‘‘สุมหาปริสมชฺเฌ , ตทา มํ จรณนฺตโค;
อคฺคํ สทฺธาธิมุตฺตานํ, ปญฺญเปสิ มหามติฯ
[62]
‘‘สตสหสฺสิโต กปฺเป, ยํ กมฺมมกริํ ตทา;
ทุคฺคติํ นาภิชานามิ, พุทฺธปูชายิทํ ผลํฯ
[63]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[64]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[65]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา วกฺกลิตฺเถโร อิมา คาถาโย
อภาสิตฺถาติฯ
วกฺกลิตฺเถรสฺสาปทานํ ทุติยํฯ
3. มหากปฺปินตฺเถรอปทานํ
[66]
‘‘ปทุมุตฺตโร นาม ชิโน, สพฺพธมฺมาน ปารคู;
อุทิโต อชฏากาเส [ชคทากาเส (สี.), ชลทากาเส (ปี.)], รวีว สรทมฺพเรฯ
[67]
‘‘วจนาภาย โพเธติ, เวเนยฺยปทุมานิ โส;
กิเลสปงฺกํ โสเสติ, มติรํสีหิ นายโกฯ
[68]
‘‘ติตฺถิยานํ ยเส [ยโส (สี. ปี.)] หนฺติ, ขชฺโชตาภา ยถา รวิ;
สจฺจตฺถาภํ ปกาเสติ, รตนํว ทิวากโรฯ
[69]
‘‘คุณานํ อายติภูโต, รตนานํว สาคโร;
ปชฺชุนฺโนริว ภูตานิ, ธมฺมเมเฆน วสฺสติฯ
[70]
‘‘อกฺขทสฺโส ตทา อาสิํ, นคเร หํสสวฺหเย;
อุเปจฺจ ธมฺมมสฺโสสิํ, ชลชุตฺตมนามิโนฯ
[71]
‘‘โอวาทกสฺส ภิกฺขูนํ, สาวกสฺส กตาวิโน;
คุณํ ปกาสยนฺตสฺส, ตปฺปยนฺตสฺส [โตสยนฺตสฺส (สี.), หาสยนฺตสฺส (สฺยา.), วาสยนฺตสฺส (ปี.)] เม มนํฯ
[72]
‘‘สุตฺวา ปตีโต สุมโน, นิมนฺเตตฺวา ตถาคตํ;
สสิสฺสํ โภชยิตฺวาน, ตํ ฐานมภิปตฺถยิํฯ
[73]
‘‘ตทา หํสสมภาโค, หํสทุนฺทุภินิสฺสโน [หํสทุนฺทุภิสุสฺสโร (สี.)];
ปสฺสเถตํ มหามตฺตํ, วินิจฺฉยวิสารทํฯ
[74]
‘‘ปติตํ ปาทมูเล เม, สมุคฺคตตนูรุหํ;
ชีมูตวณฺณํ ปีณํสํ, ปสนฺนนยนานนํฯ
[75]
‘‘ปริวาเรน มหตา, ราชยุตฺตํ มหายสํ;
เอโส กตาวิโน ฐานํ, ปตฺเถติ มุทิตาสโยฯ
[76]
‘‘‘อิมินา ปณิปาเตน, จาเคน ปณิธีหิ จ [ปิณฺฑปาเตน, เจตนา ปณิธีหิ จ (สี.)];
กปฺปสตสหสฺสานิ, นุปปชฺชติ ทุคฺคติํฯ
[77]
‘‘‘เทเวสุ เทวโสภคฺคํ, มนุสฺเสสุ มหนฺตตํ;
อนุโภตฺวาน เสเสน [อภุตฺวาว เสเสน (สี.), อนุโภตฺวาว เสเสน (สฺยา.)], นิพฺพานํ ปาปุณิสฺสติฯ
[78]
‘‘‘สตสหสฺสิโต กปฺเป, โอกฺกากกุลสมฺภโว;
โคตโม นาม โคตฺเตน, สตฺถา โลเก ภวิสฺสติฯ
[79]
‘‘‘ตสฺส ธมฺเมสุ ทายาโท, โอรโส ธมฺมนิมฺมิโต;
กปฺปิโน นาม นาเมน, เหสฺสติ สตฺถุ สาวโก’ฯ
[80]
‘‘ตโตหํ สุกตํ การํ, กตฺวาน ชินสาสเน;
ชหิตฺวา มานุสํ เทหํ, ตุสิตํ อคมาสหํฯ
[81]
‘‘เทวมานุสรชฺชานิ, สตโส อนุสาสิย;
พาราณสิยมาสนฺเน, ชาโต เกนิยชาติยํฯ
[82]
‘‘สหสฺสปริวาเรน [สตสหสฺสปริวาโร (สฺยา.)], สปชาปติโก อหํ;
ปญฺจ ปจฺเจกพุทฺธานํ, สตานิ สมุปฏฺฐหิํฯ
[83]
‘‘เตมาสํ โภชยิตฺวาน, ปจฺฉาทมฺห ติจีวรํ;
ตโต จุตา มยํ สพฺเพ, อหุมฺห ติทสูปคาฯ
[84]
‘‘ปุโน สพฺเพ มนุสฺสตฺตํ, อคมิมฺห ตโต จุตา;
กุกฺกุฏมฺหิ ปุเร ชาตา, หิมวนฺตสฺส ปสฺสโตฯ
[85]
