‘‘วีริยํ เม ธุรโธรยฺหํ, โยคกฺเขมาธิวาหนํ;

สพฺพาสวปริกฺขีณา, นตฺถิ ทานิ ปุนพฺภโวฯ

[87]

‘‘เอกติํเส อิโต กปฺเป, ยํ ปุปฺผมภิปูชยิํ;

ทุคฺคติํ นาภิชานามิ, พุทฺธปูชายิทํ ผลํฯ

[88]

‘‘กิเลสา ฌาปิตา มยฺหํ…เป.… วิหรามิ อนาสวาฯ

[89]

‘‘สฺวาคตํ วต เม อาสิ…เป.… กตํ พุทฺธสฺส สาสนํฯ

[90]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ สตฺตุปฺปลมาลิกา ภิกฺขุนี อิมา คาถาโย อภาสิตฺถาติฯ

สตฺตุปฺปลมาลิกาเถริยาปทานํ อฏฺฐมํฯ

9. ปญฺจทีปิกาเถรีอปทานํ

[91]

‘‘นคเร หํสวติยา, จาริกี [จารินิํ (สฺยา.)] อาสหํ ตทา;

อาราเมน จ อารามํ, จรามิ กุสลตฺถิกาฯ

[92]

‘‘กาฬปกฺขมฺหิ ทิวเส, อทฺทสํ โพธิมุตฺตมํ;

ตตฺถ จิตฺตํ ปสาเทตฺวา, โพธิมูเล นิสีทหํฯ

[93]

‘‘ครุจิตฺตํ อุปฏฺเฐตฺวา, สิเร กตฺวาน อญฺชลิํ;

โสมนสฺสํ ปเวเทตฺวา, เอวํ จินฺเตสิ ตาวเทฯ

[94]

‘‘‘ยทิ พุทฺโธ อมิตคุโณ, อสมปฺปฏิปุคฺคโล;

ทสฺเสตุ ปาฏิหีรํ เม, โพธิ โอภาสตุ อยํ’ฯ

[95]

‘‘สห อาวชฺชิเต มยฺหํ, โพธิ ปชฺชลิ ตาวเท;

สพฺพโสณฺณมยา อาสิ, ทิสา สพฺพา วิโรจติฯ

[96]

‘‘สตฺตรตฺตินฺทิวํ [สตฺตรตฺติทิวํ (ปี. ก.)] ตตฺถ, โพธิมูเล นิสีทหํ;

สตฺตเม ทิวเส ปตฺเต, ทีปปูชํ อกาสหํฯ

[97]

‘‘อาสนํ ปริวาเรตฺวา, ปญฺจทีปานิ ปชฺชลุํ;

ยาว อุเทติ สูริโย, ทีปา เม ปชฺชลุํ ตทาฯ

[98]

‘‘เตน กมฺเมน สุกเตน, เจตนาปณิธีหิ จ;

ชหิตฺวา มานุสํ เทหํ, ตาวติํสมคจฺฉหํฯ

[99]

‘‘ตตฺถ เม สุกตํ พฺยมฺหํ, ปญฺจทีปาติ วุจฺจติ;

สฏฺฐิโยชนมุพฺเพธํ [สตโยชนมุพฺเพธํ (สี. สฺยา. ปี.)], ติํสโยชนวิตฺถตํ [สฏฺฐิ… (สฺยา. ปี.)]ฯ

[100]

‘‘อสงฺขิยานิ ทีปานิ, ปริวาเร ชลนฺติ เม;

ยาวตา เทวภวนํ, ทีปาโลเกน โชตติฯ

[101]

‘‘ปรมฺมุขา นิสีทิตฺวา [ปุรตฺถาภิมุขา สนฺติ (สฺยา.), ปุรตฺถาภิมุขา ถิตา (ปี.)], ยทิ อิจฺฉามิ ปสฺสิตุํ;

อุทฺธํ อโธ จ ติริยํ, สพฺพํ ปสฺสามิ จกฺขุนาฯ

[102]

‘‘ยาวตา อภิกงฺขามิ, ทฏฺฐุํ สุคตทุคฺคเต [สุกตทุกฺกเต (ปี.];

ตตฺถ อาวรณํ นตฺถิ, รุกฺเขสุ ปพฺพเตสุ วาฯ

[103]

‘‘อสีติ เทวราชูนํ, มเหสิตฺตมการยิํ;

