‘‘‘น โสจิยา ปเรสํ สา, ติณฺณสํสารสาครา;
ปริวชฺชิตสนฺตาปา, สีติภูตา สุนิพฺพุตาฯ
[282]
‘‘‘ปณฺฑิตาสิ มหาปญฺญา, ปุถุปญฺญา ตเถว จ;
รตฺตญฺญู ภิกฺขุนีนํ สา, เอวํ ธาเรถ ภิกฺขโวฯ
[283]
‘‘‘อิทฺธีสุ จ วสี อาสิ, ทิพฺพาย โสตธาตุยา;
เจโตปริยญาณสฺส, วสี อาสิ จ โคตมีฯ
[284]
‘‘‘ปุพฺเพนิวาสมญฺญาสิ, ทิพฺพจกฺขุ วิโสธิตํ;
สพฺพาสวปริกฺขีณา, นตฺถิ ตสฺสา ปุนพฺภโวฯ
[285]
‘‘‘อตฺถธมฺมนิรุตฺตีสุ, ปฏิภาเน ตเถว จ;
ปริสุทฺธํ อหุ ญาณํ, ตสฺมา โสจนิยา น สาฯ
[286]
‘‘‘อโยฆนหตสฺเสว, ชลโต ชาตเวทสฺส;
อนุปุพฺพูปสนฺตสฺส, ยถา น ญายเต คติฯ
[287]
‘‘‘เอวํ สมฺมา วิมุตฺตานํ, กามพนฺโธฆตารินํ;
ปญฺญาเปตุํ คติ นตฺถิ, ปตฺตานํ อจลํ สุขํฯ
[288]
‘‘‘อตฺตทีปา ตโต โหถ, สติปฏฺฐานโคจรา;
ภาเวตฺวา สตฺตโพชฺฌงฺเค, ทุกฺขสฺสนฺตํ กริสฺสถ’’’ฯ
อิตฺถํ สุทํ มหาปชาปติโคตมี อิมา คาถาโย อภาสิตฺถาติฯ
มหาปชาปติโคตมีเถริยาปทานํ สตฺตมํฯ
8. เขมาเถรีอปทานํ
[289]
‘‘ปทุมุตฺตโร นาม ชิโน, สพฺพธมฺเมสุ จกฺขุมา;
อิโต สตสหสฺสมฺหิ, กปฺเป อุปฺปชฺชิ นายโกฯ
[290]
‘‘ตทาหํ หํสวติยํ, ชาตา เสฏฺฐิกุเล อหุํ [อหุ (สฺยา.)];
นานารตนปชฺโชเต, มหาสุขสมปฺปิตาฯ
[291]
‘‘อุเปตฺวา ตํ มหาวีรํ, อสฺโสสิํ ธมฺมเทสนํ;
ตโต ชาตปฺปสาทาหํ, อุเปมิ สรณํ ชินํฯ
[292]
‘‘มาตรํ ปิตรํ จาหํ, อายาจิตฺวา วินายกํ;
นิมนฺตยิตฺวา สตฺตาหํ, โภชยิํ สหสาวกํฯ
[293]
‘‘อติกฺกนฺเต จ สตฺตาเห, มหาปญฺญานมุตฺตมํ;
ภิกฺขุนิํ เอตทคฺคมฺหิ, ฐเปสิ นรสารถิฯ
[294]
‘‘ตํ สุตฺวา มุทิตา หุตฺวา, ปุโน ตสฺส มเหสิโน;
การํ กตฺวาน ตํ ฐานํ, ปณิปจฺจ ปณีทหิํฯ
[295]
‘‘ตโต มม ชิโน [มํ ส ชิโน (สฺยา.)] อาห, ‘สิชฺฌตํ ปณิธี ตว;
สสงฺเฆ เม กตํ การํ, อปฺปเมยฺยผลํ ตยาฯ
[296]
‘‘‘สตสหสฺสิโต กปฺเป, โอกฺกากกุลสมฺภโว;
โคตโม นาม โคตฺเตน, สตฺถา โลเก ภวิสฺสติฯ
[297]
‘‘‘ตสฺส ธมฺเมสุ ทายาทา, โอรสา ธมฺมนิมฺมิตา;
เอตทคฺคมนุปฺปตฺตา, เขมา นาม ภวิสฺสติ’ฯ
[298]
‘‘เตน กมฺเมน สุกเตน, เจตนาปณิธีหิ จ;
ชหิตฺวา มานุสํ เทหํ, ตาวติํสูปคา อหํฯ
[299]
‘‘ตโต จุตา ยามมคํ, ตโตหํ ตุสิตํ คตา;
