‘‘ตโต โตรณวตฺถุสฺมิํ, รญฺญา โกสลสามินา;
ปุจฺฉิตา นิปุเณ ปญฺเห, พฺยากโรนฺตี ยถาตถํฯ
[379]
‘‘ตทา ส ราชา สุคตํ, อุปสงฺกมฺม ปุจฺฉถ;
ตเถว พุทฺโธ พฺยากาสิ, ยถา เต พฺยากตา มยาฯ
[380]
‘‘ชิโน ตสฺมิํ คุเณ ตุฏฺโฐ, เอตทคฺเค ฐเปสิ มํ;
มหาปญฺญานมคฺคาติ, ภิกฺขุนีนํ นรุตฺตโมฯ
[381]
‘‘กิเลสา ฌาปิตา มยฺหํ…เป.… วิหรามิ อนาสวาฯ
[382]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[383]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ เขมา ภิกฺขุนี อิมา คาถาโย อภาสิตฺถาติฯ
เขมาเถริยาปทานํ อฏฺฐมํฯ
9. อุปฺปลวณฺณาเถรีอปทานํ
[384]
‘‘ภิกฺขุนี อุปฺปลวณฺณา, อิทฺธิยา ปารมิํ คตา;
วนฺทิตฺวา สตฺถุโน ปาเท, อิทํ วจนมพฺรวิฯ
[385]
‘‘‘นิตฺถิณฺณา ชาติสํสารํ [ชาติสํสารา (ปี.)], ปตฺตาหํ อจลํ ปทํ;
สพฺพทุกฺขํ มยา ขีณํ, อาโรเจมิ มหามุนิฯ
[386]
‘‘‘ยาวตา ปริสา อตฺถิ, ปสนฺนา ชินสาสเน;
ยสฺสา จ เมปราโธตฺถิ, ขมนฺตุ ชินสมฺมุขาฯ
[387]
‘‘‘สํสาเร สํสรนฺติยา [สํสรนฺตา เม (สฺยา.)], ขลิตํ เม สเจ ภเว;
อาโรเจมิ มหาวีร, อปราธํ ขมสฺสุ ตํ [เม (สฺยา.)]ฯ
[388]
‘‘‘อิทฺธิญฺจาปิ นิทสฺเสหิ, มม สาสนการิเก;
จตสฺโส ปริสา อชฺช, กงฺขํ ฉินฺทาหิ ยาวตาฯ
[389]
‘‘‘ธีตา ตุยฺหํ มหาวีร, ปญฺญวนฺต ชุตินฺธร;
พหุญฺจ ทุกฺกรํ กมฺมํ, กตํ เม อติทุกฺกรํฯ
[390]
‘‘‘อุปฺปลสฺเสว เม วณฺโณ, นาเมนุปฺปลนามิกา;
สาวิกา เต มหาวีร, ปาเท วนฺทามิ จกฺขุมฯ
[391]
‘‘‘ราหุโล จ อหญฺเจว, เนกชาติสเต พหู;
เอกสฺมิํ สมฺภเว ชาตา, สมานฉนฺทมานสาฯ
[392]
‘‘‘นิพฺพตฺติ เอกโต โหติ, ชาติยาปิ จ เอกโต [ชาตีสุ พหุโส มม (สี.)];
ปจฺฉิเม ภเว สมฺปตฺเต, อุโภปิ นานาสมฺภวาฯ
[393]
‘‘‘ปุตฺโต จ ราหุโล นาม, ธีตา อุปฺปลสวฺหยา;
ปสฺส วีร มมํ อิทฺธิํ, พลํ ทสฺเสมิ สตฺถุโนฯ
[394]
‘‘‘มหาสมุทฺเท จตุโร, ปกฺขิปิ หตฺถปาติยํ;
เตลํ หตฺถคตญฺเจว, ขิฑฺโฑ [เวชฺโช (สี. ปี.)] โกมารโก ยถาฯ
[395]
‘‘‘อุพฺพตฺตยิตฺวา ปถวิํ, ปกฺขิปิ หตฺถปาติยํ;
จิตฺตํ มุญฺชํ ยถา นาม, ลุญฺจิ โกมารโก ยุวาฯ
[396]
‘‘‘จกฺกวาฬสมํ ปาณิํ, ฉาทยิตฺวาน มตฺถเก;
วสฺสาเปตฺวาน ผุสิตํ, นานาวณฺณํ ปุนปฺปุนํฯ
[397]
‘‘‘ภูมิํ อุทุกฺขลํ กตฺวา, ธญฺญํ กตฺวาน สกฺขรํ;
สิเนรุํ มุสลํ กตฺวา, มทฺทิ โกมาริกา ยถาฯ
[398]
‘‘‘ธีตาหํ พุทฺธเสฏฺฐสฺส, นาเมนุปฺปลสวฺหยา;
อภิญฺญาสุ วสีภูตา, ตว สาสนการิกาฯ
[399]
‘‘‘นานาวิกุพฺพนํ กตฺวา, ทสฺเสตฺวา โลกนายกํ;
นามโคตฺตญฺจ สาเวตฺวา [ปกาเสตฺวา (สฺยา.)], ปาเท วนฺทามิ จกฺขุมฯ
[400]
‘‘‘อิทฺธีสุ จ วสี โหมิ, ทิพฺพาย โสตธาตุยา;
เจโตปริยญาณสฺส, วสี โหมิ มหามุเนฯ
[401]
‘‘‘ปุพฺเพนิวาสํ ชานามิ, ทิพฺพจกฺขุ วิโสธิตํ;
สพฺพาสวปริกฺขีณา, นตฺถิ ทานิ ปุนพฺภโวฯ
[402]
‘‘‘อตฺถธมฺมนิรุตฺตีสุ, ปฏิภาเน ตเถว จ;
ญาณํ เม วิมลํ [วิปุลํ (สฺยา.)] สุทฺธํ, สภาเวน มเหสิโนฯ
[403]
‘‘‘ปุริมานํ ชินคฺคานํ, สงฺคมํ เต นิทสฺสิตํ [สมฺมุขา จ ปรมฺมุขา (สี.)];
อธิการํ พหุํ มยฺหํ, ตุยฺหตฺถาย มหามุนิฯ
[404]
‘‘‘ยํ มยา ปูริตํ กมฺมํ, กุสลํ สร เม มุนิ;
ตวตฺถาย มหาวีร, ปุญฺญํ อุปจิตํ มยาฯ
[405]
‘‘‘อภพฺพฏฺฐาเน วชฺเชตฺวา, วารยนฺตี [ปริวชฺชนฺติ (สี.), ปริปาเจนฺโต (สฺยา.)] อนาจรํ;
ตวตฺถาย มหาวีร, จตฺตํ เม ชีวิตุตฺตมํฯ
[406]
‘‘‘ทสโกฏิสหสฺสานิ , อทาสิํ มม ชีวิตํ;
ปริจฺจตฺตา จ เม โหมิ, ตวตฺถาย มหามุนิฯ
[407]
‘‘‘ตทาติวิมฺหิตา สพฺพา, สิรสาว กตญฺชลี;
อโวจยฺเย กถํ อาสิ, อตุลิทฺธิปรกฺกมา’ฯ
[408]
‘‘สตสหสฺสิโต กปฺเป, นาคกญฺญา อหํ ตทา;
วิมลา นาม นาเมน, กญฺญานํ สาธุสมฺมตาฯ
[409]
‘‘มโหรโค มหานาโค, ปสนฺโน ชินสาสเน;
ปทุมุตฺตรํ มหาเตชํ, นิมนฺเตสิ สสาวกํฯ
[410]
‘‘รตนมยํ มณฺฑปํ, ปลฺลงฺกํ รตนามยํ;
รตนํ วาลุกากิณฺณํ, อุปโภคํ รตนามยํฯ
[411]
‘‘มคฺคญฺจ ปฏิยาเทสิ, รตนทฺธชภูสิตํ;
ปจฺจุคฺคนฺตฺวาน สมฺพุทฺธํ, วชฺชนฺโต ตูริเยหิ โสฯ
[412]
‘‘ปริสาหิ จ จตูหิ [ปริสาหิ จตูหิ โส (สี.), ปริสาหิ จตสฺโส หิ (ปี.)], ปริวุโต [สหิโต (สี.), ผรเต (สฺยา.), ปเรโต (ปี.)] โลกนายโก;
มโหรคสฺส ภวเน, นิสีทิ ปรมาสเนฯ
[413]
‘‘อนฺนํ ปานํ ขาทนียํ, โภชนญฺจ มหารหํ;
วรํ วรญฺจ ปาทาสิ, นาคราชา มหายสํฯ
[414]
‘‘ภุญฺชิตฺวาน สมฺพุทฺโธ, ปตฺตํ โธวิตฺวา โยนิโส;
อนุโมทนียํกาสิ, นาคกญฺญา มหิทฺธิกาฯ
[415]
‘‘สพฺพญฺญุํ ผุลฺลิตํ ทิสฺวา, นาคกญฺญา มหายสํ;
ปสนฺนํ สตฺถุโน จิตฺตํ, สุนิพนฺธญฺจ มานสํฯ
[416]
‘‘มมญฺจ จิตฺตมญฺญาย, ชลชุตฺตมนามโก;
ตสฺมิํ ขเณ มหาวีโร, ภิกฺขุนิํ ทสฺสยิทฺธิยาฯ
[417]
‘‘อิทฺธี อเนกา ทสฺเสสิ, ภิกฺขุนี สา วิสารทา;
ปโมทิตา เวทชาตา, สตฺถารํ อิทมพฺรวิ [เอตทพฺรวิํ (สฺยา. ปี.)]ฯ
[418]
‘‘‘อทฺทสาหํ อิมํ อิทฺธิํ, สุมนํ อิตรายปิ;
กถํ อโหสิ สา วีร, อิทฺธิยา สุวิสารทา’ฯ
[419]
‘‘‘โอรสา มุขโต ชาตา, ธีตา มม มหิทฺธิกา;
มมานุสาสนิกรา, อิทฺธิยา สุวิสารทา’ฯ
[420]
‘‘พุทฺธสฺส วจนํ สุตฺวา, เอวํ ปตฺเถสหํ ตทา [ตุฏฺฐา เอวํ อโวจหํ (สฺยา.), เอวมโหสหํ ตทา (ก.)];
อหมฺปิ ตาทิสา โหมิ, อิทฺธิยา สุวิสารทาฯ
[421]
‘‘ปโมทิตาหํ สุมนา, ปตฺเถ อุตฺตมมานสา [ปตฺตอุตฺตมมานสา (สี. สฺยา. ปี.)];
อนาคตมฺหิ อทฺธาเน, อีทิสา โหมิ นายกฯ
[422]
‘‘มณิมยมฺหิ ปลฺลงฺเก, มณฺฑปมฺหิ ปภสฺสเร;
อนฺนปาเนน ตปฺเปตฺวา, สสงฺฆํ โลกนายกํฯ
[423]
‘‘นาคานํ ปวรํ ปุปฺผํ, อรุณํ นาม อุปฺปลํ;
วณฺณํ เม อีทิสํ โหตุ, ปูเชสิํ โลกนายกํฯ
[424]
‘‘เตน กมฺเมน สุกเตน, เจตนาปณิธีหิ จ;
ชหิตฺวา มานุสํ เทหํ, ตาวติํสมคจฺฉหํฯ
[425]
‘‘ตโต จุตาหํ มนุเช, อุปปนฺนา สยมฺภุโน;
อุปฺปเลหิ ปฏิจฺฉนฺนํ, ปิณฺฑปาตมทาสหํฯ
[426]
‘‘เอกนวุติโต กปฺเป, วิปสฺสี นาม นายโก;
อุปฺปชฺชิ จารุทสฺสโน, สพฺพธมฺเมสุ จกฺขุมาฯ
[427]
‘‘เสฏฺฐิธีตา ตทา หุตฺวา, พาราณสิปุรุตฺตเม;
