‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา รฏฺฐปาโล เถโร อิมา คาถาโย

อภาสิตฺถาติฯ

รฏฺฐปาลตฺเถรสฺสาปทานํ เอกาทสมํฯ

ยสวคฺโค ฉปญฺญาสโมฯ

ตสฺสุทฺทานํ –

ยโส นทีกสฺสโป จ, คยากิมิลวชฺชิโน;

ทุเว อุตฺตรา ภทฺทชี, สิวโก อุปวาหโน;

รฏฺฐปาโล เอกสตํ, คาถานํ ปญฺจนวุติฯ

เถราปทานํ สมตฺตํฯ

เอตฺตาวตา พุทฺธาปทานญฺจ ปจฺเจกาปทานญฺจ เถราปทานญฺจ

สมตฺตานิฯ

ฯ นโม ตสฺส ภควโต อรหโต สมฺมาสมฺพุทฺธสฺสฯ

ขุทฺทกนิกาเย

เถรีอปทานปาฬิ

1. สุเมธาวคฺโค

1. สุเมธาเถรีอปทานํ

อถ เถริกาปทานานิ สุณาถ –

[1]

‘‘ภควติ โกณาคมเน, สงฺฆารามมฺหิ นวนิเวสนมฺหิ [นิเวสมฺหิ (สฺยา.)];

สขิโย ติสฺโส ชนิโย, วิหารทานํ อทาสิมฺหฯ

[2]

‘‘ทสกฺขตฺตุํ สตกฺขตฺตุํ, ทสสตกฺขตฺตุํ สตานญฺจ สตกฺขตฺตุํ [สตานิ จ สตฺตกฺขตฺตุํ (สี. ก.)];

เทเวสุ อุปปชฺชิมฺห, โก วาโท มานุเส ภเวฯ

[3]

‘‘เทเว มหิทฺธิกา อหุมฺห, มานุสกมฺหิ โก วาโท;

สตฺตรตนมเหสี [สตฺตรตนสฺส มเหสี (สี. ปี.)], อิตฺถิรตนํ อหํ ภวิํฯ

[4]

‘‘อิธ สญฺจิตกุสลา [ตตฺถ สญฺจิตํ กุสลํ (สฺยา.)], สุสมิทฺธกุลปฺปชา;

ธนญฺชานี จ เขมา จ, อหมฺปิ จ ตโย ชนาฯ

[5]

‘‘อารามํ สุกตํ กตฺวา, สพฺพาวยวมณฺฑิตํ;

พุทฺธปฺปมุขสงฺฆสฺส, นิยฺยาเทตฺวา สโมทิตาฯ

[6]

‘‘ยตฺถ ยตฺถูปปชฺชามิ, ตสฺส กมฺมสฺส วาหสา;

เทเวสุ อคฺคตํ ปตฺตา, มนุสฺเสสุ ตเถว จฯ

[7]

‘‘อิมสฺมิํเยว กปฺปมฺหิ, พฺรหฺมพนฺธุ มหายโส;

กสฺสโป นาม โคตฺเตน, อุปฺปชฺชิ วทตํ วโรฯ

[8]

‘‘อุปฏฺฐาโก มเหสิสฺส, ตทา อาสิ นริสฺสโร;

กาสิราชา กิกี นาม, พาราณสิปุรุตฺตเมฯ

[9]

‘‘ตสฺสาสุํ สตฺต ธีตโร, ราชกญฺญา สุเขธิตา [สุเขถิตา (สฺยา.)];

พุทฺโธปฏฺฐานนิรตา, พฺรหฺมจริยํ จริํสุ ตาฯ

[10]

‘‘ตาสํ สหายิกา หุตฺวา, สีเลสุ สุสมาหิตา;

ทตฺวา ทานานิ สกฺกจฺจํ, อคาเรว วตํ [อคาเรว วตฺตํ (สฺยา.)] จริํฯ

[11]

‘‘เตน กมฺเมน สุกเตน, เจตนาปณิธีหิ จ;

ชหิตฺวา มานุสํ เทหํ, ตาวติํสูปคา อหํฯ

[12]

