1. ยสตฺเถรอปทานํ

[1]

‘‘มหาสมุทฺทํ โอคฺคยฺห, ภวนํ เม สุนิมฺมิตํ;

สุนิมฺมิตา โปกฺขรณี, จกฺกวากูปกูชิตาฯ

[2]

‘‘มนฺทารเกหิ สญฺฉนฺนา, ปทุมุปฺปลเกหิ จ;

นที จ สนฺทเต ตตฺถ, สุปติตฺถา มโนรมาฯ

[3]

‘‘มจฺฉกจฺฉปสญฺฉนฺนา, นานาทิชสโมตฺถฏา [นานามิคสโมตฺถฏา (สฺยา.)];

มยูรโกญฺจาภิรุทา, โกกิลาทีหิ วคฺคุหิฯ

[4]

‘‘ปาเรวตา รวิหํสา, จกฺกวากา นทีจรา;

ติตฺติรา สาฬิกา เจตฺถ, ปาวกา [สมฺพกา (ก.)] ชีวํชีวกาฯ

[5]

‘‘หํสาโกญฺจาภินทิตา, โกสิยา ปิงฺคลา [ปิงฺคลี (สี.), สิงฺคลี, สิงฺฆลี (ก.)] พหู;

สตฺตรตนสมฺปนฺนา, มณิมุตฺตปวาฬิกาฯ

[6]

‘‘สพฺเพ โสณฺณมยา รุกฺขา, นานาขนฺธสเมริตา;

อุชฺโชเตนฺติ ทิวารตฺติํ, ภวนํ สพฺพกาลิกํฯ

[7]

‘‘สฏฺฐิตุริยสหสฺสานิ, สายํ ปาโต ปวชฺชเร;

โสฬสิตฺถิสหสฺสานิ, ปริวาเรนฺติ มํ สทาฯ

[8]

‘‘อภินิกฺขมฺม ภวนา, สุเมธํ โลกนายกํ;

ปสนฺนจิตฺโต สุมโน, วนฺทยิํ ตํ [สพฺพทสฺสิํ (ก.)] มหายสํฯ

[9]

‘‘สมฺพุทฺธํ อภิวาเทตฺวา, สสงฺฆํ ตํ นิมนฺตยิํ;

อธิวาเสสิ โส ธีโร, สุเมโธ โลกนายโกฯ

[10]

‘‘มม ธมฺมกถํ กตฺวา, อุยฺโยเชสิ มหามุนิ;

สมฺพุทฺธํ อภิวาเทตฺวา, ภวนํ เม อุปาคมิํฯ

[11]

‘‘อามนฺตยิํ ปริชนํ, สพฺเพ สนฺนิปตุํ ตทา;

‘ปุพฺพณฺหสมยํ พุทฺโธ, ภวนํ อาคมิสฺสติ’ฯ

[12]

‘‘‘ลาภา อมฺหํ สุลทฺธา โน, เย วสาม ตวนฺติเก;

มยมฺปิ พุทฺธเสฏฺฐสฺส, ปูชยิสฺสาม สตฺถุโน’ฯ

[13]

‘‘อนฺนํ ปานํ ปฏฺฐเปตฺวา, กาลํ อาโรจยิํ อหํ;

วสีสตสหสฺเสหิ, อุเปสิ โลกนายโกฯ

[14]

‘‘ปญฺจงฺคิเกหิ ตุริเยหิ, ปจฺจุคฺคมมกาสหํ;

สพฺพโสณฺณมเย ปีเฐ, นิสีทิ ปุริสุตฺตโมฯ

[15]

‘‘อุปริจฺฉทนํ อาสิ, สพฺพโสณฺณมยํ ตทา;

พีชนีโย ปวายนฺติ, ภิกฺขุสงฺฆํ อนุตฺตรํฯ

[16]

‘‘ปหูเตนนฺนปาเนน, ภิกฺขุสงฺฆํ อตปฺปยิํ;

ปจฺเจกทุสฺสยุคเล, ภิกฺขุสงฺฆสฺสทาสหํฯ

[17]

‘‘ยํ วเทติ สุเมโธ โส, อาหุตีนํ ปฏิคฺคโห;

