‘‘ตโต วีมํสนตฺถํ เม, อาห พุทฺโธ วินายโก;

ตกฺกิกา ปนิมา คาถา, ฐานโส ปฏิภนฺติ ตํฯ

[135]

‘‘น กพฺพวิตฺโตหํ วีร, ฐานโส ปฏิภนฺติ มํ;

เตน หิ ทานิ วงฺคีส, ฐานโส สนฺถวาหิ มํฯ

[136]

‘‘ตทาหํ สนฺถวิํ วีรํ, คาถาหิ อิสิสตฺตมํ;

ฐานโส เม ตทา ตุฏฺโฐ, ชิโน อคฺเค ฐเปสิ มํฯ

[137]

‘‘ปฏิภาเนน จิตฺเตน, อญฺเญสมติมญฺญหํ;

เปสเล เตน สํวิคฺโค, อรหตฺตมปาปุณิํฯ

[138]

‘‘‘ปฏิภานวตํ อคฺโค, อญฺโญ โกจิ น วิชฺชติ;

ยถายํ ภิกฺขุ วงฺคีโส, เอวํ ธาเรถ ภิกฺขโว’ฯ

[139]

‘‘สตสหสฺเส กตํ กมฺมํ, ผลํ ทสฺเสสิ เม อิธ;

สุมุตฺโต สรเวโคว กิเลเส ฌาปยิํ มมฯ

[140]

‘‘กิเลสา ฌาปิตา มยฺหํ…เป.… วิหรามิ อนาสโวฯ

[141]

‘‘สฺวาคตํ วต เม อาสิ…เป.… กตํ พุทฺธสฺส สาสนํฯ

[142]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา วงฺคีโส เถโร อิมา คาถาโย

อภาสิตฺถาติฯ

วงฺคีสตฺเถรสฺสาปทานํ จตุตฺถํฯ

5. นนฺทกตฺเถรอปทานํ

[143]

‘‘ปทุมุตฺตโร นาม ชิโน, สพฺพธมฺเมสุ จกฺขุมา;

อิโต สตสหสฺสมฺหิ, กปฺเป อุปฺปชฺชิ นายโกฯ

[144]

‘‘หิตาย สพฺพสตฺตานํ, สุขาย วทตํ วโร;

อตฺถาย ปุริสาชญฺโญ, ปฏิปนฺโน สเทวเกฯ

[145]

‘‘ยสคฺคปตฺโต สิริมา, กิตฺติวณฺณภโต [กิตฺติวณฺณ ภโฏ (สฺยา. ก.)] ชิโน;

ปูชิโต สพฺพโลกสฺส, ทิสา สพฺพาสุ วิสฺสุโตฯ

[146]

‘‘อุตฺติณฺณวิจิกิจฺโฉ โส, วีติวตฺตกถํกโถ;

ปริปุณฺณมนสงฺกปฺโป, ปตฺโต สมฺโพธิมุตฺตมํฯ

[147]

‘‘อนุปฺปนฺนสฺส มคฺคสฺส, อุปฺปาเทตา นรุตฺตโม;

อนกฺขาตญฺจ อกฺขาสิ, อสญฺชาตญฺจ สญฺชนีฯ

[148]

‘‘มคฺคญฺญู มคฺควิทู [โส มคฺควิทู (สี. ปี.)] จ, มคฺคกฺขายี นราสโภ;

มคฺคสฺส กุสโล สตฺถา, สารถีนํ วรุตฺตโม [นรุตฺตโม (สฺยา.)]ฯ

[149]

‘‘ตทา มหาการุณิโก, ธมฺมํ เทเสสิ นายโก;

นิมุคฺเค กามปงฺกมฺหิ [โมหปงฺกมฺหิ (สี. สฺยา.), โมหมคฺคมฺหิ (ปี.)], สมุทฺธรติ ปาณิเนฯ

[150]

‘‘ภิกฺขุนีนํ โอวทเน, สาวกํ เสฏฺฐสมฺมตํ;

วณฺณยํ เอตทคฺคมฺหิ, ปญฺญเปสิ มหามุนิฯ

[151]

‘‘ตํ สุตฺวาหํ ปมุทิโต, นิมนฺเตตฺวา ตถาคตํ;

โภชยิตฺวา สสงฺฆํ ตํ, ปตฺถยิํ ฐานมุตฺตมํฯ

[152]

