1. เอกูโปสถิกาเถรีอปทานํ
[1]
‘‘นคเร พนฺธุมติยา, พนฺธุมา นาม ขตฺติโย;
ทิวเส ปุณฺณมาย โส, อุปวสิ อุโปสถํฯ
[2]
‘‘อหํ เตน สมเยน, กุมฺภทาสี อหํ ตหิํ;
ทิสฺวา สราชกํ เสนํ, เอวาหํ จินฺตยิํ ตทาฯ
[3]
‘ราชาปิ รชฺชํ ฉฑฺเฑตฺวา, อุปวสิ อุโปสถํ;
สผลํ นูน ตํ กมฺมํ, ชนกาโย ปโมทิโต’ฯ
[4]
‘‘โยนิโส ปจฺจเวกฺขิตฺวา, ทุคฺคจฺจญฺจ [ทุคฺคติญฺจ (สฺยา.)] ทลิทฺทตํ [ทฬิทฺทตํ (สี.)];
มานสํ สมฺปหํสิตฺวา, อุปวสิํ อุโปสถํฯ
[5]
‘‘อหํ อุโปสถํ กตฺวา, สมฺมาสมฺพุทฺธสาสเน;
เตน กมฺเมน สุกเตน, ตาวติํสมคจฺฉหํฯ
[6]
‘‘ตตฺถ เม สุกตํ พฺยมฺหํ, อุพฺภโยชนมุคฺคตํ [อุทฺธํ โยชนมุคฺคตํ (สี. สฺยา. ปี.)];
กูฏาคารวรูเปตํ, มหาสนสุภูสิตํฯ
[7]
‘‘อจฺฉรา สตสหสฺสา, อุปติฏฺฐนฺติ มํ สทา;
อญฺเญ เทเว อติกฺกมฺม, อติโรจามิ สพฺพทาฯ
[8]
‘‘จตุสฏฺฐิ เทวราชูนํ, มเหสิตฺตมการยิํ;
เตสฏฺฐิ จกฺกวตฺตีนํ, มเหสิตฺตมการยิํฯ
[9]
‘‘สุวณฺณวณฺณา หุตฺวาน, ภเวสุ สํสรามหํ;
สพฺพตฺถ ปวรา โหมิ, อุโปสถสฺสิทํ ผลํฯ
[10]
‘‘หตฺถิยานํ อสฺสยานํ, รถยานญฺจ สีวิกํ [เกวลํ (สี. สฺยา. ปี.)];
ลภามิ สพฺพเมเวตํ, อุโปสถสฺสิทํ ผลํฯ
[11]
‘‘โสณฺณมยํ รูปิมยํ, อโถปิ ผลิกามยํ;
โลหิตงฺคมยญฺเจว, สพฺพํ ปฏิลภามหํฯ
[12]
‘‘โกเสยฺยกมฺพลิยานิ , โขมกปฺปาสิกานิ จ;
มหคฺฆานิ จ วตฺถานิ, สพฺพํ ปฏิลภามหํฯ
[13]
‘‘อนฺนํ ปานํ ขาทนียํ, วตฺถเสนาสนานิ จ;
สพฺพเมตํ ปฏิลเภ, อุโปสถสฺสิทํ ผลํฯ
[14]
‘‘วรคนฺธญฺจ มาลญฺจ, จุณฺณกญฺจ วิเลปนํ;
สพฺพเมตํ ปฏิลเภ, อุโปสถสฺสิทํ ผลํฯ
[15]
‘‘กูฏาคารญฺจ ปาสาทํ, มณฺฑปํ หมฺมิยํ คุหํ;
สพฺพเมตํ ปฏิลเภ, อุโปสถสฺสิทํ ผลํฯ
[16]
‘‘ชาติยา สตฺตวสฺสาหํ, ปพฺพชิํ อนคาริยํ;
อฑฺฒมาเส อสมฺปตฺเต, อรหตฺตมปาปุณิํฯ
[17]
‘‘กิเลสา ฌาปิตา มยฺหํ, ภวา สพฺเพ สมูหตา;
สพฺพาสวปริกฺขีณา, นตฺถิ ทานิ ปุนพฺภโวฯ
[18]
‘‘เอกนวุติโต กปฺเป, ยํ กมฺมมกริํ ตทา;
ทุคฺคติํ นาภิชานามิ, อุโปสถสฺสิทํ ผลํฯ
[19]
‘‘กิเลสา ฌาปิตา มยฺหํ…เป.… วิหรามิ อนาสวาฯ
[20]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[21]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ เอกูโปสถิกา ภิกฺขุนี อิมา คาถาโย อภาสิตฺถาติฯ
เอกูโปสถิกาเถริยาปทานํ ปฐมํฯ
2. สฬลปุปฺผิกาเถรีอปทานํ
[22]
‘‘จนฺทภาคานทีตีเร, อโหสิํ กินฺนรี ตทา;
อทฺทสาหํ เทวเทวํ, จงฺกมนฺตํ นราสภํฯ
[23]
‘‘โอจินิตฺวาน สฬลํ, พุทฺธเสฏฺฐสฺสทาสหํ;
อุปสิงฺฆิ มหาวีโร, สฬลํ เทวคนฺธิกํฯ
[24]
‘‘ปฏิคฺคเหตฺวา สมฺพุทฺโธ, วิปสฺสี โลกนายโก;
อุปสิงฺฆิ มหาวีโร, เปกฺขมานาย เม ตทาฯ
[25]
‘‘อญฺชลิํ ปคฺคเหตฺวาน, วนฺทิตฺวา ทฺวิปทุตฺตมํ [ทิปทุตฺตมํ (สี. สฺยา. ปี.)];
สกํ จิตฺตํ ปสาเทตฺวา, ตโต ปพฺพตมารุหิํฯ
[26]