ตโต จ นิมฺมานรติํ, วสวตฺติปุรํ ตโตฯ
[300]
‘‘ยตฺถ ยตฺถูปปชฺชามิ, ตสฺส กมฺมสฺส วาหสา;
ตตฺถ ตตฺเถว ราชูนํ, มเหสิตฺตมการยิํฯ
[301]
‘‘ตโต จุตา มนุสฺสตฺเต, ราชูนํ จกฺกวตฺตินํ;
มณฺฑลีนญฺจ ราชูนํ, มเหสิตฺตมการยิํฯ
[302]
‘‘สมฺปตฺติํ อนุโภตฺวาน, เทเวสุ มนุเชสุ จ;
สพฺพตฺถ สุขิตา หุตฺวา, เนกกปฺเปสุ สํสริํฯ
[303]
‘‘เอกนวุติโต กปฺเป, วิปสฺสี โลกนายโก;
อุปฺปชฺชิ จารุทสฺสโน [จารุนยโน (สี. ปี.)], สพฺพธมฺมวิปสฺสโกฯ
[304]
‘‘ตมหํ โลกนายกํ, อุเปตฺวา นรสารถิํ;
ธมฺมํ ภณิตํ สุตฺวาน, ปพฺพชิํ อนคาริยํฯ
[305]
‘‘ทสวสฺสสหสฺสานิ , ตสฺส วีรสฺส สาสเน;
พฺรหฺมจริยํ จริตฺวาน, ยุตฺตโยคา พหุสฺสุตาฯ
[306]
‘‘ปจฺจยาการกุสลา, จตุสจฺจวิสารทา;
นิปุณา จิตฺตกถิกา, สตฺถุสาสนการิกาฯ
[307]
‘‘ตโต จุตาหํ ตุสิตํ, อุปปนฺนา ยสสฺสินี;
อภิโภมิ ตหิํ อญฺเญ, พฺรหฺมจารีผเลนหํฯ
[308]
‘‘ยตฺถ ยตฺถูปปนฺนาหํ, มหาโภคา มหทฺธนา;
เมธาวินี สีลวตี [รูปวตี (สี. สฺยา. ปี.)], วินีตปริสาปิ จฯ
[309]
‘‘ภวามิ เตน กมฺเมน, โยเคน ชินสาสเน;
สพฺพา สมฺปตฺติโย มยฺหํ, สุลภา มนโส ปิยาฯ
[310]
‘‘โยปิ เม ภวเต ภตฺตา, ยตฺถ ยตฺถ คตายปิ;
วิมาเนติ น มํ โกจิ, ปฏิปตฺติพเลน เมฯ
[311]
‘‘อิมมฺหิ ภทฺทเก กปฺเป, พฺรหฺมพนฺธุ มหายโส;
นาเมน โกณาคมโน, อุปฺปชฺชิ วทตํ วโรฯ
[312]
‘‘ตทา หิ พาราณสิยํ, สุสมิทฺธกุลปฺปชา [สุสมิทฺธิ… (สฺยา.)];
ธนญฺชานี สุเมธา จ, อหมฺปิ จ ตโย ชนาฯ
[313]
‘‘สงฺฆารามมทาสิมฺห, ทานสหายิกา ปุเร [เนเก สหสฺสิเก มุเน (สฺยา.), ทานํ สหสฺสิกํ มุเน (ปี.)];
สงฺฆสฺส จ วิหารมฺปิ [สสํฆสฺส วิหารํ หิ (สฺยา. ปี.)], อุทฺทิสฺส การิกา [ทายิกา (ปี.)] มยํฯ
[314]
‘‘ตโต จุตา มยํ สพฺพา, ตาวติํสูปคา อหุํ;
ยสสา อคฺคตํ ปตฺตา, มนุสฺเสสุ ตเถว จฯ
[315]
‘‘อิมสฺมิํเยว กปฺปมฺหิ, พฺรหฺมพนฺธุ มหายโส;
กสฺสโป นาม โคตฺเตน, อุปฺปชฺชิ วทตํ วโรฯ
[316]
‘‘อุปฏฺฐาโก มเหสิสฺส, ตทา อาสิ นริสฺสโร;
กาสิราชา กิกี นาม, พาราณสิปุรุตฺตเมฯ
[317]
‘‘ตสฺสาสิํ เชฏฺฐิกา ธีตา, สมณี อิติ วิสฺสุตา;
ธมฺมํ สุตฺวา ชินคฺคสฺส, ปพฺพชฺชํ สมโรจยิํฯ