ภิกฺขุสงฺเฆ นิสีทิตฺวา, อิมา คาถา อภาสถฯ

[18]

‘‘‘โย มํ อนฺเนน ปาเนน, สพฺเพ อิเม จ ตปฺปยิ;

ตมหํ กิตฺตยิสฺสามิ, สุณาถ มม ภาสโตฯ

[19]

‘‘‘อฏฺฐารเส กปฺปสเต, เทวโลเก รมิสฺสติ;

สหสฺสกฺขตฺตุํ ราชายํ, จกฺกวตฺตี ภวิสฺสติฯ

[20]

‘‘‘อุปคจฺฉติ ยํ โยนิํ, เทวตฺตํ อถ มานุสํ;

สพฺพโสณฺณมยํ ตสฺส, ฉทนํ ธารยิสฺสติฯ

[21]

‘‘‘ติํสกปฺปสหสฺสมฺหิ, โอกฺกากกุลสมฺภโว;

โคตโม นาม โคตฺเตน, สตฺถา โลเก ภวิสฺสติฯ

[22]

‘‘‘ตสฺส ธมฺเมสุ ทายาโท, โอรโส ธมฺมนิมฺมิโต;

สพฺพาสเว ปริญฺญาย, นิพฺพายิสฺสตินาสโวฯ

[23]

‘‘‘ภิกฺขุสงฺเฆ นิสีทิตฺวา, สีหนาทํ นทิสฺสติ’;

จิตเก ฉตฺตํ ธาเรนฺติ, เหฏฺฐา ฉตฺตมฺหิ ฑยฺหถฯ

[24]

‘‘สามญฺญํ เม อนุปฺปตฺตํ, กิเลสา ฌาปิตา มยา;

มณฺฑเป รุกฺขมูเล วา, สนฺตาโส เม น วิชฺชติฯ

[25]

‘‘ติํสกปฺปสหสฺสมฺหิ, ยํ ทานมททิํ ตทา;

ทุคฺคติํ นาภิชานามิ, สพฺพทานสฺสิทํ ผลํฯ

[26]

‘‘กิเลสา ฌาปิตา มยฺหํ, ภวา สพฺเพ สมูหตา;

นาโคว พนฺธนํ เฉตฺวา, วิหรามิ อนาสโวฯ

[27]

‘‘สฺวาคตํ วต เม อาสิ, มม พุทฺธสฺส สนฺติเก;

ติสฺโส วิชฺชา อนุปฺปตฺตา, กตํ พุทฺธสฺส สาสนํฯ

[28]

‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

อิตฺถํ สุทํ อายสฺมา ยโส เถโร อิมา คาถาโย อภาสิตฺถาติฯ

ยสตฺเถรสฺสาปทานํ ปฐมํฯ

2. นทีกสฺสปตฺเถรอปทานํ

[29]

‘‘ปทุมุตฺตรสฺส ภควโต, โลกเชฏฺฐสฺส ตาทิโน;

ปิณฺฑจารํ จรนฺตสฺส, วารโต อุตฺตมํ ยสํ;

อคฺคผลํ คเหตฺวาน, อทาสิํ สตฺถุโน อหํฯ

[30]

‘‘เตน กมฺเมน เทวินฺโท, โลกเชฏฺโฐ นราสโภ;

สมฺปตฺโตมฺหิ อจลํ ฐานํ, หิตฺวา ชยปราชยํฯ

[31]

‘‘สตสหสฺสิโต กปฺเป, ยํ ผลํ อททิํ ตทา;

ทุคฺคติํ นาภิชานามิ, อคฺคทานสฺสิทํ ผลํฯ

[32]

‘‘กิเลสา ฌาปิตา มยฺหํ…เป.… วิหรามิ อนาสโวฯ

[33]

‘‘สฺวาคตํ วต เม อาสิ…เป.… กตํ พุทฺธสฺส สาสนํฯ

[34]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา นทีกสฺสโป เถโร อิมา คาถาโย

อภาสิตฺถาติฯ

นทีกสฺสปตฺเถรสฺสาปทานํ ทุติยํฯ