5. ปญฺจทีปทายิกาเถรีอปทานํ
[61]
‘‘นคเร หํสวติยา, จาริกี [จาริกา (สี. สฺยา.)] อาสหํ ตทา;
อาราเมน จ อารามํ [อาราเมน วิหาเรน (สฺยา. ปี.)], จรามิ กุสลตฺถิกาฯ
[62]
‘‘กาฬปกฺขมฺหิ ทิวเส, อทฺทสํ โพธิมุตฺตมํ;
ตตฺถ จิตฺตํ ปสาเทตฺวา, โพธิมูเล นิสีทหํฯ
[63]
‘‘ครุจิตฺตํ อุปฏฺเฐตฺวา, สิเร กตฺวาน อญฺชลิํ;
โสมนสฺสํ ปเวเทตฺวา, เอวํ จินฺเตสิ ตาวเทฯ
[64]
‘‘‘ยทิ พุทฺโธ อมิตคุโณ, อสมปฺปฏิปุคฺคโล;
ทสฺเสตุ ปาฏิหีรํ เม, โพธิ โอภาสตุ อยํ’ฯ
[65]
‘‘สห อาวชฺชิเต มยฺหํ, โพธิ ปชฺชลิ ตาวเท;
สพฺพโสณฺณมยา อาสิ, ทิสา สพฺพา วิโรจติฯ
[66]
‘‘สตฺตรตฺตินฺทิวํ ตตฺถ, โพธิมูเล นิสีทหํ;
สตฺตเม ทิวเส ปตฺเต, ทีปปูชํ อกาสหํฯ
[67]
‘‘อาสนํ ปริวาเรตฺวา, ปญฺจ ทีปานิ ปชฺชลุํ;
ยาว อุเทติ สูริโย, ทีปา เม ปชฺชลุํ ตทาฯ
[68]
‘‘เตน กมฺเมน สุกเตน, เจตนาปณิธีหิ จ;
ชหิตฺวา มานุสํ เทหํ, ตาวติํสมคจฺฉหํฯ
[69]
‘‘ตตฺถ เม สุกตํ พฺยมฺหํ, ปญฺจทีปาติ วุจฺจติ;
สฏฺฐิโยชนมุพฺเพธํ, ติํสโยชนวิตฺถตํฯ
[70]
‘‘อสงฺขิยานิ ทีปานิ, ปริวาเร ชลิํสุ เม;
ยาวตา เทวภวนํ, ทีปาโลเกน โชตติฯ
[71]
‘‘ปรมฺมุขา [ปุพฺพมุขา (สฺยา.)] นิสีทิตฺวา, ยทิ อิจฺฉามิ ปสฺสิตุํ;
อุทฺธํ อโธ จ ติริยํ, สพฺพํ ปสฺสามิ จกฺขุนาฯ
[72]
‘‘ยาวตา อภิกงฺขามิ, ทฏฺฐุํ สุคตทุคฺคเต [สุกตทุกฺกเฏ (ปี.)];
ตตฺถ อาวรณํ นตฺถิ, รุกฺเขสุ ปพฺพเตสุ วาฯ
[73]
‘‘อสีติ เทวราชูนํ, มเหสิตฺตมการยิํ;
สตานํ จกฺกวตฺตีนํ, มเหสิตฺตมการยิํฯ
[74]
‘‘ยํ ยํ โยนุปปชฺชามิ, เทวตฺตํ อถ มานุสํ;
ทีปสตสหสฺสานิ, ปริวาเร ชลนฺติ เมฯ
[75]
‘‘เทวโลกา จวิตฺวาน, อุปฺปชฺชิํ มาตุกุจฺฉิยํ;
มาตุกุจฺฉิคตา สนฺตี, อกฺขิ เม น นิมีลติฯ
[76]
‘‘ทีปสตสหสฺสานิ, ปุญฺญกมฺมสมงฺคิตา;
ชลนฺติ สูติกาเคเห, ปญฺจทีปานิทํ ผลํฯ
[77]
‘‘ปจฺฉิเม ภเว สมฺปตฺเต, มานสํ วินิวตฺตยิํ;
อชรามตํ สีติภาวํ, นิพฺพานํ ผสฺสยิํ อหํฯ
[78]
‘‘ชาติยา สตฺตวสฺสาหํ, อรหตฺตมปาปุณิํ;
อุปสมฺปาทยี พุทฺโธ, คุณมญฺญาย โคตโมฯ
[79]
‘‘มณฺฑเป รุกฺขมูเล วา, สุญฺญาคาเร วสนฺติยา;
สทา ปชฺชลเต ทีปํ, ปญฺจทีปานิทํ ผลํฯ
[80]
‘‘ทิพฺพจกฺขุ วิสุทฺธํ เม, สมาธิกุสลา อหํ;
อภิญฺญาปารมิปฺปตฺตา, ปญฺจทีปานิทํ ผลํฯ
[81]
‘‘สพฺพโวสิตโวสานา, กตกิจฺจา อนาสวา;
ปญฺจทีปา มหาวีร, ปาเท วนฺทามิ จกฺขุมฯ
[82]
‘‘สตสหสฺสิโต กปฺเป, ยํ ทีปมททิํ ตทา;
ทุคฺคติํ นาภิชานามิ, ปญฺจทีปานิทํ ผลํฯ
[83]
‘‘กิเลสา ฌาปิตา มยฺหํ…เป.… วิหรามิ อนาสวาฯ
[84]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[85]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ ปญฺจทีปทายิกา ภิกฺขุนี อิมา คาถาโย อภาสิตฺถาติฯ
ปญฺจทีปทายิกาเถริยาปทานํ ปญฺจมํฯ
6. นฬมาลิกาเถรีอปทานํ
[86]
‘‘จนฺทภาคานทีตีเร , อโหสิํ กินฺนรี ตทา;
อทฺทสํ วิรชํ พุทฺธํ, สยมฺภุํ อปราชิตํฯ
[87]