‘‘จุลฺลาสีติสหสฺสานิ , หตฺถิโน สมลงฺกตา;
ติธาปภินฺนมาตงฺคา, กุญฺชรา สฏฺฐิหายนาฯ
[149]
‘‘เหมชาลาภิสญฺฉนฺนา , อุปฏฺฐานํ กโรนฺติ เม;
พลกาเย คเช เจว, อูนตา เม น วิชฺชติฯ
[150]
‘‘โสณฺณกิงฺกณิปุปฺผานํ, วิปากํ อนุโภมหํ;
อฏฺฐปญฺญาสกฺขตฺตุญฺจ, เทวรชฺชมการยิํฯ
[151]
‘‘เอกสตฺตติกฺขตฺตุญฺจ, จกฺกวตฺตี อโหสหํ;
ปถพฺยา รชฺชํ เอกสตํ, มหิยา การยิํ อหํฯ
[152]
‘‘โส ทานิ อมตํ ปตฺโต, อสงฺขตํ สุทุทฺทสํ [คมฺภีรํ ทุทฺทสํ ปทํ (สฺยา.)];
สํโยชนปริกฺขีโณ, นตฺถิ ทานิ ปุนพฺภโวฯ
[153]
‘‘อฏฺฐารเส กปฺปสเต, ยํ ปุปฺผมภิโรปยิํ;
ทุคฺคติํ นาภิชานามิ, พุทฺธปูชายิทํ ผลํฯ
[154]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[155]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[156]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา โสวณฺณกิงฺกณิโย เถโร อิมา
คาถาโย อภาสิตฺถาติฯ
โสวณฺณกิงฺกณิยตฺเถรสฺสาปทานํ นวมํฯ
10. โสณฺณโกนฺตริกตฺเถรอปทานํ
[157]
‘‘มโนภาวนิยํ พุทฺธํ, อตฺตทนฺตํ สมาหิตํ;
อิริยมานํ พฺรหฺมปเถ, จิตฺตวูปสเม รตํฯ
[158]
‘‘นิตฺติณฺณโอฆํ สมฺพุทฺธํ, ฌายิํ ฌานรตํ มุนิํ;
อุปติตฺถํ สมาปนฺนํ, อินฺทิวรทลปฺปภํฯ
[159]
‘‘อลาพุโนทกํ คยฺห, พุทฺธเสฏฺฐํ อุปาคมิํ;
พุทฺธสฺส ปาเท โธวิตฺวา, อลาพุกมทาสหํฯ
[160]
‘‘อาณาเปสิ จ สมฺพุทฺโธ, ปทุมุตฺตรนามโก;
‘อิมินา ทกมาหตฺวา, ปาทมูเล ฐเปหิ เม’ฯ
[161]
‘‘สาธูติหํ ปฏิสฺสุตฺวา, สตฺถุคารวตาย จ;
ทกํ อลาพุนาหตฺวา, พุทฺธเสฏฺฐํ อุปาคมิํฯ
[162]
‘‘อนุโมทิ มหาวีโร, จิตฺตํ นิพฺพาปยํ มม;
‘อิมินาลาพุทาเนน, สงฺกปฺโป เต สมิชฺฌตุ’ฯ
[163]
‘‘ปนฺนรเสสุ กปฺเปสุ, เทวโลเก รมิํ อหํ;
ติํสติกฺขตฺตุํ ราชา จ, จกฺกวตฺตี อโหสหํฯ
[164]
‘‘ทิวา วา ยทิ วา รตฺติํ, จงฺกมนฺตสฺส ติฏฺฐโต;
โสวณฺณํ โกนฺตรํ คยฺห, ติฏฺฐเต ปุรโต มมฯ
[165]
‘‘พุทฺธสฺส ทตฺวานลาพุํ, ลภามิ โสณฺณโกนฺตรํ;
อปฺปกมฺปิ กตํ การํ, วิปุลํ โหติ ตาทิสุฯ
[166]
‘‘สตสหสฺสิโต กปฺเป, ยํลาพุมททิํ ตทา;
ทุคฺคติํ นาภิชานามิ, อลาพุสฺส อิทํ ผลํฯ
[167]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[168]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[169]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา โสณฺณโกนฺตริโก เถโร อิมา
คาถาโย อภาสิตฺถาติฯ
โสณฺณโกนฺตริกตฺเถรสฺสาปทานํ ทสมํฯ
สกิํสมฺมชฺชกวคฺโค เตจตฺตาลีสโมฯ
ตสฺสุทฺทานํ –
สกิํสมฺมชฺชโก เถโร, เอกทุสฺสี เอกาสนี;
กทมฺพโกรณฺฑกโท, ฆตสฺสวนิโกปิ จฯ
สุจินฺติโก กิงฺกณิโก, โสณฺณโกนฺตริโกปิ จ;
เอกคาถาสตญฺเจตฺถ, เอกสตฺตติเมว จฯ
44. เอกวิหาริวคฺโค