4. ญาณตฺถวิกตฺเถรอปทานํ
[35]
‘‘กณิการํว ชลิตํ, ทีปรุกฺขํว โชติตํ;
กญฺจนํว วิโรจนฺตํ, อทฺทสํ ทฺวิปทุตฺตมํฯ
[36]
‘‘กมณฺฑลุํ ฐเปตฺวาน, วากจีรญฺจ กุณฺฑิกํ;
เอกํสํ อชินํ กตฺวา, พุทฺธเสฏฺฐํ ถวิํ อหํฯ
[37]
‘‘‘ตมนฺธการํ วิธมํ, โมหชาลสมากุลํ;
ญาณาโลกํ ทสฺเสตฺวาน, นิตฺติณฺโณสิ มหามุนิฯ
[38]
‘‘‘สมุทฺธรสิมํ โลกํ, สพฺพาวนฺตมนุตฺตรํ;
ญาเณ เต อุปมา นตฺถิ, ยาวตาชคโตคติ [ยาวตา จ คโตคติ (ปี. ก.)]ฯ
[39]
‘‘‘เตน ญาเณน สพฺพญฺญู, อิติ พุทฺโธ ปวุจฺจติ;
วนฺทามิ ตํ มหาวีรํ, สพฺพญฺญุตมนาวรํ’ฯ
[40]
‘‘สตสหสฺสิโต กปฺเป, พุทฺธเสฏฺฐํ ถวิํ อหํ;
ทุคฺคติํ นาภิชานามิ, ญาณตฺถวายิทํ ผลํ;
[41]
‘‘กิเลสา ฌาปิตา มยฺหํ…เป.… วิหรามิ อนาสโว;
[42]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[43]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ญาณตฺถวิโก เถโร อิมา คาถาโย
อภาสิตฺถาติฯ
ญาณตฺถวิกตฺเถรสฺสาปทานํ จตุตฺถํฯ
5. อุจฺฉุขณฺฑิกตฺเถรอปทานํ
[44]
‘‘นคเร พนฺธุมติยา, ทฺวารปาโล อโหสหํ;
อทฺทสํ วิรชํ พุทฺธํ, สพฺพธมฺมาน ปารคุํฯ
[45]
‘‘อุจฺฉุขณฺฑิกมาทาย, พุทฺธเสฏฺฐสฺสทาสหํ;
ปสนฺนจิตฺโต สุมโน, วิปสฺสิสฺส มเหสิโนฯ
[46]
‘‘เอกนวุติโต กปฺเป, ยํ อุจฺฉุมททิํ ตทา;
ทุคฺคติํ นาภิชานามิ, อุจฺฉุขณฺฑสฺสิทํ ผลํฯ
[47]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[48]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[49]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อุจฺฉุขณฺฑิโก เถโร อิมา คาถาโย
อภาสิตฺถาติฯ
อุจฺฉุขณฺฑิกตฺเถรสฺสาปทานํ ปญฺจมํฯ
6. กฬมฺพทายกตฺเถรอปทานํ
[50]
‘‘โรมโส นาม สมฺพุทฺโธ, วสเต ปพฺพตนฺตเร;
กฬมฺพํ ตสฺส ปาทาสิํ, ปสนฺโน เสหิ ปาณิภิฯ
[51]
‘‘จตุนฺนวุติโต กปฺเป, ยํ ทานมททิํ ตทา;
ทุคฺคติํ นาภิชานามิ, กฬมฺพสฺส อิทํ ผลํฯ
[52]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[53]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[54]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา กฬมฺพทายโก เถโร อิมา คาถาโย
อภาสิตฺถาติฯ
กฬมฺพทายกตฺเถรสฺสาปทานํ ฉฏฺฐํฯ
7. อมฺพาฏกทายกตฺเถรอปทานํ
[55]
‘‘วิปิเน พุทฺธํ ทิสฺวาน, สยมฺภุํ อปราชิตํ;
อมฺพาฏกํ คเหตฺวาน, สยมฺภุสฺส อทาสหํฯ
[56]
‘‘เอกติํเส อิโต กปฺเป, ยํ ผลมททิํ ตทา;
ทุคฺคติํ นาภิชานามิ, ผลทานสฺสิทํ ผลํฯ
[57]