‘‘กปฺปิโน นามหํ อาสิํ, ราชปุตฺโต มหายโส;
เสสามจฺจกุเล ชาตา, มเมว ปริวารยุํฯ
[86]
‘‘มหารชฺชสุขํ ปตฺโต, สพฺพกามสมิทฺธิมา;
วาณิเชหิ สมกฺขาตํ, พุทฺธุปฺปาทมหํ สุณิํฯ
[87]
‘‘‘พุทฺโธ โลเก สมุปฺปนฺโน, อสโม เอกปุคฺคโล;
โส ปกาเสติ สทฺธมฺมํ, อมตํ สุขมุตฺตมํฯ
[88]
‘‘‘สุยุตฺตา ตสฺส สิสฺสา จ, สุมุตฺตา จ อนาสวา’;
‘‘สุตฺวา เนสํ สุวจนํ, สกฺกริตฺวาน วาณิเชฯ
[89]
‘‘ปหาย รชฺชํ สามจฺโจ, นิกฺขมิํ พุทฺธมามโก;
นทิํ ทิสฺวา มหาจนฺทํ, ปูริตํ สมติตฺติกํฯ
[90]
‘‘อปฺปติฏฺฐํ อนาลมฺพํ, ทุตฺตรํ สีฆวาหินิํ;
คุณํ สริตฺวา พุทฺธสฺส, โสตฺถินา สมติกฺกมิํฯ
[91]
‘‘‘ภวโสตํ สเจ พุทฺโธ, ติณฺโณ โลกนฺตคู วิทู [วิภู (ก.)];
เอเตน สจฺจวชฺเชน, คมนํ เม สมิชฺฌตุฯ
[92]
‘‘‘ยทิ สนฺติคโม มคฺโค, โมกฺโข จจฺจนฺติกํ [โมกฺขทํ สนฺติกํ (สฺยา.)] สุขํ;
เอเตน สจฺจวชฺเชน, คมนํ เม สมิชฺฌตุฯ
[93]
‘‘‘สงฺโฆ เจ ติณฺณกนฺตาโร, ปุญฺญกฺเขตฺโต อนุตฺตโร;
เอเตน สจฺจวชฺเชน, คมนํ เม สมิชฺฌตุ’ฯ
[94]
‘‘สห กเต สจฺจวเร, มคฺคา อปคตํ ชลํ;
ตโต สุเขน อุตฺติณฺโณ, นทีตีเร มโนรเมฯ
[95]
‘‘นิสินฺนํ อทฺทสํ พุทฺธํ, อุเทนฺตํว ปภงฺกรํ;
ชลนฺตํ เหมเสลํว, ทีปรุกฺขํว โชติตํฯ
[96]
‘‘สสิํว ตาราสหิตํ, สาวเกหิ ปุรกฺขตํ;
วาสวํ วิย วสฺสนฺตํ, เทสนาชลทนฺตรํ [เทเวน ชลนนฺทนํ (สฺยา. ปี.)]ฯ
[97]
‘‘วนฺทิตฺวาน สหามจฺโจ, เอกมนฺตมุปาวิสิํ;
ตโต โน อาสยํ [ตโต อชฺฌาสยํ (สฺยา.)] ญตฺวา, พุทฺโธ ธมฺมมเทสยิฯ
[98]
‘‘สุตฺวาน ธมฺมํ วิมลํ, อโวจุมฺห มยํ ชินํ;
‘ปพฺพาเชหิ มหาวีร, นิพฺพินฺทามฺห [นิพฺพินฺนามฺห (สี. ปี.), โอติณฺณมฺห (สฺยา.)] มยํ ภเว’ฯ
[99]
‘‘‘สฺวกฺขาโต ภิกฺขเว ธมฺโม, ทุกฺขนฺตกรณาย โว;
จรถ พฺรหฺมจริยํ’, อิจฺจาห มุนิสตฺตโมฯ
[100]
‘‘สห วาจาย สพฺเพปิ, ภิกฺขุเวสธรา มยํ;
อหุมฺห อุปสมฺปนฺนา, โสตาปนฺนา จ สาสเนฯ
[101]
‘‘ตโต เชตวนํ คนฺตฺวา, อนุสาสิ วินายโก;
อนุสิฏฺโฐ ชิเนนาหํ, อรหตฺตมปาปุณิํฯ
[102]
‘‘ตโต ภิกฺขุสหสฺสานิ [ภิกฺขุสหสฺสํ ตํ (สี. ปี.)], อนุสาสิมหํ ตทา;
มมานุสาสนกรา, เตปิ อาสุํ อนาสวาฯ
[103]
‘‘ชิโน ตสฺมิํ คุเณ ตุฏฺโฐ, เอตทคฺเค ฐเปสิ มํ;
ภิกฺขุโอวาทกานคฺโค, กปฺปิโนติ มหาชเนฯ
[104]
‘‘สตสหสฺเส กตํ กมฺมํ, ผลํ ทสฺเสสิ เม อิธ;
ปมุตฺโต สรเวโคว, กิเลเส ฌาปยิํ [ฌาปยี (สี.)] มมฯ
[105]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[106]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[107]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา มหากปฺปิโน เถโร อิมา คาถาโย
อภาสิตฺถาติฯ
มหากปฺปินตฺเถรสฺสาปทานํ ตติยํฯ
4. ทพฺพมลฺลปุตฺตตฺเถรอปทานํ
[108]
‘‘ปทุมุตฺตโร นาม ชิโน, สพฺพโลกวิทู มุนิ;
อิโต สตสหสฺสมฺหิ, กปