‘‘ตมฺหิ กาเล สิขี พุทฺโธ, เอโก อทุติโย อหุ;

มมสฺสมํ อุปาคจฺฉิ, ชานนฺโต สพฺพกาลิกํฯ

[10]

‘‘สกํ จิตฺตํ ปสาเทตฺวา, วนฺทิตฺวาน จ สุพฺพตํ;

อุโภ หตฺเถหิ ปคฺคยฺห, โกลํ พุทฺธสฺสทาสหํฯ

[11]

‘‘เอกติํเส อิโต กปฺเป, ยํ ผลมททิํ ตทา;

ทุคฺคติํ นาภิชานามิ, โกลทานสฺสิทํ ผลํฯ

[12]

‘‘กิเลสา ฌาปิตา มยฺหํ…เป.… วิหรามิ อนาสโวฯ

[13]

‘‘สฺวาคตํ วต เม อาสิ…เป.… กตํ พุทฺธสฺส สาสนํฯ

[14]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา โกลทายโก เถโร อิมา คาถาโย

อภาสิตฺถาติฯ

โกลทายกตฺเถรสฺสาปทานํ ทุติยํฯ

3. พิลฺลิยตฺเถรอปทานํ

[15]

‘‘จนฺทภาคานทีตีเร , อสฺสโม สุกโต มม;

พิลฺลรุกฺเขหิ [เพลุวรุกฺเขหิ (สฺยา.)] อากิณฺโณ, นานาทุมนิเสวิโตฯ

[16]

‘‘สุคนฺธํ เพลุวํ ทิสฺวา, พุทฺธเสฏฺฐมนุสฺสริํ;

ขาริภารํ ปูรยิตฺวา, ตุฏฺโฐ สํวิคฺคมานโสฯ

[17]

‘‘กกุสนฺธํ อุปาคมฺม, พิลฺลปกฺกมทาสหํ;

ปุญฺญกฺเขตฺตสฺส วีรสฺส, วิปฺปสนฺเนน เจตสาฯ

[18]

‘‘อิมสฺมิํเยว กปฺปสฺมิํ, ยํ ผลมททิํ ตทา;

ทุคฺคติํ นาภิชานามิ, ผลทานสฺสิทํ ผลํฯ

[19]

‘‘กิเลสา ฌาปิตา มยฺหํ…เป.… วิหรามิ อนาสโวฯ

[20]

‘‘สฺวาคตํ วต เม อาสิ…เป.… กตํ พุทฺธสฺส สาสนํฯ

[21]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา พิลฺลิโย เถโร อิมา คาถาโย

อภาสิตฺถาติฯ

พิลฺลิยตฺเถรสฺสาปทานํ ตติยํฯ

4. ภลฺลาตทายกตฺเถรอปทานํ

[22]

‘‘สุวณฺณวณฺณํ สมฺพุทฺธํ, ทฺวตฺติํสวรลกฺขณํ;

วิปินคฺเคน [ปวนคฺเคน (สี. สฺยา. ปี.)] คจฺฉนฺตํ, สาลราชํว ผุลฺลิตํฯ

[23]

‘‘ติณตฺถรํ ปญฺญาเปตฺวา, พุทฺธเสฏฺฐํ อยาจหํ;

‘อนุกมฺปตุ มํ พุทฺโธ, ภิกฺขํ อิจฺฉามิ ทาตเว’ฯ

[24]

‘‘อนุกมฺปโก การุณิโก, อตฺถทสฺสี มหายโส;

มม สงฺกปฺปมญฺญาย, โอรูหิ มม อสฺสเมฯ

[25]

‘‘โอโรหิตฺวาน สมฺพุทฺโธ, นิสีทิ ปณฺณสนฺถเร;

ภลฺลาตกํ คเหตฺวาน, พุทฺธเสฏฺฐสฺสทาสหํฯ

[26]

‘‘มม นิชฺฌายมานสฺส, ปริภุญฺชิ ตทา ชิโน;

ตตฺถ จิตฺตํ ปสาเทตฺวา, อภิวนฺทิํ ตทา ชินํฯ

[27]

‘‘อฏฺฐารเส กปฺปสเต, ยํ ผลมททิํ ตทา;

ทุคฺคติํ นาภิชานามิ, ผลทานสฺสิทํ ผลํฯ

[28]

‘‘กิเลสา ฌาปิตา มยฺหํ…เป.… วิหรามิ อนาสโวฯ

[29]

‘‘สฺวาคตํ วต เม อาสิ…เป.… กตํ พุทฺธสฺส สาสนํฯ

[30]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ภลฺลาตทายโก เถโร อิมา คาถาโย

อภาสิตฺถาติฯ

ภลฺลาตทายกตฺเถรสฺสาปทานํ จตุตฺถํฯ