‘‘‘เอวํวิหาริํ อาตาปิํ, อโหรตฺตมตนฺทิตํ;
ตํ เว ภทฺเทกรตฺโตติ, สนฺโต อาจิกฺขเต มุนิ’ฯ
[248]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[249]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[250]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา โลมสกงฺคิโย [โลมสงฺขิโย (สฺยา. ก.)] เถโร อิมา คาถาโย
อภาสิตฺถาติฯ
โลมสกงฺคิยตฺเถรสฺสาปทานํ อฏฺฐมํฯ
9. วนวจฺฉตฺเถรอปทานํ
[251]
‘‘อิมมฺหิ ภทฺทเก กปฺเป, พฺรหฺมพนฺธุ มหายโส;
กสฺสโป นาม โคตฺเตน, อุปฺปชฺชิ วทตํ วโรฯ
[252]
‘‘ตทาหํ ปพฺพชิตฺวาน, ตสฺส พุทฺธสฺส สาสเน;
ยาวชีวํ จริตฺวาน, พฺรหฺมจารํ ตโต จุโตฯ
[253]
‘‘เตน กมฺเมน สุกเตน, เจตนาปณิธีหิ จ;
ชหิตฺวา มานุสํ เทหํ, ตาวติํสมคจฺฉหํฯ
[254]
‘‘ตโต จุโต อรญฺญมฺหิ, กโปโต อาสหํ ตหิํ;
วสเต คุณสมฺปนฺโน, ภิกฺขุ ฌานรโต สทาฯ
[255]
‘‘เมตฺตจิตฺโต การุณิโก, สทา ปมุทิตานโน;
อุเปกฺขโก มหาวีโร, อปฺปมญฺญาสุ โกวิโทฯ
[256]
‘‘วินีวรณสงฺกปฺเป, สพฺพสตฺตหิตาสเย;
วิสฏฺโฐ นจิเรนาสิํ, ตสฺมิํ สุคตสาวเกฯ
[257]
‘‘อุเปจฺจ ปาทมูลมฺหิ, นิสินฺนสฺส ตทาสฺสเม;
กทาจิ สามิสํ เทติ, ธมฺมํ เทเสสิ เจกทาฯ
[258]
‘‘ตทา วิปุลเปเมน, อุปาสิตฺวา ชินตฺรชํ;
ตโต จุโต คโต สคฺคํ, ปวาโส สฆรํ ยถาฯ
[259]
‘‘สคฺคา จุโต มนุสฺเสสุ, นิพฺพตฺโต ปุญฺญกมฺมุนา;
อคารํ ฉฑฺฑยิตฺวาน, ปพฺพชิํ พหุโส อหํฯ
[260]
‘‘สมโณ ตาปโส วิปฺโป, ปริพฺพโช ตเถวหํ;
หุตฺวา วสิํ อรญฺญมฺหิ, อเนกสตโส อหํฯ
[261]
‘‘ปจฺฉิเม จ ภเว ทานิ, รมฺเม กปิลวตฺถเว;
วจฺฉโคตฺโต ทิโช ตสฺส, ชายาย อหโมกฺกมิํฯ
[262]
‘‘มาตุ เม โทหโฬ อาสิ, ติโรกุจฺฉิคตสฺส เม;
ชายมานสมีปมฺหิ, วนวาสาย นิจฺฉโยฯ
[263]
‘‘ตโต เม อชนี มาตา, รมณีเย วนนฺตเร;
คพฺภโต นิกฺขมนฺตํ มํ, กาสาเยน ปฏิคฺคหุํฯ
[264]
‘‘ตโต กุมาโร สิทฺธตฺโถ, ชาโต สกฺยกุลทฺธโช;
ตสฺส มิตฺโต ปิโย อาสิํ, สํวิสฏฺโฐ สุมานิโยฯ
[265]
‘‘สตฺตสาเรภินิกฺขนฺเต, โอหาย วิปุลํ ยสํ;
อหมฺปิ ปพฺพชิตฺวาน, หิมวนฺตมุปาคมิํฯ
[266]