[318]
‘‘อนุชานิ น โน ตาโต, อคาเรว ตทา มยํ;
วีสวสฺสสหสฺสานิ, วิจริมฺห อตนฺทิตาฯ
[319]
‘‘โกมาริพฺรหฺมจริยํ, ราชกญฺญา สุเขธิตา;
พุทฺโธปฏฺฐานนิรตา, มุทิตา สตฺต ธีตโรฯ
[320]
‘‘สมณี สมณคุตฺตา จ, ภิกฺขุนี ภิกฺขุทายิกา;
ธมฺมา เจว สุธมฺมา จ, สตฺตมี สงฺฆทายิกาฯ
[321]
‘‘อหํ อุปฺปลวณฺณา จ, ปฏาจารา จ กุณฺฑลา;
กิสาโคตมี ธมฺมทินฺนา, วิสาขา โหติ สตฺตมีฯ
[322]
‘‘กทาจิ โส นราทิจฺโจ, ธมฺมํ เทเสสิ อพฺภุตํ;
มหานิทานสุตฺตนฺตํ, สุตฺวา ตํ ปริยาปุณิํฯ
[323]
‘‘เตหิ กมฺเมหิ สุกเตหิ, เจตนาปณิธีหิ จ;
ชหิตฺวา มานุสํ เทหํ, ตาวติํสมคจฺฉหํฯ
[324]
‘‘ปจฺฉิเม จ ภเว ทานิ, สากลาย ปุรุตฺตเม;
รญฺโญ มทฺทสฺส ธีตามฺหิ, มนาปา ทยิตา ปิยาฯ
[325]
‘‘สห เม ชาตมตฺตมฺหิ, เขมํ ตมฺหิ ปุเร อหุ;
ตโต เขมาติ นามํ เม, คุณโต อุปปชฺชถฯ
[326]
‘‘ยทาหํ โยพฺพนํ ปตฺตา, รูปลาวญฺญภูสิตา [รูปวณฺณวิภูสิตา (สฺยา.), รูปวนฺตา วิภูสิตา (ปี.), รูปวิลาสภูสิตา (ก.)];
ตทา อทาสิ มํ ตาโต, พิมฺพิสารสฺส ราชิโนฯ
[327]
‘‘ตสฺสาหํ สุปฺปิยา อาสิํ, รูปเก ลายเน รตา;
รูปานํ โทสวาทีติ, น อุเปสิํ มหาทยํฯ
[328]
‘‘พิมฺพิสาโร ตทา ราชา, มมานุคฺคหพุทฺธิยา;
วณฺณยิตฺวา เวฬุวนํ, คายเก คาปยี มมํฯ
[329]
‘‘รมฺมํ เวฬุวนํ เยน, น ทิฏฺฐํ สุคตาลยํ;
น เตน นนฺทนํ ทิฏฺฐํ, อิติ มญฺญามเส มยํฯ
[330]
‘‘เยน เวฬุวนํ ทิฏฺฐํ, นรนนฺทนนนฺทนํ;
สุทิฏฺฐํ นนฺทนํ เตน, อมรินฺทสุนนฺทนํฯ
[331]
‘‘วิหาย นนฺทนํ เทวา, โอตริตฺวา มหีตลํ [มหีตเล (สฺยา. ปี.)];
รมฺมํ เวฬุวนํ ทิสฺวา, น ตปฺปนฺติ สุวิมฺหิตาฯ
[332]
‘‘ราชปุญฺเญน นิพฺพตฺตํ, พุทฺธปุญฺเญน ภูสิตํ;
โก วตฺตา ตสฺส นิสฺเสสํ, วนสฺส คุณสญฺจยํฯ
[333]
‘‘ตํ สุตฺวา วนสมิทฺธํ, มม โสตมโนหรํ;
ทฏฺฐุกามา ตมุยฺยานํ, รญฺโญ อาโรจยิํ ตทาฯ
[334]
‘‘มหตา ปริวาเรน, ตทา จ โส [ตทา มํ โส (สฺยา. ปี.)] มหีปติ;
มํ เปเสสิ [สํเปเสสิ (สฺยา.), สมฺปาเปสิ (ปี.)] ตมุยฺยานํ, ทสฺสนาย สมุสฺสุกํฯ
[335]
‘‘คจฺฉ ปสฺส มหาโภเค, วนํ เนตฺตรสายนํ;
ยํ สทา ภาติ สิริยา, สุคตาภานุรญฺชิตํฯ
