‘‘สตสหสฺสิโต กปฺเป, ยํ ทานมททิํ ตทา;

ทุคฺคติํ นาภิชานามิ, นวสสฺสสฺสิทํ ผลํฯ

[137]

‘‘กิเลสา ฌาปิตา มยฺหํ…เป.… วิหรามิ อนาสโว;

[138]

‘‘สฺวาคตํ วต เม อาสิ…เป.… กตํ พุทฺธสฺส สาสนํฯ

[139]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สุจินฺติโต เถโร อิมา คาถาโย

อภาสิตฺถาติฯ

สุจินฺติตตฺเถรสฺสาปทานํ อฏฺฐมํฯ

9. โสวณฺณกิงฺกณิยตฺเถรอปทานํ

[140]

‘‘สทฺธาย อภินิกฺขมฺม, ปพฺพชิํ อนคาริยํ;

วากจีรธโร อาสิํ, ตโปกมฺมมปสฺสิโตฯ

[141]

‘‘อตฺถทสฺสี ตุ ภควา, โลกเชฏฺโฐ นราสโภ;

อุปฺปชฺชิ ตมฺหิ สมเย, ตารยนฺโต มหาชนํฯ

[142]

‘‘พลญฺจ วต เม ขีณํ, พฺยาธินา ปรเมน ตํ;

พุทฺธเสฏฺฐํ สริตฺวาน, ปุลิเน ถูปมุตฺตมํฯ

[143]

‘‘กริตฺวา หฏฺฐจิตฺโตหํ, สหตฺเถน [ปสาเทน (ก.)] สโมกิริํ;

โสณฺณกิงฺกณิปุปฺผานิ, อุทคฺคมนโส อหํฯ

[144]

‘‘สมฺมุขา วิย สมฺพุทฺธํ, ถูปํ ปริจริํ อหํ;

เตน เจโตปสาเทน, อตฺถทสฺสิสฺส ตาทิโนฯ

[145]

‘‘เทวโลกํ คโต สนฺโต, ลภามิ วิปุลํ สุขํ;

สุวณฺณวณฺโณ ตตฺถาสิํ, พุทฺธปูชายิทํ ผลํฯ

[146]

‘‘อสีติโกฏิโย มยฺหํ, นาริโย สมลงฺกตา;

สทา มยฺหํ อุปฏฺฐนฺติ, พุทฺธปูชายิทํ ผลํฯ

[147]

‘‘สฏฺฐิตุริยสหสฺสานิ [สฏฺฐิตูริย… (ก.)], เภริโย ปณวานิ จ;

สงฺขา จ ฑิณฺฑิมา ตตฺถ, วคฺคู วชฺชนฺติ [นทนฺติ (สี.), วทนฺติ (ปี.)] ทุนฺทุภีฯ

[148]

‘‘จุลฺลาสีติสหสฺสานิ , หตฺถิโน สมลงฺกตา;

ติธาปภินฺนมาตงฺคา, กุญฺชรา สฏฺฐิหายนาฯ

[149]

‘‘เหมชาลาภิสญฺฉนฺนา , อุปฏฺฐานํ กโรนฺติ เม;

พลกาเย คเช เจว, อูนตา เม น วิชฺชติฯ

[150]

‘‘โสณฺณกิงฺกณิปุปฺผานํ, วิปากํ อนุโภมหํ;

อฏฺฐปญฺญาสกฺขตฺตุญฺจ, เทวรชฺชมการยิํฯ

[151]

‘‘เอกสตฺตติกฺขตฺตุญฺจ, จกฺกวตฺตี อโหสหํ;

ปถพฺยา รชฺชํ เอกสตํ, มหิยา การยิํ อหํฯ

[152]

‘‘โส ทานิ อมตํ ปตฺโต, อสงฺขตํ สุทุทฺทสํ [คมฺภีรํ ทุทฺทสํ ปทํ (สฺยา.)];

สํโยชนปริกฺขีโณ, นตฺถิ ทานิ ปุนพฺภโวฯ

[153]

‘‘อฏฺฐารเส กปฺปสเต, ยํ ปุปฺผมภิโรปยิํ;

ทุคฺคติํ นาภิชานามิ, พุทฺธปูชายิทํ ผลํฯ

[154]

‘‘กิเลสา ฌาปิตา มยฺหํ…เป.… วิหรามิ อนาสโวฯ

[155]

‘‘สฺวาคตํ วต เม อาสิ…เป.… กตํ พุทฺธสฺส สาสนํฯ

[156]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา โสวณฺณกิงฺกณิโย เถโร อิมา

คาถาโย อภาสิตฺถาติฯ

โสวณฺณกิงฺกณิยตฺเถรสฺสาปทานํ นวมํฯ

10. โสณฺณโกนฺตริกตฺเถรอปทานํ

[157]

‘‘มโนภาวนิยํ พุทฺธํ, อตฺตทนฺตํ สมาหิตํ;

อิริยมานํ พฺรหฺมปเถ, จิตฺตวูปสเม รตํฯ

[158]

‘‘นิตฺติณฺณโอฆํ สมฺพุทฺธํ, ฌายิํ ฌานรตํ มุนิํ;

อุปติตฺถํ สมาปนฺนํ, อินฺทิวรทลปฺปภํฯ

[159]

‘‘อลาพุโนทกํ คยฺห, พุทฺธเสฏฺฐํ อุปาคมิํ;

พุทฺธสฺส ปาเท โธวิตฺวา, อลาพุกมทาสหํฯ

[160]