‘‘ตทา ปมุทิโต นาโถ, มํ อโวจ มหาอิสิ;

‘สุขี ภวสฺสุ ทีฆาวุ [ทีฆายุ (สี. สฺยา.)], ลจฺฉเส ตํ มโนรถํฯ

[153]

‘‘‘สตสหสฺสิโต กปฺเป, โอกฺกากกุลสมฺภโว;

โคตโม นาม โคตฺเตน, สตฺถา โลเก ภวิสฺสติฯ

[154]

‘‘‘ตสฺส ธมฺเมสุ ทายาโท, โอรโส ธมฺมนิมฺมิโต;

นนฺทโก นาม นาเมน, เหสฺสติ สตฺถุ สาวโก’ฯ

[155]

‘‘เตน กมฺเมน สุกเตน, เจตนาปณิธีหิ จ;

ชหิตฺวา มานุสํ เทหํ, ตาวติํสูปโค อหํฯ

[156]

‘‘ปจฺฉิเม จ ภเว ทานิ, ชาโต เสฏฺฐิกุเล อหํ;

สาวตฺถิยํ ปุเร วเร, อิทฺเธ ผีเต มหทฺธเนฯ

[157]

‘‘ปุรปฺปเวเส สุคตํ, ทิสฺวา วิมฺหิตมานโส;

เชตารามปฏิคฺคาเห, ปพฺพชิํ อนคาริยํฯ

[158]

‘‘นจิเรเนว กาเลน, อรหตฺตมปาปุณิํ;

ตโตหํ ติณฺณสํสาโร, สาสิโต สพฺพทสฺสินาฯ

[159]

‘‘ภิกฺขุนีนํ ธมฺมกถํ, ปฏิปุจฺฉากริํ อหํ;

สาสิตา ตา มยา สพฺพา, อภวิํสุ อนาสวาฯ

[160]

‘‘สตานิ ปญฺจนูนานิ, ตทา ตุฏฺโฐ มหาหิโต;

ภิกฺขุนีนํ โอวทตํ, อคฺคฏฺฐาเน ฐเปสิ มํฯ

[161]

‘‘สตสหสฺเส กตํ กมฺมํ, ผลํ ทสฺเสสิ เม อิธ;

สุมุตฺโต สรเวโคว, กิเลเส ฌาปยิํ มมฯ

[162]

‘‘กิเลสา ฌาปิตา มยฺหํ…เป.… วิหรามิ อนาสโวฯ

[163]

‘‘สฺวาคตํ วต เม อาสิ…เป.… กตํ พุทฺธสฺส สาสนํฯ

[164]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา นนฺทโก เถโร อิมา คาถาโย

อภาสิตฺถาติฯ

นนฺทกตฺเถรสฺสาปทานํ ปญฺจมํฯ

6. กาฬุทายิตฺเถรอปทานํ

[165]

‘‘ปทุมุตฺตโร นาม ชิโน, สพฺพธมฺเมสุ จกฺขุมา;

อิโต สตสหสฺสมฺหิ, กปฺเป อุปฺปชฺชิ นายโกฯ

[166]

‘‘นายกานํ วโร สตฺถา, คุณาคุณวิทู ชิโน;

กตญฺญู กตเวที จ, ติตฺเถ โยเชติ ปาณิเน [ปาณิโน (สี. สฺยา ปี.)]ฯ

[167]

‘‘สพฺพญฺญุเตน ญาเณน, ตุลยิตฺวา ทยาสโย;

เทเสติ ปวรํ ธมฺมํ, อนนฺตคุณสญฺจโยฯ

[168]

‘‘ส กทาจิ มหาวีโร, อนนฺตชินสํสริ [อนนฺตชนสํสทิ (สี.), อนนฺตชนสํสุธิ (สฺยา.), อนนฺตชนสํสรี (ปี.)];

เทเสติ มธุรํ ธมฺมํ, จตุสจฺจูปสญฺหิตํฯ

[169]

‘‘สุตฺวาน ตํ ธมฺมวรํ, อาทิมชฺฌนฺตโสภณํ;

ปาณสตสหสฺสานํ, ธมฺมาภิสมโย อหุฯ

[170]

‘‘นินฺนาทิตา ตทา ภูมิ, คชฺชิํสุ จ ปโยธรา;

สาธุการํ ปวตฺติํสุ, เทวพฺรหฺมนราสุราฯ

[171]