[336]
‘‘ยทา จ ปิณฺฑาย มุนิ, คิริพฺพชปุรุตฺตมํ;
ปวิฏฺโฐหํ ตทาเยว, วนํ ทฏฺฐุมุปาคมิํฯ
[337]
‘‘ตทา ตํ ผุลฺลวิปินํ, นานาภมรกูชิตํ;
โกกิลาคีตสหิตํ, มยูรคณนจฺจิตํฯ
[338]
‘‘อปฺปสทฺทมนากิณฺณํ, นานาจงฺกมภูสิตํ;
กุฏิมณฺฑปสงฺกิณฺณํ, โยคีวรวิราชิตํฯ
[339]
‘‘วิจรนฺตี อมญฺญิสฺสํ, สผลํ นยนํ มม;
ตตฺถาปิ ตรุณํ ภิกฺขุํ, ยุตฺตํ ทิสฺวา วิจินฺตยิํฯ
[340]
‘‘‘อีทิเส วิปิเน รมฺเม, ฐิโตยํ นวโยพฺพเน;
วสนฺตมิว กนฺเตน, รูเปน จ สมนฺวิโตฯ
[341]
‘‘‘นิสินฺโน รุกฺขมูลมฺหิ, มุณฺโฑ สงฺฆาฏิปารุโต;
ฌายเต วตยํ ภิกฺขุ, หิตฺวา วิสยชํ รติํฯ
[342]
‘‘‘นนุ นาม คหฏฺเฐน, กามํ ภุตฺวา ยถาสุขํ;
ปจฺฉา ชิณฺเณน ธมฺโมยํ, จริตพฺโพ สุภทฺทโก’ฯ
[343]
‘‘สุญฺญกนฺติ วิทิตฺวาน, คนฺธเคหํ ชินาลยํ;
อุเปตฺวา ชินมทฺทกฺขํ, อุทยนฺตํว ภากรํฯ
[344]
‘‘เอกกํ สุขมาสีนํ, พีชมานํ วริตฺถิยา;
ทิสฺวาเนวํ วิจินฺเตสิํ, นายํ ลูโข นราสโภฯ
[345]
‘‘สา กญฺญา กนกาภาสา, ปทุมานนโลจนา;
พิมฺโพฏฺฐี กุนฺททสนา, มโนเนตฺตรสายนาฯ
[346]
‘‘เหมโทลาภสวนา [เหมโทลา สุวทีนา (สฺยา.)], กลิกาการสุตฺถนี [กลสาการสุตฺตนี (สี. ปี.), กมลาการสุตฺตนี (สฺยา.)];
เวทิมชฺฌาว สุสฺโสณี [กนุมชฺฌาว สุสฺโสณี (สี.), เวทิมชฺฌา วรโสณี (สฺยา. ปี.)], รมฺโภรุ จารุภูสนาฯ
[347]
‘‘รตฺตํสกุปสํพฺยานา, นีลมฏฺฐนิวาสนา;
อตปฺปเนยฺยรูเปน, หาสภาวสมนฺวิตา [หาวภาวสมนฺวิตา (สี.), สพฺพาภรณมณฺฑิตา (สฺยา.)]ฯ
[348]
‘‘ทิสฺวา ตเมวํ จินฺเตสิํ, อโหยมภิรูปินี;
น มยาเนน เนตฺเตน, ทิฏฺฐปุพฺพา กุทาจนํฯ
[349]
‘‘ตโต ชราภิภูตา สา, วิวณฺณา วิกตานนา;
ภินฺนทนฺตา เสตสิรา, สลาลา วทนาสุจิฯ
[350]
‘‘สงฺขิตฺตกณฺณา เสตกฺขี, ลมฺพาสุภปโยธรา;
วลิวิตตสพฺพงฺคี, สิราวิตตเทหินีฯ
[351]
‘‘นตงฺคา ทณฺฑทุติยา, อุปฺผาสุลิกตา [อุปฺปณฺฑุปณฺฑุกา (สี. สฺยา.)] กิสา;
ปเวธมานา ปติตา, นิสฺสสนฺตี มุหุํ มุหุํฯ
[352]
‘‘ตโต เม อาสิ สํเวโค, อพฺภุโต โลมหํสโน;
ธิรตฺถุ รูปํ อสุจิํ, รมนฺเต ยตฺถ พาลิสาฯ
[353]
‘‘ตทา มหาการุณิโก, ทิสฺวา สํวิคฺคมานสํ;
อุทคฺคจิตฺโต สุคโต, อิมา คาถา อภาสถฯ
