‘‘กิเลสา ฌาปิตา มยฺหํ…เป.… วิหรามิ อนาสโวฯ

[58]

‘‘สฺวาคตํ วต เม อาสิ…เป.… กตํ พุทฺธสฺส สาสนํฯ

[59]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา อมฺพาฏกทายโก เถโร อิมา คาถาโย

อภาสิตฺถาติฯ

อมฺพาฏกทายกตฺเถรสฺสาปทานํ สตฺตมํฯ

8. หรีตกทายกตฺเถรอปทานํ

[60]

‘‘หรีตกํ อามลกํ, อมฺพชมฺพุวิภีตกํ;

โกลํ ภลฺลาตกํ พิลฺลํ, สยเมว หรามหํฯ

[61]

‘‘ทิสฺวาน ปพฺภารคตํ, ฌายิํ ฌานรตํ มุนิํ;

อาพาเธน อาปีเฬนฺตํ, อทุตียํ มหามุนิํฯ

[62]

‘‘หรีตกํ คเหตฺวาน, สยมฺภุสฺส อทาสหํ;

ขาทมตฺตมฺหิ เภสชฺเช, พฺยาธิ ปสฺสมฺภิ [ปสฺสทฺธิ (ก.)] ตาวเทฯ

[63]

‘‘ปหีนทรโถ พุทฺโธ, อนุโมทมกาสิ เม;

‘เภสชฺชทาเนนิมินา, พฺยาธิวูปสเมน จฯ

[64]

‘‘‘เทวภูโต มนุสฺโส วา, ชาโต วา อญฺญชาติยา;

สพฺพตฺถ สุขิโต โหตุ, มา จ เต พฺยาธิมาคมา’ฯ

[65]

‘‘อิทํ วตฺวาน สมฺพุทฺโธ, สยมฺภู อปราชิโต;

นภํ อพฺภุคฺคมี ธีโร, หํสราชาว อมฺพเรฯ

[66]

‘‘ยโต หรีตกํ ทินฺนํ, สยมฺภุสฺส มเหสิโน;

อิมํ ชาติํ อุปาทาย, พฺยาธิ เม นุปปชฺชถฯ

[67]

‘‘อยํ ปจฺฉิมโก มยฺหํ, จริโม วตฺตเต ภโว;

ติสฺโส วิชฺชา สจฺฉิกตา, กตํ พุทฺธสฺส สาสนํฯ

[68]

‘‘จตุนฺนวุติโต กปฺเป, เภสชฺชมททิํ ตทา;

ทุคฺคติํ นาภิชานามิ, เภสชฺชสฺส อิทํ ผลํฯ

[69]

‘‘กิเลสา ฌาปิตา มยฺหํ…เป.… วิหรามิ อนาสโวฯ

[70]

‘‘สฺวาคตํ วต เม อาสิ…เป.… กตํ พุทฺธสฺส สาสนํฯ

[71]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา หรีตกทายโก เถโร อิมา คาถาโย

อภาสิตฺถาติฯ

หรีตกทายกตฺเถรสฺสาปทานํ อฏฺฐมํฯ

9. อมฺพปิณฺฑิยตฺเถรอปทานํ

[72]

‘‘หตฺถิราชา ตทา อาสิํ, อีสาทนฺโต อุรุฬฺหวา;

วิจรนฺโต พฺรหารญฺเญ, อทฺทสํ โลกนายกํฯ

[73]

‘‘อมฺพปิณฺฑํ คเหตฺวาน, อทาสิํ สตฺถุโน อหํ;

ปฏิคฺคณฺหิ มหาวีโร, สิทฺธตฺโถ โลกนายโกฯ

[74]

‘‘มม นิชฺฌายมานสฺส, ปริภุญฺชิ ตทา ชิโน;

ตตฺถ จิตฺตํ ปสาเทตฺวา, ตุสิตํ อุปปชฺชหํฯ

[75]

‘‘ตโต อหํ จวิตฺวาน, จกฺกวตฺตี อโหสหํ;

เอเตเนว อุปาเยน, อนุภุตฺวาน สมฺปทาฯ

[76]

‘‘ปธานปหิตตฺโตหํ, อุปสนฺโต นิรูปธิ;

สพฺพาสเว ปริญฺญาย, วิหรามิ อนาสโวฯ

[77]

‘‘จตุนฺนวุติโต กปฺเป, ยํ ผลมททิํ ตทา;

ทุคฺคติํ นาภิชานามิ, ผลทานสฺสิทํ ผลํฯ

[78]

‘‘กิเลสา ฌาปิตา มยฺหํ…เป.… วิหรามิ อนาสโวฯ

[79]

‘‘สฺวาคตํ วต เม อาสิ…เป.… กตํ พุทฺธสฺส สาสนํฯ

[80]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา อมฺพปิณฺฑิโย เถโร อิมา คาถาโย

อภาสิตฺถาติฯ

อมฺพปิณฺฑิยตฺเถรสฺสาปทานํ นวมํฯ