นิมนฺเตตฺวาน สมฺพุทฺธํ, สสงฺฆํ โลกนายกํฯ
[428]
‘‘มหาทานํ ททิตฺวาน, อุปฺปเลหิ วินายกํ;
ปูชยิตฺวา เจตสาว [จ เตเหว (สฺยา. ปี.)], วณฺณโสภํ อปตฺถยิํฯ
[429]
‘‘อิมมฺหิ ภทฺทเก กปฺเป, พฺรหฺมพนฺธุ มหายโส;
กสฺสโป นาม โคตฺเตน, อุปฺปชฺชิ วทตํ วโรฯ
[430]
‘‘อุปฏฺฐาโก มเหสิสฺส, ตทา อาสิ นริสฺสโร;
กาสิราชา กิกี นาม, พาราณสิปุรุตฺตเมฯ
[431]
‘‘ตสฺสาสิํ ทุติยา ธีตา, สมณคุตฺตสวฺหยา;
ธมฺมํ สุตฺวา ชินคฺคสฺส, ปพฺพชฺชํ สมโรจยิํฯ
[432]
‘‘อนุชานิ น โน ตาโต, อคาเรว ตทา มยํ;
วีสวสฺสสหสฺสานิ, วิจริมฺห อตนฺทิตาฯ
[433]
‘‘โกมาริพฺรหฺมจริยํ, ราชกญฺญา สุเขธิตา;
พุทฺโธปฏฺฐานนิรตา, มุทิตา สตฺตธีตโรฯ
[434]
‘‘สมณี สมณคุตฺตา จ, ภิกฺขุนี ภิกฺขุทายิกา [ภิกฺขุทาสิกา (สี. สฺยา.)];
ธมฺมา เจว สุธมฺมา จ, สตฺตมี สงฺฆทายิกา [สํฆทาสิกา (สี. สฺยา.)]ฯ
[435]
‘‘อหํ เขมา จ สปฺปญฺญา, ปฏาจารา จ กุณฺฑลา;
กิสาโคตมี ธมฺมทินฺนา, วิสาขา โหติ สตฺตมีฯ
[436]
‘‘เตหิ กมฺเมหิ สุกเตหิ, เจตนาปณิธีหิ จ;
ชหิตฺวา มานุสํ เทหํ, ตาวติํสมคจฺฉหํฯ
[437]
‘‘ตโต จุตา มนุสฺเสสุ, อุปปนฺนา มหากุเล;
ปีตํ มฏฺฐํ วรํ ทุสฺสํ, อทํ อรหโต อหํฯ
[438]
‘‘ตโต จุตาริฏฺฐปุเร, ชาตา วิปฺปกุเล อหํ;
ธีตา ติริฏิวจฺฉสฺส, อุมฺมาทนฺตี มโนหราฯ
[439]
‘‘ตโต จุตา ชนปเท, กุเล อญฺญตเร อหํ;
ปสูตา นาติผีตมฺหิ, สาลิํ โคเปมหํ ตทาฯ
[440]
‘‘ทิสฺวา ปจฺเจกสมฺพุทฺธํ, ปญฺจลาชาสตานิหํ;
ทตฺวา ปทุมจฺฉนฺนานิ, ปญฺจ ปุตฺตสตานิหํฯ
[441]
‘‘ปตฺถยิํ เตปิ ปตฺเถสุํ, มธุํ ทตฺวา สยมฺภุโน;
ตโต จุตา อรญฺเญหํ, อชายิํ ปทุโมทเรฯ
[442]
‘‘กาสิรญฺโญ มเหสีหํ, หุตฺวา สกฺกตปูชิตา;
อชนิํ ราชปุตฺตานํ, อนูนํ สตปญฺจกํฯ
[443]
‘‘ยทา เต โยพฺพนปฺปตฺตา, กีฬนฺตา ชลกีฬิตํ;
ทิสฺวา โอปตฺตปทุมํ, อาสุํ ปจฺเจกนายกาฯ
[444]
‘‘สาหํ เตหิ วินาภูตา, สุตวีเรหิ โสกินี [สุตวเรหิ โสกินี (สี. สฺยา.)];