[354]
‘‘‘อาตุรํ อสุจิํ ปูติํ, ปสฺส เขเม สมุสฺสยํ;
อุคฺฆรนฺตํ ปคฺฆรนฺตํ, พาลานํ อภินนฺทิตํฯ
[355]
‘‘‘อสุภาย จิตฺตํ ภาเวหิ, เอกคฺคํ สุสมาหิตํ;
สติ กายคตา ตฺยตฺถุ, นิพฺพิทา พหุลา ภวฯ
[356]
‘‘‘ยถา อิทํ ตถา เอตํ, ยถา เอตํ ตถา อิทํ;
อชฺฌตฺตญฺจ พหิทฺธา จ, กาเย ฉนฺทํ วิราชยฯ
[357]
‘‘‘อนิมิตฺตญฺจ ภาเวหิ, มานานุสยมุชฺชห;
ตโต มานาภิสมยา, อุปสนฺตา จริสฺสสิฯ
[358]
‘‘‘เย ราครตฺตานุปตนฺติ โสตํ, สยํ กตํ มกฺกฏโกว ชาลํ;
เอตมฺปิ เฉตฺวาน ปริพฺพชนฺติ, น เปกฺขิโน [อนเปกฺขิโน (สี. สฺยา. ปี.)] กามสุขํ ปหาย’ฯ
[359]
‘‘ตโต กลฺลิตจิตฺตํ [กลฺลิกจิตฺตํ (สฺยา.), กลิกจิตฺตํ (ปี.)] มํ, ญตฺวาน นรสารถิ;
มหานิทานํ เทเสสิ, สุตฺตนฺตํ วินยาย เมฯ
[360]
‘‘สุตฺวา สุตฺตนฺตเสฏฺฐํ ตํ, ปุพฺพสญฺญมนุสฺสริํ;
ตตฺถ ฐิตาวหํ สนฺตี, ธมฺมจกฺขุํ วิโสธยิํฯ
[361]
‘‘นิปติตฺวา มเหสิสฺส, ปาทมูลมฺหิ ตาวเท;
อจฺจยํ เทสนตฺถาย, อิทํ วจนมพฺรวิํฯ
[362]
‘‘‘นโม เต สพฺพทสฺสาวี, นโม เต กรุณากร;
นโม เต ติณฺณสํสาร, นโม เต อมตํ ททฯ
[363]
‘‘‘ทิฏฺฐิคหนปกฺขนฺทา [… ปกฺขนฺตา (สี. สฺยา.)], กามราควิโมหิตา;
ตยา สมฺมา อุปาเยน, วินีตา วินเย รตาฯ
[364]
‘‘‘อทสฺสเนน วิโภคา [วิพฺโภคา (สี.), วิหิตา (สฺยา.)], ตาทิสานํ มเหสินํ;
อนุโภนฺติ มหาทุกฺขํ, สตฺตา สํสารสาคเรฯ
[365]
‘‘‘ยทาหํ โลกสรณํ, อรณํ อรณนฺตคุํ [มรณนฺตคํ (สฺยา.)];
นาทฺทสามิ อทูรฏฺฐํ, เทสยามิ [เทเสสฺสามิ (สฺยา.)] ตมจฺจยํฯ
[366]
‘‘‘มหาหิตํ วรททํ, อหิโตติ วิสงฺกิตา;
โนเปสิํ รูปนิรตา, เทสยามิ ตมจฺจยํ’ฯ
[367]
‘‘ตทา มธุรนิคฺโฆโส, มหาการุณิโก ชิโน;
อโวจ ติฏฺฐ เขเมติ, สิญฺจนฺโต อมเตน มํฯ
[368]
‘‘ตทา ปณมฺย สิรสา, กตฺวา จ นํ ปทกฺขิณํ;
คนฺตฺวา ทิสฺวา นรปติํ, อิทํ วจนมพฺรวิํฯ
[369]
‘‘‘อโห สมฺมา อุปาโย เต, จินฺติโตยมรินฺทม;
วนทสฺสนกามาย, ทิฏฺโฐ นิพฺพานโต มุนิฯ
[370]
‘‘‘ยทิ เต รุจฺจเต ราช [ราชา (สฺยา.)], สาสเน ตสฺส ตาทิโน;
ปพฺพชิสฺสามิ รูเปหํ, นิพฺพินฺนา มุนิวาณินา’ [มุนิภาณินา (สฺยา. ปี.)]ฯ
ทุติยํ ภาณวารํฯ
[371]
