‘‘เตน กมฺเมน สุกเตน, เจตนาปณิธีหิ จ;
ชหิตฺวา กินฺนรีเทหํ, อคจฺฉิํ ติทสํ คติํฯ
[40]
‘‘ฉตฺติํสเทวราชูนํ , มเหสิตฺตมการยิํ;
ทสนฺนํ จกฺกวตฺตีนํ, มเหสิตฺตมการยิํ;
สํเวเชตฺวาน เม จิตฺตํ [เวทยิตฺวาน กุสลํ (สฺยา.), สํเวทยิตฺวา กุสลํ (ปี.)], ปพฺพชิํ อนคาริยํฯ
[41]
‘‘กิเลสา ฌาปิตา มยฺหํ, ภวา สพฺเพ สมูหตา [ภวา สํฆาติตา มม (ก.)];
สพฺพาสวปริกฺขีณา, นตฺถิ ทานิ ปุนพฺภโวฯ
[42]
‘‘จตุนฺนวุติโต กปฺเป, ยํ ปุปฺผมภิปูชยิํ;
ทุคฺคติํ นาภิชานามิ, ปุปฺผปูชายิทํ ผลํฯ
[43]
‘‘กิเลสา ฌาปิตา มยฺหํ…เป.… วิหรามิ อนาสวาฯ
[44]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[45]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ นฬมาลิกา เถรี อิมา คาถาโย อภาสิตฺถาติฯ
นฬมาลิกาเถริยาปทานํ ปญฺจมํฯ
6. เอกปิณฺฑปาตทายิกาเถรีอปทานํ
[46]
‘‘นคเร พนฺธุมติยา, พนฺธุมา นาม ขตฺติโย;
ตสฺส รญฺโญ อหุํ ภริยา, เอกชฺฌํ จารยามหํ [เอกจฺจํ วาทยามหํ (สฺยา.)]ฯ
[47]
‘‘รโหคตา นิสีทิตฺวา, เอวํ จินฺเตสหํ ตทา;
‘อาทาย คมนียญฺหิ, กุสลํ นตฺถิ เม กตํฯ
[48]
‘‘‘มหาภิตาปํ กฏุกํ, โฆรรูปํ สุทารุณํ;
นิรยํ นูน คจฺฉามิ, เอตฺถ เม นตฺถิ สํสโย’ฯ
[49]
‘‘ราชานํ อุปสงฺกมฺม, อิทํ วจนมพฺรวิํ;
‘เอกํ เม สมณํ เทหิ, โภชยิสฺสามิ ขตฺติย’ฯ
[50]
‘‘อทาสิ เม มหาราชา, สมณํ ภาวิตินฺทฺริยํ;
ตสฺส ปตฺตํ คเหตฺวาน, ปรมนฺเนน ปูรยิํ [ตปฺปยิํ (สี.)]ฯ
[51]
‘‘ปูรยิตฺวา ปรมนฺนํ, คนฺธาเลปํ อกาสหํ;
ชาเลน ปิทหิตฺวาน, วตฺถยุเคน [ปีตโจเฬน (สฺยา.), มหาเนเลน (ปี.)] ฉาทยิํฯ
[52]
‘‘อารมฺมณํ มมํ เอตํ, สรามิ ยาวชีวิหํ;
ตตฺถ จิตฺตํ ปสาเทตฺวา, ตาวติํสมคจฺฉหํฯ
[53]
‘‘ติํสานํ เทวราชูนํ, มเหสิตฺตมการยิํ;
มนสา ปตฺถิตํ มยฺหํ, นิพฺพตฺตติ ยถิจฺฉิตํ [ยติจฺฉกํ (สฺยา.), ยทิจฺฉกํ (ปี. ก.)]ฯ
[54]
‘‘วีสานํ จกฺกวตฺตีนํ, มเหสิตฺตมการยิํ;
โอจิตตฺตาว [อุปจิตตฺตา (สฺยา.)] หุตฺวาน, สํสรามิ ภเวสฺวหํฯ
[55]
‘‘สพฺพพนฺธนมุตฺตาหํ, อเปตา เม อุปาทิกา;
สพฺพาสวปริกฺขีณา, นตฺถิ ทานิ ปุนพฺภโวฯ
[56]
‘‘เอกนวุติโต กปฺเป, ยํ ทานมททิํ ตทา;
ทุคฺคติํ นาภิชานามิ, ปิณฺฑปาตสฺสิทํ ผลํฯ
[57]
‘‘กิเลสา ฌาปิตา มยฺหํ…เป.… วิหรามิ อนาสวาฯ
[58]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[59]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ เอกปิณฺฑปาตทายิกา ภิกฺขุนี อิมา คาถาโย อภาสิตฺถาติฯ
เอกปิณฺฑปาตทายิกาเถริยาปทานํ ฉฏฺฐํฯ
7. กฏจฺฉุภิกฺขาทายิกาเถรีอปทานํ
[60]
‘‘ปิณฺฑจารํ จรนฺตสฺส, ติสฺสนามสฺส สตฺถุโน;
กฏจฺฉุภิกฺขํ ปคฺคยฺห, พุทฺธเสฏฺฐสฺส ทาสหํฯ
[61]
‘‘ปฏิคฺคเหตฺวา สมฺพุทฺโธ, ติสฺโส โลกคฺคนายโก;
วีถิยา สณฺฐิโต สตฺถา, อกา เม อนุโมทนํฯ
[62]