‘‘ตโต จุตา ยามมคํ [ยามสคฺคํ (สฺยา.)], ตโตหํ ตุสิตํ คตา;

ตโต จ นิมฺมานรติํ, วสวตฺติปุรํ ตโตฯ

[13]

‘‘ยตฺถ ยตฺถูปปชฺชามิ, ปุญฺญกมฺมสโมหิตา;

ตตฺถ ตตฺเถว ราชูนํ, มเหสิตฺตมการยิํฯ

[14]

‘‘ตโต จุตา มนุสฺสตฺเต, ราชูนํ จกฺกวตฺตินํ;

มณฺฑลีนญฺจ ราชูนํ, มเหสิตฺตมการยิํฯ

[15]

‘‘สมฺปตฺติมนุโภตฺวาน, เทเวสุ มานุเสสุ จ;

สพฺพตฺถ สุขิตา หุตฺวา, เนกชาตีสุ สํสริํฯ

[16]

‘‘โส เหตุ จ โส ปภโว, ตมฺมูลํ สาสเน ขมํ [ตมฺมูลํ สา จ สาสเน ขนฺติ (สี. ปี. ก.)];

ปฐมํ ตํ สโมธานํ, ตํ ธมฺมรตาย นิพฺพานํ [นิพฺพุตํ (สฺยา.)]ฯ

[17]

‘‘กิเลสา ฌาปิตา มยฺหํ, ภวา สพฺเพ สมูหตา;

นาคีว พนฺธนํ เฉตฺวา, วิหรามิ อนาสวาฯ

[18]

‘‘สฺวาคตํ วต เม อาสิ, มม พุทฺธสฺส [พุทฺธเสฏฺฐสฺส (สี. สฺยา. ก.)] สนฺติเก;

ติสฺโส วิชฺชา อนุปฺปตฺตา, กตํ พุทฺธสฺส สาสนํฯ

[19]

‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

อิตฺถํ สุทํ สุเมธา ภิกฺขุนี อิมา คาถาโย อภาสิตฺถาติฯ

สุเมธาเถริยาปทานํ ปฐมํฯ

2. เมขลาทายิกาเถรีอปทานํ

[20]

‘‘สิทฺธตฺถสฺส ภควโต, ถูปการาปิกา อหุํ [ถูปการ มกาสหํ (สฺยา.)];

เมขลิกา มยา ทินฺนา, นวกมฺมาย สตฺถุโนฯ

[21]

‘‘นิฏฺฐิเต จ มหาถูเป, เมขลํ ปุนทาสหํ;

โลกนาถสฺส มุนิโน, ปสนฺนา เสหิ ปาณิภิฯ

[22]

‘‘จตุนฺนวุติโต กปฺเป, ยํ เมขลมทํ ตทา;

ทุคฺคติํ นาภิชานามิ, ถูปการสฺสิทํ ผลํฯ

[23]

‘‘กิเลสา ฌาปิตา มยฺหํ…เป.… วิหรามิ อนาสวาฯ

[24]

‘‘สฺวาคตํ วต เม อาสิ…เป.… กตํ พุทฺธสฺส สาสนํฯ

[25]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ เมขลาทายิกา ภิกฺขุนี อิมา คาถาโย อภาสิตฺถาติฯ

เมขลาทายิกาเถริยาปทานํ ทุติยํฯ

3. มณฺฑปทายิกาเถรีอปทานํ

[26]

‘‘โกณาคมนพุทฺธสฺส , มณฺฑโป การิโต มยา;

ธุวํ ติจีวรํทาสิํ [ถูปญฺจ ปวรมทํ (สฺยา.), ธุวญฺจ จีวรํ อทํ (ปี.)], พุทฺธสฺส โลกพนฺธุโนฯ

[27]

‘‘ยํ ยํ ชนปทํ ยามิ, นิคเม ราชธานิโย;

สพฺพตฺถ ปูชิโต โหมิ, ปุญฺญกมฺมสฺสิทํ ผลํฯ

[28]

‘‘กิเลสา ฌาปิตา มยฺหํ…เป.… วิหรามิ อนาสวาฯ

[29]