตมานเส;
เทยฺยํ อญฺญํ น ปสฺสามิ, เทมิ ปุปฺผานิ เต อิสิฯ
[369]
‘‘‘ปญฺจหตฺถา ตว โหนฺตุ, ตโย โหนฺตุ มมํ อิเส;
เตน สทฺธิํ สมา โหนฺตุ, โพธตฺถาย ตวํ อิเส’ฯ
จตุตฺถํ ภาณวารํฯ
[370]
‘‘อิสิ คเหตฺวา ปุปฺผานิ, อาคจฺฉนฺตํ มหายสํ;
ปูเชสิ ชนสํมชฺเฌ, โพธตฺถาย มหาอิสิฯ
[371]
‘‘ปสฺสิตฺวา ชนสํมชฺเฌ, ทีปงฺกโร มหามุนิ;
วิยากาสิ มหาวีโร, อิสิ มุคฺคตมานสํฯ
[372]
‘‘อปริเมยฺเย อิโต กปฺเป, ทีปงฺกโร มหามุนิ;
มม กมฺมํ วิยากาสิ, อุชุภาวํ มหามุนิฯ
[373]
‘‘‘สมจิตฺตา สมกมฺมา, สมการี ภวิสฺสติ;
ปิยา เหสฺสติ กมฺเมน, ตุยฺหตฺถาย มหาอิสิ [มหาอิเส (สฺยา.)]ฯ
[374]
‘‘‘สุทสฺสนา สุปิยา จ, มนาปา ปิยวาทินี;
ตสฺส ธมฺเมสุ ทายาทา, วิหริสฺสติ อิทฺธิกาฯ
[375]
‘‘‘ยถาปิ ภณฺฑสามุคฺคํ, อนุรกฺขติ สามิโน;
เอวํ กุสลธมฺมานํ, อนุรกฺขิสฺสเต อยํฯ
[376]
‘‘‘ตสฺส เต [ตสฺส ตํ (สฺยา.)] อนุกมฺปนฺตี, ปูรยิสฺสติ ปารมี;
สีโหว ปญฺชรํ เภตฺวา [หิตฺวา (สฺยา.), เหตฺวา (ปี.)], ปาปุณิสฺสติ โพธิยํ’ฯ
[377]
‘‘อปริเมยฺเย อิโต กปฺเป, ยํ มํ พุทฺโธ วิยากรี;
ตํ วาจํ อนุโมเทนฺตี, เอวํการี ภวิํ อหํฯ
[378]
‘‘ตสฺส กมฺมสฺส สุกตสฺส, ตตฺถ จิตฺตํ ปสาทยิํ;
เทวมนุสฺสกํ โยนิํ, อนุโภตฺวา อสงฺขิยํฯ
[379]
‘‘สุขทุกฺเขนุโภตฺวาหํ, เทเวสุ มานุเสสุ จ;
ปจฺฉิเม ภเว สมฺปตฺเต, อชายิํ สากิเย กุเลฯ
[380]
‘‘รูปวตี โภควตี, ยสสีลวตี ตโต;
สพฺพงฺคสมฺปทา โหมิ, กุเลสุ อภิสกฺกตาฯ
[381]
‘‘ลาภํ สิโลกํ สกฺการํ, โลกธมฺมสมาคมํ;
จิตฺตญฺจ ทุกฺขิตํ นตฺถิ, วสามิ อกุโตภยาฯ
[382]
‘‘วุตฺตญฺเหตํ ภควตา, รญฺโญ อนฺเตปุเร ตทา;
ขตฺติยานํ ปุเร วีร, อุปการญฺจ นิทฺทิสิฯ
[383]
‘‘อุปการา จ ยา นารี, ยา จ นารี สุเข ทุเข;
อตฺถกฺขายี จ ยา นารี, ยา จ นารีนุกมฺปิกาฯ
[384]
‘‘ปญฺจโกฏิสตา พุทฺธา, นวโกฏิสตานิ จ;
เอเตสํ เทวเทวานํ, มหาทานํ ปวตฺตยิํฯ
[385]
