‘‘ปพฺพตคฺเค ทุมคฺเค วา, อนฺตลิกฺเข จ ภูมิยํ;
ยทา อุทกมิจฺฉามิ, ขิปฺปํ ปฏิลภามหํฯ
[123]
‘‘อวุฏฺฐิกา ทิสา นตฺถิ, สนฺตตฺตา กุถิตาปิ [สนฺตตฺตา กุถิตา น จ (สี. ปี.), สนฺตตฺตา ขุปฺปิตา หิ เม (สฺยา.)] จ;
มม สงฺกปฺปมญฺญาย, มหาเมโฆ ปวสฺสติฯ
[124]
‘‘กทาจิ นียมานาย, ญาติสงฺเฆน เม ตทา;
ยทา อิจฺฉามหํ วสฺสํ, มหาเมโฆ อชายถฯ
[125]
‘‘อุณฺหํ วา ปริฬาโห วา, สรีเร เม น วิชฺชติ;
กาเย จ เม รโช นตฺถิ, ทกทานสฺสิทํ ผลํฯ
[126]
‘‘วิสุทฺธมนสา อชฺช, อเปตมนปาปิกา;
สพฺพาสวปริกฺขีณา, นตฺถิ ทานิ ปุนพฺภโวฯ
[127]
‘‘เอกนวุติโต กปฺเป, ยํ ทกํ อททิํ ตทา;
ทุคฺคติํ นาภิชานามิ, ทกทานสฺสิทํ ผลํฯ
[128]
‘‘กิเลสา ฌาปิตา มยฺหํ…เป.… วิหรามิ อนาสวาฯ
[129]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[130]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อุทกทายิกา ภิกฺขุนี อิมา คาถาโย อภาสิตฺถาติฯ
อุทกทายิกาเถริยาปทานํ ทสมํฯ
สุเมธาวคฺโค ปฐโมฯ
ตสฺสุทฺทานํ –
สุเมธา เมขลาทายี, มณฺฑปํ สงฺกมํ ททา;
นฬมาลี ปิณฺฑททา, กฏจฺฉุ อุปฺปลปฺปทาฯ
ทีปทา ทกทา เจว, คาถาโย คณิตา อิห;
เอกคาถาสตญฺเจว, ติํสติ จ ตทุตฺตริ [สตฺตรสํ ตทุตฺตริ (สฺยา.), สตฺตาทส ตทุตฺตริํ (ปี.)]ฯ
2. เอกูโปสถิกวคฺโค
1. เอกูโปสถิกาเถรีอปทานํ
[1]
‘‘นคเร พนฺธุมติยา, พนฺธุมา นาม ขตฺติโย;
ทิวเส ปุณฺณมาย โส, อุปวสิ อุโปสถํฯ
[2]
‘‘อหํ เตน สมเยน, กุมฺภทาสี อหํ ตหิํ;
ทิสฺวา สราชกํ เสนํ, เอวาหํ จินฺตยิํ ตทาฯ
[3]
‘ราชาปิ รชฺชํ ฉฑฺเฑตฺวา, อุปวสิ อุโปสถํ;
สผลํ นูน ตํ กมฺมํ, ชนกาโย ปโมทิโต’ฯ
[4]
‘‘โยนิโส ปจฺจเวกฺขิตฺวา, ทุคฺคจฺจญฺจ [ทุคฺคติญฺจ (สฺยา.)] ทลิทฺทตํ [ทฬิทฺทตํ (สี.)];
มานสํ สมฺปหํสิตฺวา, อุปวสิํ อุโปสถํฯ
[5]
‘‘อหํ อุโปสถํ กตฺวา, สมฺมาสมฺพุทฺธสาสเน;
เตน กมฺเมน สุกเตน, ตาวติํสมคจฺฉหํฯ
[6]
‘‘ตตฺถ เม สุกตํ พฺยมฺหํ, อุพฺภโยชนมุคฺคตํ [อุทฺธํ โยชนมุคฺคตํ (สี. สฺยา. ปี.)];
กูฏาคารวรูเปตํ, มหาสนสุภูสิตํฯ
[7]
‘‘อจฺฉรา สตสหสฺสา, อุปติฏฺฐนฺติ มํ สทา;
อญฺเญ เทเว อติกฺกมฺม, อติโรจามิ สพฺพทาฯ
[8]
‘‘จตุสฏฺฐิ เทวราชูนํ, มเหสิตฺตมการยิํ;
เตสฏฺฐิ จกฺกวตฺตีนํ, มเหสิตฺตมการยิํฯ
[9]
‘‘สุวณฺณวณฺณา หุตฺวาน, ภเวสุ สํสรามหํ;
สพฺพตฺถ ปวรา โหมิ, อุโปสถสฺสิทํ ผลํฯ
[10]
‘‘หตฺถิยานํ อสฺสยานํ, รถยานญฺจ สีวิกํ [เกวลํ (สี. สฺยา. ปี.)];
ลภามิ สพฺพเมเวตํ, อุโปสถสฺสิทํ ผลํฯ
[11]
‘‘โสณฺณมยํ รูปิมยํ, อโถปิ ผลิกามยํ;
โลหิตงฺคมยญฺเจว, สพฺพํ ปฏิลภามหํฯ
[12]
‘‘โกเสยฺยกมฺพลิยานิ , โขมกปฺปาสิกานิ จ;
มหคฺฆานิ จ วตฺถานิ, สพฺพํ ปฏิลภามหํฯ
[13]