‘‘วนาลยํ ภาวนียํ, กสฺสปํ ธุตวาทิกํ;
ทิสฺวา สุตฺวา ชินุปฺปาทํ, อุเปสิํ นรสารถิํฯ
[267]
‘‘โส เม ธมฺมมเทเสสิ, สพฺพตฺถํ สมฺปกาสยํ;
ตโตหํ ปพฺพชิตฺวาน, วนเมว ปุนาคมํ [ปุนาคมิํ (สี. ปี.), ปุโนกฺกมํ (สฺยา.)]ฯ
[268]
‘‘ตตฺถาปฺปมตฺโต วิหรํ, ฉฬภิญฺญา อผสฺสยิํ [อปสฺสยิํ (สฺยา. ก.)];
อโห สุลทฺธลาโภมฺหิ, สุมิตฺเตนานุกมฺปิโตฯ
[269]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[270]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[271]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา วนวจฺโฉ เถโร อิมา คาถาโย
อภาสิตฺถาติฯ
วนวจฺฉตฺเถรสฺสาปทานํ นวมํฯ
10. จูฬสุคนฺธตฺเถรอปทานํ
[272]
‘‘อิมมฺหิ ภทฺทเก กปฺเป, พฺรหฺมพนฺธุ มหายโส;
กสฺสโป นาม โคตฺเตน, อุปฺปชฺชิ วทตํ วโรฯ
[273]
‘‘อนุพฺยญฺชนสมฺปนฺโน, พาตฺติํสวรลกฺขโณ;
พฺยามปฺปภาปริวุโต, รํสิชาลสโมตฺถโฏฯ
[274]
‘‘อสฺสาเสตา ยถา จนฺโท, สูริโยว ปภงฺกโร;
นิพฺพาเปตา ยถา เมโฆ, สาคโรว คุณากโรฯ
[275]
‘‘ธรณีริว สีเลน, หิมวาว สมาธินา;
อากาโส วิย ปญฺญาย, อสงฺโค อนิโล ยถาฯ
[276]
‘‘ตทาหํ พาราณสิยํ, อุปปนฺโน มหากุเล;
ปหูตธนธญฺญสฺมิํ, นานารตนสญฺจเยฯ
[277]
‘‘มหตา ปริวาเรน, นิสินฺนํ โลกนายกํ;
อุเปจฺจ ธมฺมมสฺโสสิํ, อมตํว มโนหรํฯ
[278]
‘‘ทฺวตฺติํสลกฺขณธโร, สนกฺขตฺโตว จนฺทิมา;
อนุพฺยญฺชนสมฺปนฺโน, สาลราชาว ผุลฺลิโตฯ
[279]
‘‘รํสิชาลปริกฺขิตฺโต, ทิตฺโตว กนกาจโล;
พฺยามปฺปภาปริวุโต, สตรํสี ทิวากโรฯ
[280]
‘‘โสณฺณานโน ชินวโร, สมณีว [รมฺมณีว (สฺยา.)] สิลุจฺจโย;
กรุณาปุณฺณหทโย, คุเณน วิย สาคโรฯ
[281]
‘‘โลกวิสฺสุตกิตฺติ จ, สิเนรูว นคุตฺตโม;
ยสสา วิตฺถโต วีโร, อากาสสทิโส มุนิฯ
[282]
‘‘อสงฺคจิตฺโต สพฺพตฺถ, อนิโล วิย นายโก;
ปติฏฺฐา สพฺพภูตานํ, มหีว มุนิสตฺตโมฯ
[283]
‘‘อนุปลิตฺโต โลเกน, โตเยน ปทุมํ ยถา;
กุวาทคจฺฉทหโน, อคฺคิขนฺโธว โสภสิ [โสภติ (สี.), โส วสิ (สฺยา. ก.)]ฯ
[284]
‘‘อคโธ วิย สพฺพตฺถ, กิเลสวิสนาสโก;
คนฺธมาทนเสโลว, คุณคนฺธวิภูสิโตฯ
[285]