‘‘อธิการํ มหา [สทา (ปี.) เอวมุปริปิ] มยฺหํ, ธมฺมราช สุโณหิ เม;
เอกาทสโกฏิสตา, พุทฺธา ทฺวาทส โกฏิโย [โหนฺติ โลกคฺคนายกา (สี. สฺยา.), ปณฺณาโกฏิสตานิ จ (ปี.)]ฯ
[386]
‘‘เอเตสํ เทวเทวานํ, มหาทานํ ปวตฺตยิํ;
อธิการํ มหา มยฺหํ, ธมฺมราช สุโณหิ เมฯ
[387]
‘‘‘วีสโกฏิสตา พุทฺธา, ติํสโกฏิสตานิ จ;
เอเตสํ เทวเทวานํ, มหาทานํ ปวตฺตยิํฯ
[388]
‘‘‘อธิการํ มหา มยฺหํ, ธมฺมราช สุโณหิ เม;
จตฺตาลีสโกฏิสตา, ปญฺญาส โกฏิสตานิ จฯ
[389]
‘‘‘เอเตสํ เทวเทวานํ, มหาทานํ ปวตฺตยิํ;
อธิการํ มหา มยฺหํ, ธมฺมราช สุโณหิ เมฯ
[390]
‘‘‘สฏฺฐิโกฏิสตา พุทฺธา, สตฺตติโกฏิสตานิ จ;
เอเตสํ เทวเทวานํ, มหาทานํ ปวตฺตยิํฯ
[391]
‘‘‘อธิการํ มหา มยฺหํ, ธมฺมราช สุโณหิ เม;
อสีติโกฏิสตา พุทฺธา, นวุติโกฏิสตานิ จฯ
[392]
‘‘‘เอเตสํ เทวเทวานํ, มหาทานํ ปวตฺตยิํ;
อธิการํ มหา มยฺหํ, ธมฺมราช สุโณหิ เมฯ
[393]
‘‘‘โกฏิสตสหสฺสานิ, โหนฺติ โลกคฺคนายกา;
เอเตสํ เทวเทวานํ, มหาทานํ ปวตฺตยิํฯ
[394]
‘‘‘อธิการํ มหา มยฺหํ, ธมฺมราช สุโณหิ เม;
นวโกฏิสหสฺสานิ, อปเร โลกนายกาฯ
[395]
‘‘‘เอเตสํ เทวเทวานํ, มหาทานํ ปวตฺตยิํ;
อธิการํ มหา มยฺหํ, ธมฺมราช สุโณหิ เมฯ
[396]
‘‘‘โกฏิสตสหสฺสานิ, ปญฺจาสีติมเหสินํ;
ปญฺจาสีติโกฏิสตา, สตฺตติํสา จ โกฏิโยฯ
[397]
‘‘‘เอเตสํ เทวเทวานํ, มหาทานํ ปวตฺตยิํ;
อธิการํ มหา มยฺหํ, ธมฺมราช สุโณหิ เมฯ
[398]
‘‘‘ปจฺเจกพุทฺธา วีตราคา [ธุตราคา (ปี. ก.)], อฏฺฐฏฺฐมกโกฏิโย [อฏฺฐมตฺตก… (สี.), อฏฺฐมตฺถก… (สฺยา.)];
อธิการํ มหา มยฺหํ, ธมฺมราช สุโณหิ เมฯ
[399]
‘‘‘ขีณาสวา วีตมลา, อสงฺขิยา พุทฺธสาวกา;
อธิการํ มหา มยฺหํ, ธมฺมราช สุโณหิ เมฯ
[400]
‘‘‘เอวํ ธมฺเม สุจิณฺณานํ, สทา ธมฺมสฺส จารินํ;
ธมฺมจารี สุขํ เสติ, อสฺมิํ โลเก ปรมฺหิ จฯ
[401]
‘‘‘ธมฺมํ จเร สุจริตํ, น นํ ทุจฺจริตํ จเร;
ธมฺมจารี สุขํ เสติ, อสฺมิํ โลเก ปรมฺหิ จฯ
