4. เอกาสนทายิกาเถรีอปทานํ
[37]
‘‘นคเร หํสวติยา, อโหสิํ พาลิกา [มาลิกา (สฺยา. ปี.)] ตทา;
มาตา จ เม ปิตา เจว, กมฺมนฺตํ อคมํสุ เตฯ
[38]
‘‘มชฺฌนฺหิกมฺหิ สูริเย, อทฺทสํ สมณํ อหํ;
วีถิยา อนุคจฺฉนฺตํ, อาสนํ ปญฺญเปสหํฯ
[39]
‘‘โคนกาวิกติกาหิ [โคนกจิตฺตกาทีหิ (สี.)], ปญฺญเปตฺวา มมาสนํ;
ปสนฺนจิตฺตา สุมนา, อิทํ วจนมพฺรวิํฯ
[40]
‘‘‘สนฺตตฺตา กุถิตา ภูมิ, สูโร มชฺฌนฺหิเก ฐิโต;
มาลุตา จ น วายนฺติ, กาโล เจเวตฺถ เมหิติ [เจตฺถ อุปฏฺฐิโต (สี.), เจวตฺถํ เอติ ตํ (ปี.)]ฯ
[41]
‘‘‘ปญฺญตฺตมาสนมิทํ, ตวตฺถาย มหามุนิ;
อนุกมฺปํ อุปาทาย, นิสีท มม อาสเน’ฯ
[42]
‘‘นิสีทิ ตตฺถ สมโณ, สุทนฺโต สุทฺธมานโส;
ตสฺส ปตฺตํ คเหตฺวาน, ยถารนฺธํ อทาสหํฯ
[43]
‘‘เตน กมฺเมน สุกเตน, เจตนาปณิธีหิ จ;
ชหิตฺวา มานุสํ เทหํ, ตาวติํสมคจฺฉหํฯ
[44]
‘‘ตตฺถ เม สุกตํ พฺยมฺหํ, อาสเนน สุนิมฺมิตํ;
สฏฺฐิโยชนมุพฺเพธํ, ติํสโยชนวิตฺถตํฯ
[45]
‘‘โสณฺณมยา มณิมยา, อโถปิ ผลิกามยา;
โลหิตงฺคมยา เจว, ปลฺลงฺกา วิวิธา มมฯ
[46]
‘‘ตูลิกา วิกติกาหิ, กฏฺฏิสฺสจิตฺตกาหิ จ;
อุทฺทเอกนฺตโลมี จ, ปลฺลงฺกา เม สุสณฺฐิตา [สุสนฺถตา (สี.)]ฯ
[47]
‘‘ยทา อิจฺฉามิ คมนํ, หาสขิฑฺฑสมปฺปิตา;
สห ปลฺลงฺกเสฏฺเฐน, คจฺฉามิ มม ปตฺถิตํฯ
[48]
‘‘อสีติ เทวราชูนํ, มเหสิตฺตมการยิํ;
สตฺตติ จกฺกวตฺตีนํ, มเหสิตฺตมการยิํฯ
[49]
‘‘ภวาภเว สํสรนฺตี, มหาโภคํ ลภามหํ;
โภเค เม อูนตา นตฺถิ, เอกาสนสฺสิทํ ผลํ [เอกาสนผลํ อิทํ (สพฺพตฺถ) เอวมุปริปิ]ฯ
[50]
‘‘ทุเว ภเว สํสรามิ, เทวตฺเต อถ มานุเส;
อญฺเญ ภเว น ชานามิ, เอกาสนสฺสิทํ ผลํฯ
[51]
‘‘ทุเว กุเล ปชายามิ, ขตฺติเย จาปิ พฺราหฺมเณ;
อุจฺจากุลีนา [อุจฺจากุลิกา (สฺยา. ปี. ก.)] สพฺพตฺถ, เอกาสนสฺสิทํ ผลํฯ
[52]
‘‘โทมนสฺสํ น ชานามิ, จิตฺตสนฺตาปนํ มม;
เววณฺณิยํ น ชานามิ, เอกาสนสฺสิทํ ผลํฯ
[53]
‘‘ธาติโย มํ อุปฏฺฐนฺติ, ขุชฺชา เจลาปิกา [เขลาปิกา (สี.), เจลาวิกา (ปี.)] พหู;
องฺเกน องฺกํ คจฺฉามิ, เอกาสนสฺสิทํ ผลํฯ
[54]
‘‘อญฺญา นฺหาเปนฺติ โภเชนฺติ, อญฺญา รเมนฺติ มํ สทา;
อญฺญา คนฺธํ วิลิมฺปนฺติ, เอกาสนสฺสิทํ ผลํ [อญฺญา มเมว นฺหาเปนฺติ, อญฺญา โภเชนฺติ โภชนํ; อญฺญา มํ อลงฺกโรนฺติ, อญฺญา รเมนฺติ มํ สทฺธา; (สฺยา.)]ฯ
