3. คยากสฺสปตฺเถรอปทานํ
[35]
‘‘อชินจมฺมวตฺโถหํ [อชินวตฺตํ นิวตฺโตหํ (สี.)], ขาริภารธโร ตทา;
ขาริกํ หารยิตฺวาน, โกลํ อหาสิ อสฺสมํฯ
[36]
‘‘ภควา ตมฺหิ สมเย, เอโก อทุติโย ชิโน;
มมสฺสมํ อุปาคจฺฉิ, โชเตนฺโต สพฺพกาลิกํฯ
[37]
‘‘สกํ จิตฺตํ ปสาเทตฺวา, อภิวาเทตฺวาน สุพฺพตํ;
อุโภ หตฺเถหิ ปคฺคยฺห, โกลํ พุทฺธสฺสทาสหํฯ
[38]
‘‘เอกติํเส อิโต กปฺเป, ยํ ผลํ อททิํ ตทา;
ทุคฺคติํ นาภิชานามิ, โกลทานสฺสิทํ ผลํฯ
[39]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[40]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[41]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา คยากสฺสโป เถโร อิมา คาถาโย
อภาสิตฺถาติฯ
คยากสฺสปตฺเถรสฺสาปทานํ ตติยํฯ
4. กิมิลตฺเถรอปทานํ
[42]
‘‘นิพฺพุเต กกุสนฺธมฺหิ, พฺราหฺมณมฺหิ วุสีมติ;
คเหตฺวา สลลํ มาลํ, มณฺฑปํ การยิํ อหํฯ
[43]
‘‘ตาวติํสํ คโต สนฺโต, ลภิมฺห [ลภามิ (ก.)] พฺยมฺหมุตฺตมํ;
อญฺเญ เทเวติโรจามิ, ปุญฺญกมฺมสฺสิทํ ผลํฯ
[44]
‘‘ทิวา วา ยทิ วา รตฺติํ, จงฺกมนฺโต ฐิโต จหํ;
ฉนฺโน สลลปุปฺเผหิ, ปุญฺญกมฺมสฺสิทํ ผลํฯ
[45]
‘‘อิมสฺมิํเยว กปฺปมฺหิ, ยํ พุทฺธมภิปูชยิํ;
ทุคฺคติํ นาภิชานามิ, พุทฺธปูชายิทํ ผลํฯ
[46]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[47]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[48]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา กิมิโล [กิมฺพิโล (สี.)] เถโร อิมา คาถาโย
อภาสิตฺถาติฯ
กิมิลตฺเถรสฺสาปทานํ จตุตฺถํฯ
5. วชฺชีปุตฺตตฺเถรอปทานํ
[49]
‘‘สหสฺสรํสี ภควา, สยมฺภู อปราชิโต;
วิเวกา วุฏฺฐหิตฺวาน, โคจรายาภินิกฺขมิฯ
[50]
‘‘ผลหตฺโถ อหํ ทิสฺวา, อุปคจฺฉิํ นราสภํ;
ปสนฺนจิตฺโต สุมโน, สวณฺฏํ อททิํ ผลํฯ
[51]
‘‘จตุนฺนวุติโต กปฺเป, ยํ ผลํ อททิํ ตทา;
ทุคฺคติํ นาภิชานามิ, ผลทานสฺสิทํ ผลํฯ
[52]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[53]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[54]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา วชฺชีปุตฺโต เถโร อิมา คาถาโย
อภาสิตฺถาติฯ
วชฺชีปุตฺตตฺเถรสฺสาปทานํ ปญฺจมํฯ
6. อุตฺตรตฺเถรอปทานํ
[55]
‘‘สุเมโธ นาม สมฺพุทฺโธ, พาตฺติํสวรลกฺขโณ;
วิเวกกาโม ภควา, หิมวนฺตมุปาคมิฯ
[56]
‘‘อชฺโฌคาเหตฺวา หิมวนฺตํ, อคฺโค การุณิโก มุนิ;
ปลฺลงฺกํ อาภุชิตฺวาน, นิสีทิ ปุริสุตฺตโมฯ
[57]