[402]
‘‘‘นิพฺพินฺทิตฺวาน สํสาเร, ปพฺพชิํ อนคาริยํ;
สหสฺสปริวาเรน, ปพฺพชิตฺวา อกิญฺจนาฯ
[403]
‘‘‘อคารํ วิชหิตฺวาน, ปพฺพชิํ อนคาริยํ;
อฑฺฒมาเส อสมฺปตฺเต, จตุสจฺจมปาปุณิํฯ
[404]
‘‘‘จีวรํ ปิณฺฑปาตญฺจ, ปจฺจยํ สยนาสนํ;
อุปเนนฺติ พหู ชนา, สาคเรเยว อูมิโยฯ
[405]
‘‘‘กิเลสา ฌาปิตา มยฺหํ…เป.… วิหรามิ อนาสวาฯ
[406]
‘‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[407]
‘‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’ฯ
[408]
‘‘เอวํ พหุวิธํ ทุกฺขํ, สมฺปตฺตี จ พหุพฺพิธา;
วิสุทฺธิภาวํ สมฺปตฺตา, ลภามิ สพฺพสมฺปทาฯ
[409]
‘‘ยา ททาติ สกตฺตานํ, ปุญฺญตฺถาย มเหสิโน;
สหายสมฺปทา โหนฺติ, นิพฺพานปทมสงฺขตํฯ
[410]
‘‘ปริกฺขีณํ อตีตญฺจ, ปจฺจุปฺปนฺนํ อนาคตํ;
สพฺพกมฺมํ มมํ ขีณํ, ปาเท วนฺทามิ จกฺขุม’’ฯ
อิตฺถํ สุทํ ยโสธรา ภิกฺขุนี ภควโต สมฺมุขา อิมา คาถาโย อภาสิตฺถาติฯ
ยโสธราเถริยาปทานํ อฏฺฐมํฯ
9. ยโสธราปมุขทสภิกฺขุนีสหสฺสอปทานํ
[411]
‘‘กปฺเป จ สตสหสฺเส, จตุโร จ อสงฺขิเย;
ทีปงฺกโร นาม ชิโน, อุปฺปชฺชิ โลกนายโกฯ
[412]
‘‘ทีปงฺกโร มหาวีโร, วิยากาสิ วินายโก;
สุเมธญฺจ สุมิตฺตญฺจ, สมานสุขทุกฺขตํฯ
[413]
‘‘สเทวกญฺจ ปสฺสนฺโต, วิจรนฺโต สเทวกํ;
เตสํ ปกิตฺตเน อมฺเห, อุปคมฺม สมาคมํฯ
[414]
‘‘อมฺหํ สพฺพปติ โหหิ [สพฺพา ปตี โหนฺติ (ปี.)], อนาคตสมาคเม;
สพฺพาว ตุยฺหํ ภริยา, มนาปา ปิยวาทิกาฯ
[415]
‘‘ทานํ สีลมยํ สพฺพํ, ภาวนา จ สุภาวิตา;
ทีฆรตฺตญฺจ โน [ทีฆรตฺตมิทํ (สฺยา. ก.)] สพฺพํ, ปริจฺจตฺตํ มหามุเนฯ
[416]
‘‘คนฺธํ วิเลปนํ มาลํ, ทีปญฺจ รตนามยํ;
ยํกิญฺจิ ปตฺถิตํ สพฺพํ, ปริจฺจตฺตํ มหามุนิฯ
[417]
‘‘อญฺญํ วาปิ กตํ กมฺมํ, ปริโภคญฺจ มานุสํ;
ทีฆรตฺตญฺหิ โน สพฺพํ, ปริจฺจตฺตํ มหามุนิฯ
[418]
‘‘อเนกชาติสํสารํ, พหุํ ปุญฺญมฺปิ โน กตํ;
อิสฺสรมนุโภตฺวาน, สํสริตฺวา ภวาภเวฯ
[419]