‘‘‘ยา กาจิ กงฺขา อิธ วา หุรํ วา, สกเวทิยา วา ปรเวทิยา วา;
เย ฌายิโน ตา ปชหนฺติ สพฺพา, อาตาปิโน พฺรหฺมจริยํ จรนฺตา’ฯ
[49]
‘‘สตสหสฺเส กตํ กมฺมํ, ผลํ ทสฺเสสิ เม อิธ;
สุมุตฺโต สรเวโคว กิเลเส ฌาปยิํ มมฯ
[50]
‘‘ตโต ฌานรตํ ทิสฺวา, พุทฺโธ โลกนฺตคู มุนิ;
ฌายีนํ ภิกฺขูนํ อคฺโค, ปญฺญาเปติ มหามติฯ
[51]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[52]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[53]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา กงฺขาเรวโต เถโร อิมา คาถาโย
อภาสิตฺถาติฯ
กงฺขาเรวตตฺเถรสฺสาปทานํ ทุติยํฯ
3. สีวลิตฺเถรอปทานํ
[54]
‘‘ปทุมุตฺตโร นาม ชิโน, สพฺพธมฺเมสุ จกฺขุมา;
อิโต สตสหสฺสมฺหิ, กปฺเป อุปฺปชฺชิ นายโกฯ
[55]
‘‘สีลํ ตสฺส อสงฺเขยฺยํ, สมาธิ วชิรูปโม;
อสงฺเขยฺยํ ญาณวรํ, วิมุตฺติ จ อโนปมาฯ
[56]
‘‘มนุชามรนาคานํ, พฺรหฺมานญฺจ สมาคเม;
สมณพฺราหฺมณากิณฺเณ, ธมฺมํ เทเสสิ นายโกฯ
[57]
‘‘สสาวกํ มหาลาภิํ, ปุญฺญวนฺตํ ชุตินฺธรํ;
ฐเปสิ เอตทคฺคมฺหิ, ปริสาสุ วิสารโทฯ
[58]
‘‘ตทาหํ ขตฺติโย อาสิํ, นคเร หํสสวฺหเย;
สุตฺวา ชินสฺส ตํ วากฺยํ, สาวกสฺส คุณํ พหุํฯ
[59]