[55]
‘‘มณฺฑเป รุกฺขมูเล วา, สุญฺญาคาเร วสนฺติยา;
มม สงฺกปฺปมญฺญาย, ปลฺลงฺโก อุปติฏฺฐติฯ
[56]
‘‘อยํ ปจฺฉิมโก มยฺหํ, จริโม วตฺตเต ภโว;
อชฺชาปิ รชฺชํ ฉฑฺเฑตฺวา, ปพฺพชิํ อนคาริยํฯ
[57]
‘‘สตสหสฺสิโต กปฺเป, ยํ ทานมททิํ ตทา;
ทุคฺคติํ นาภิชานามิ, เอกาสนสฺสิทํ ผลํฯ
[58]
‘‘กิเลสา ฌาปิตา มยฺหํ…เป.… วิหรามิ อนาสวาฯ
[59]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[60]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ เอกาสนทายิกา ภิกฺขุนี อิมา คาถาโย อภาสิตฺถาติฯ
เอกาสนทายิกาเถริยาปทานํ จตุตฺถํฯ
5. ปญฺจทีปทายิกาเถรีอปทานํ
[61]
‘‘นคเร หํสวติยา, จาริกี [จาริกา (สี. สฺยา.)] อาสหํ ตทา;
อาราเมน จ อารามํ [อาราเมน วิหาเรน (สฺยา. ปี.)], จรามิ กุสลตฺถิกาฯ
[62]
‘‘กาฬปกฺขมฺหิ ทิวเส, อทฺทสํ โพธิมุตฺตมํ;
ตตฺถ จิตฺตํ ปสาเทตฺวา, โพธิมูเล นิสีทหํฯ
[63]
‘‘ครุจิตฺตํ อุปฏฺเฐตฺวา, สิเร กตฺวาน อญฺชลิํ;
โสมนสฺสํ ปเวเทตฺวา, เอวํ จินฺเตสิ ตาวเทฯ
[64]
‘‘‘ยทิ พุทฺโธ อมิตคุโณ, อสมปฺปฏิปุคฺคโล;
ทสฺเสตุ ปาฏิหีรํ เม, โพธิ โอภาสตุ อยํ’ฯ
[65]
‘‘สห อาวชฺชิเต มยฺหํ, โพธิ ปชฺชลิ ตาวเท;
สพฺพโสณฺณมยา อาสิ, ทิสา สพฺพา วิโรจติฯ
[66]
‘‘สตฺตรตฺตินฺทิวํ ตตฺถ, โพธิมูเล นิสีทหํ;
สตฺตเม ทิวเส ปตฺเต, ทีปปูชํ อกาสหํฯ
[67]
‘‘อาสนํ ปริวาเรตฺวา, ปญฺจ ทีปานิ ปชฺชลุํ;
ยาว อุเทติ สูริโย, ทีปา เม ปชฺชลุํ ตทาฯ
[68]
‘‘เตน กมฺเมน สุกเตน, เจตนาปณิธีหิ จ;
ชหิตฺวา มานุสํ เทหํ, ตาวติํสมคจฺฉหํฯ
[69]
‘‘ตตฺถ เม สุกตํ พฺยมฺหํ, ปญฺจทีปาติ วุจฺจติ;
สฏฺฐิโยชนมุพฺเพธํ, ติํสโยชนวิตฺถตํฯ
[70]
‘‘อสงฺขิยานิ ทีปานิ, ปริวาเร ชลิํสุ เม;
ยาวตา เทวภวนํ, ทีปาโลเกน โชตติฯ
[71]
‘‘ปรมฺมุขา [ปุพฺพมุขา (สฺยา.)] นิสีทิตฺวา, ยทิ อิจฺฉามิ ปสฺสิตุํ;
อุทฺธํ อโธ จ ติริยํ, สพฺพํ ปสฺสามิ จกฺขุนาฯ
[72]
‘‘ยาวตา อภิกงฺขามิ, ทฏฺฐุํ สุคตทุคฺคเต [สุกตทุกฺกเฏ (ปี.)];
ตตฺถ อาวรณํ นตฺถิ, รุกฺเขสุ ปพฺพเตสุ วาฯ
[73]
‘‘อสีติ เทวราชูนํ, มเหสิตฺตมการยิํ;
สตานํ จกฺกวตฺตีนํ, มเหสิตฺตมการยิํฯ
[74]