‘‘เอกนวุติโต กปฺเป, ยํ อุจฺฉุมททิํ ตทา;
ทุคฺคติํ นาภิชานามิ, อุจฺฉุขณฺฑสฺสิทํ ผลํฯ
[47]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[48]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[49]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อุจฺฉุขณฺฑิโก เถโร อิมา คาถาโย
อภาสิตฺถาติฯ
อุจฺฉุขณฺฑิกตฺเถรสฺสาปทานํ ปญฺจมํฯ
6. กฬมฺพทายกตฺเถรอปทานํ
[50]
‘‘โรมโส นาม สมฺพุทฺโธ, วสเต ปพฺพตนฺตเร;
กฬมฺพํ ตสฺส ปาทาสิํ, ปสนฺโน เสหิ ปาณิภิฯ
[51]
‘‘จตุนฺนวุติโต กปฺเป, ยํ ทานมททิํ ตทา;
ทุคฺคติํ นาภิชานามิ, กฬมฺพสฺส อิทํ ผลํฯ
[52]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[53]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[54]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา กฬมฺพทายโก เถโร อิมา คาถาโย
อภาสิตฺถาติฯ
กฬมฺพทายกตฺเถรสฺสาปทานํ ฉฏฺฐํฯ
7. อมฺพาฏกทายกตฺเถรอปทานํ
[55]
‘‘วิปิเน พุทฺธํ ทิสฺวาน, สยมฺภุํ อปราชิตํ;
อมฺพาฏกํ คเหตฺวาน, สยมฺภุสฺส อทาสหํฯ
[56]
‘‘เอกติํเส อิโต กปฺเป, ยํ ผลมททิํ ตทา;
ทุคฺคติํ นาภิชานามิ, ผลทานสฺสิทํ ผลํฯ
[57]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[58]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[59]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อมฺพาฏกทายโก เถโร อิมา คาถาโย
อภาสิตฺถาติฯ
อมฺพาฏกทายกตฺเถรสฺสาปทานํ สตฺตมํฯ
8. หรีตกทายกตฺเถรอปทานํ
[60]
‘‘หรีตกํ อามลกํ, อมฺพชมฺพุวิภีตกํ;
โกลํ ภลฺลาตกํ พิลฺลํ, สยเมว หรามหํฯ
[61]
‘‘ทิสฺวาน ปพฺภารคตํ, ฌายิํ ฌานรตํ มุนิํ;
อาพาเธน อาปีเฬนฺตํ, อทุตียํ มหามุนิํฯ
[62]
‘‘หรีตกํ คเหตฺวาน, สยมฺภุสฺส อทาสหํ;
ขาทมตฺตมฺหิ เภสชฺเช, พฺยาธิ ปสฺสมฺภิ [ปสฺสทฺธิ (ก.)] ตาวเทฯ
[63]
‘‘ปหีนทรโถ พุทฺโธ, อนุโมทมกาสิ เม;
‘เภสชฺชทาเนนิมินา, พฺยาธิวูปสเมน จฯ
[64]
‘‘‘เทวภูโต มนุสฺโส วา, ชาโต วา อญฺญชาติยา;
สพฺพตฺถ สุขิโต โหตุ, มา จ เต พฺยาธิมาคมา’ฯ
[65]
‘‘อิทํ วตฺวาน สมฺพุทฺโธ, สยมฺภู อปราชิโต;
นภํ อพฺภุคฺคมี ธีโร, หํสราชาว อมฺพเรฯ
[66]
‘‘ยโต หรีตกํ ทินฺนํ, สยมฺภุสฺส มเหสิโน;
อิมํ ชาติํ อุปาทาย, พฺยาธิ เม นุปปชฺชถฯ
[67]
‘‘อยํ ปจฺฉิมโก มยฺหํ, จริโม วตฺตเต ภโว;
ติสฺโส วิชฺชา สจฺฉิกตา, กตํ พุทฺธสฺส สาสนํฯ
[68]
‘‘จตุนฺนวุติโต กปฺเป, เภสชฺชมททิํ ตทา;
ทุคฺคติํ นาภิชานามิ, เภสชฺชสฺส อิทํ ผลํฯ
[69]