สตานํ จกฺกวตฺตีนํ, มเหสิตฺตมการยิํฯ

[104]

‘‘ยํ ยํ โยนุปปชฺชามิ, เทวตฺตํ อถ มานุสํ;

ทีปสตสหสฺสานิ, ปริวาเร ชลนฺติ เมฯ

[105]

‘‘เทวโลกา จวิตฺวาน, อุปฺปชฺชิํ มาตุกุจฺฉิยํ;

มาตุกุจฺฉิคตา สนฺตี [มาตุกุจฺฉิคตํ สนฺติํ (สี.)], อกฺขิ เม น นิมีลติฯ

[106]

‘‘ทีปสตสหสฺสานิ, ปุญฺญกมฺมสมงฺคิตา;

ชลนฺติ สูติกาเคเห [สูติฆเร ปชฺชลนฺติ (สพฺพตฺถ)], ปญฺจทีปานิทํ ผลํฯ

[107]

‘‘ปจฺฉิเม ภเว สมฺปตฺเต, มานสํ วินิวตฺตยิํ;

อชรามตํ สีติภาวํ, นิพฺพานํ ผสฺสยิํ อหํฯ

[108]

‘‘ชาติยา สตฺตวสฺสาหํ, อรหตฺตมปาปุณิํ;

อุปสมฺปาทยี พุทฺโธ, คุณมญฺญาย โคตโมฯ

[109]

‘‘มณฺฑเป รุกฺขมูเล วา, ปาสาเทสุ คุหาสุ วา;

สุญฺญาคาเร วสนฺติยา [จ ฌายนฺเต (สี.), จ ฌายนฺตา (ปี.), ปชฺฌายนฺตา (สฺยา.)], ปญฺจทีปา ชลนฺติ เมฯ

[110]

‘‘ทิพฺพจกฺขุ วิสุทฺธํ เม, สมาธิกุสลา อหํ;

อภิญฺญาปารมิปฺปตฺตา, ปญฺจทีปานิทํ ผลํฯ

[111]

‘‘สพฺพโวสิตโวสานา, กตกิจฺจา อนาสวา;

ปญฺจทีปา มหาวีร, ปาเท วนฺทามิ [วนฺทติ (สี. ก.)] จกฺขุมฯ

[112]

‘‘สตสหสฺสิโต กปฺเป, ยํ ทีปมททิํ ตทา;

ทุคฺคติํ นาภิชานามิ, ปญฺจทีปานิทํ ผลํฯ

[113]

‘‘กิเลสา ฌาปิตา มยฺหํ…เป.… วิหรามิ อนาสวาฯ

[114]

‘‘สฺวาคตํ วต เม อาสิ…เป.… กตํ พุทฺธสฺส สาสนํฯ

[115]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ ปญฺจทีปิกา ภิกฺขุนี อิมา คาถาโย อภาสิตฺถาติฯ

ปญฺจทีปิกาเถริยาปทานํ นวมํฯ

10. อุทกทายิกาเถรีอปทานํ

[116]

‘‘นคเร พนฺธุมติยา, อโหสิํ อุทหาริกา;

อุทหาเรน ชีวามิ, เตน โปเสมิ ทารเกฯ

[117]

‘‘เทยฺยธมฺโม จ เม นตฺถิ, ปุญฺญกฺเขตฺเต อนุตฺตเร;

โกฏฺฐกํ อุปสงฺกมฺม, อุทกํ ปฏฺฐเปสหํฯ

[118]

‘‘เตน กมฺเมน สุกเตน, ตาวติํสมคจฺฉหํ;

ตตฺถ เม สุกตํ พฺยมฺหํ, อุทหาเรน นิมฺมิตํฯ

[119]

‘‘อจฺฉรานํ สหสฺสสฺส, อหญฺหิ ปวรา ตทา;

ทสฏฺฐาเนหิ ตา สพฺพา, อภิโภมิ สทา อหํฯ

[120]

‘‘ปญฺญาสํ เทวราชูนํ, มเหสิตฺตมการยิํ;

วีสติจกฺกวตฺตีนํ, มเหสิตฺตมการยิํฯ

[121]

‘‘ทุเว ภเว สํสรามิ, เทวตฺเต อถ มานุเส;

ทุคฺคติํ นาภิชานามิ, ทกทานสฺสิทํ ผลํฯ

[122]