จุตา อิสิคิลิปสฺเส, คามกมฺหิ อชายิหํฯ
[445]
‘‘ยทา พุทฺธา สุตมตี, สุตานํ ภตฺตุโนปิ จ [กสตํ ตทา (สี.), อตฺตโนปิ จ (สฺยา.)];
ยาคุํ อาทาย คจฺฉนฺตี, อฏฺฐ ปจฺเจกนายเกฯ
[446]
‘‘ภิกฺขาย คามํ คจฺฉนฺเต, ทิสฺวา ปุตฺเต อนุสฺสริํ;
ขีรธารา วินิคฺคจฺฉิ, ตทา เม ปุตฺตเปมสาฯ
[447]
‘‘ตโต เตสํ อทํ ยาคุํ, ปสนฺนา เสหิ ปาณิภิ;
ตโต จุตาหํ ติทสํ, นนฺทนํ อุปปชฺชหํฯ
[448]
‘‘อนุโภตฺวา สุขํ ทุกฺขํ, สํสริตฺวา ภวาภเว;
ตวตฺถาย มหาวีร, ปริจฺจตฺตญฺจ ชีวิตํฯ
[449]
‘‘เอวํ พหุวิธํ ทุกฺขํ, สมฺปตฺตี จ พหุพฺพิธา;
ปจฺฉิเม ภเว สมฺปตฺเต, ชาตา สาวตฺถิยํ ปุเรฯ
[450]
‘‘มหาธนเสฏฺฐิกุเล, สุขิเต สชฺชิเต ตถา;
นานารตนปชฺโชเต, สพฺพกามสมิทฺธิเนฯ
[451]
‘‘สกฺกตา ปูชิตา เจว, มานิตาปจิตา ตถา;
รูปสีริมนุปฺปตฺตา [รูปโสภคฺคสมฺปนฺนา (สี.)], กุเลสุ อติสกฺกตา [อภิสมฺมตา (สี.)]ฯ
[452]
‘‘อตีว ปตฺถิตา จาสิํ, รูปโภคสิรีหิ จ;
ปตฺถิตา เสฏฺฐิปุตฺเตหิ, อเนเกหิ สเตหิปิฯ
[453]
‘‘อคารํ ปชหิตฺวาน, ปพฺพชิํ อนคาริยํ;
อฑฺฒมาเส อสมฺปตฺเต, จตุสจฺจมปาปุณิํฯ
[454]
‘‘อิทฺธิยา อภินิมฺมิตฺวา, จตุรสฺสํ รถํ อหํ;
พุทฺธสฺส ปาเท วนฺทิสฺสํ, โลกนาถสฺส ตาทิโนฯ
[455]
‘‘‘สุปุปฺผิตคฺคํ อุปคมฺม ปาทปํ [ภิกฺขุนี (สี. ปี. ก.) เถรีคา. 230], เอกา ตุวํ ติฏฺฐสิ สาลมูเล;
น จาปิ เต ทุติโย อตฺถิ โกจิ [น จตฺถิ เต ทุติยา วณฺณธาตุ (สี. ปี. ก.)], พาเล น ตฺวํ ภายสิ ธุตฺตกานํ’ฯ
[456]
‘‘‘สตํ สหสฺสานิปิ ธุตฺตกานํ [สหสฺสานมฺปิ ธุตฺตกานํ (ปี.) เถรีคา. 231], สมาคตา เอทิสกา ภเวยฺยุํ;
โลมํ น อิญฺเช น สมฺปเวเธ, กิํ เม ตุวํ มาร กริสฺสเสโก [น มาร ภายามิ ตเวกิกาปิ (สี. ก.) … ตเมกิกาสิํ (ปี.)]ฯ
[457]
‘‘‘เอสา อนฺตรธายามิ, กุจฺฉิํ วา ปวิสามิ เต;
ภมุกนฺตริกายมฺปิ, ติฏฺฐนฺติํ มํ น ทกฺขสิฯ
[458]
‘‘‘จิตฺตสฺมิํ วสีภูตามฺหิ, อิทฺธิปาทา สุภาวิตา;