‘‘อญฺชลิํ ปคฺคเหตฺวาน, ตทาห ส มหีปติ;
‘อนุชานามิ เต ภทฺเท, ปพฺพชฺชา ตว สิชฺฌตุ’ฯ
[372]
‘‘ปพฺพชิตฺวา ตทา จาหํ, อทฺธมาเส [สตฺตมาเส (สฺยา.)] อุปฏฺฐิเต;
ทีโปทยญฺจ เภทญฺจ, ทิสฺวา สํวิคฺคมานสาฯ
[373]
‘‘นิพฺพินฺนา สพฺพสงฺขาเร, ปจฺจยาการโกวิทา;
จตุโรเฆ อติกฺกมฺม, อรหตฺตมปาปุณิํฯ
[374]
‘‘อิทฺธีสุ จ วสี อาสิํ, ทิพฺพาย โสตธาตุยา;
เจโตปริยญาณสฺส, วสี จาปิ ภวามหํฯ
[375]
‘‘ปุพฺเพนิวาสํ ชานามิ, ทิพฺพจกฺขุ วิโสธิตํ;
สพฺพาสวปริกฺขีณา, นตฺถิ ทานิ ปุนพฺภโวฯ
[376]
‘‘อตฺถธมฺมนิรุตฺตีสุ, ปฏิภาเน ตเถว จ;
ปริสุทฺธํ มม ญาณํ, อุปฺปนฺนํ พุทฺธสาสเนฯ
[377]
‘‘กุสลาหํ วิสุทฺธีสุ, กถาวตฺถุวิสารทา;
อภิธมฺมนยญฺญู จ, วสิปฺปตฺตามฺหิ สาสเนฯ
[378]
‘‘ตโต โตรณวตฺถุสฺมิํ, รญฺญา โกสลสามินา;
ปุจฺฉิตา นิปุเณ ปญฺเห, พฺยากโรนฺตี ยถาตถํฯ
[379]
‘‘ตทา ส ราชา สุคตํ, อุปสงฺกมฺม ปุจฺฉถ;
ตเถว พุทฺโธ พฺยากาสิ, ยถา เต พฺยากตา มยาฯ
[380]
‘‘ชิโน ตสฺมิํ คุเณ ตุฏฺโฐ, เอตทคฺเค ฐเปสิ มํ;
มหาปญฺญานมคฺคาติ, ภิกฺขุนีนํ นรุตฺตโมฯ
[381]
‘‘กิเลสา ฌาปิตา มยฺหํ…เป.… วิหรามิ อนาสวาฯ
[382]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[383]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ เขมา ภิกฺขุนี อิมา คาถาโย อภาสิตฺถาติฯ
เขมาเถริยาปทานํ อฏฺฐมํฯ
9. อุปฺปลวณฺณาเถรีอปทานํ
[384]
‘‘ภิกฺขุนี อุปฺปลวณฺณา, อิทฺธิยา ปารมิํ คตา;
วนฺทิตฺวา สตฺถุโน ปาเท, อิทํ วจนมพฺรวิฯ
[385]
‘‘‘นิตฺถิณฺณา ชาติสํสารํ [ชาติสํสารา (ปี.)], ปตฺตาหํ อจลํ ปทํ;
สพฺพทุกฺขํ มยา ขีณํ, อาโรเจมิ มหามุนิฯ
[386]
‘‘‘ยาวตา ปริสา อตฺถิ, ปสนฺนา ชินสาสเน;
ยสฺสา จ เมปราโธตฺถิ, ขมนฺตุ ชินสมฺมุขาฯ
[387]
‘‘‘สํสาเร สํสรนฺติยา [สํสรนฺตา เม (สฺยา.)], ขลิตํ เม สเจ ภเว;
อาโรเจมิ มหาวีร, อปราธํ ขมสฺสุ ตํ [เม (สฺยา.)]ฯ
[388]
‘‘‘อิทฺธิญฺจาปิ นิทสฺเสหิ, มม สาสนการิเก;
จตสฺโส ปริสา อชฺช, กงฺขํ ฉินฺทาหิ ยาวตาฯ
[389]
‘‘‘ธีตา ตุยฺหํ มหาวีร, ปญฺญวนฺต ชุตินฺธร;
พหุญฺจ ทุกฺกรํ กมฺมํ, กตํ เม อติทุกฺกรํฯ
[390]