สพฺพพนฺธนมุตฺตามฺหิ, น ตํ ภายามิ อาวุโสฯ
[459]
‘‘‘สตฺติสูลูปมา กามา, ขนฺธาสํ อธิกุฏฺฏนา;
ยํ ตฺวํ กามรติํ พฺรูสิ, อรตี ทานิ สา มมฯ
[460]
‘‘‘สพฺพตฺถ วิหตา นนฺที, ตโมขนฺโธ ปทาลิโต;
เอวํ ชานาหิ ปาปิม, นิหโต ตฺวมสิ อนฺตก’ฯ
[461]
‘‘ชิโน ตมฺหิ คุเณ ตุฏฺโฐ, เอตทคฺเค ฐเปสิ มํ;
อคฺคา อิทฺธิมตีนนฺติ, ปริสาสุ วินายโกฯ
[462]
‘‘ปริจิณฺโณ มยา สตฺถา, กตํ พุทฺธสฺส สาสนํ;
โอหิโต ครุโก ภาโร, ภวเนตฺติ สมูหตาฯ
[463]
‘‘ยสฺสตฺถาย ปพฺพชิตา, อคารสฺมานคาริยํ;
โส เม อตฺโถ อนุปฺปตฺโต, สพฺพสํโยชนกฺขโยฯ
[464]
‘‘จีวรํ ปิณฺฑปาตญฺจ, ปจฺจยํ สยนาสนํ;
ขเณน อุปนาเมนฺติ, สหสฺสานิ สมนฺตโตฯ
[465]
‘‘กิเลสา ฌาปิตา มยฺหํ…เป.… วิหรามิ อนาสวา;
[466]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[467]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อุปฺปลวณฺณา ภิกฺขุนี อิมา คาถาโย อภาสิตฺถาติฯ
อุปฺปลวณฺณาเถริยาปทานํ นวมํฯ
10. ปฏาจาราเถรีอปทานํ
[468]
‘‘ปทุมุตฺตโร นาม ชิโน, สพฺพธมฺมาน ปารคู;
อิโต สตสหสฺสมฺหิ, กปฺเป อุปฺปชฺชิ นายโกฯ
[469]
‘‘ตทาหํ หํสวติยํ, ชาตา เสฏฺฐิกุเล อหุํ;
นานารตนปชฺโชเต, มหาสุขสมปฺปิตาฯ
[470]
‘‘อุเปตฺวา ตํ มหาวีรํ, อสฺโสสิํ ธมฺมเทสนํ;
ตโต ชาตปสาทาหํ, อุเปสิํ สรณํ ชินํฯ
[471]
‘‘ตโต วินยธารีนํ, อคฺคํ วณฺเณสิ นายโก;
ภิกฺขุนิํ ลชฺชินิํ ตาทิํ, กปฺปากปฺปวิสารทํฯ
[472]
‘‘ตทา มุทิตจิตฺตาหํ, ตํ ฐานมภิกงฺขินี;
นิมนฺเตตฺวา ทสพลํ, สสงฺฆํ โลกนายกํฯ
[473]
‘‘โภชยิตฺวาน สตฺตาหํ, ททิตฺวาว ติจีวรํ [ททิตฺวา ปตฺตจีวรํ (สฺยา.)];
นิปจฺจ สิรสา ปาเท, อิทํ วจนมพฺรวิํฯ
[474]
‘‘‘ยา ตยา วณฺณิตา วีร, อิโต อฏฺฐมเก มุนิ;
ตาทิสาหํ ภวิสฺสามิ, ยทิ สิชฺฌติ นายก’ฯ
[475]
‘‘ตทา อโวจ มํ สตฺถา, ‘ภทฺเท มา ภายิ อสฺสส;
อนาคตมฺหิ อทฺธาเน, ลจฺฉเส ตํ มโนรถํฯ
[476]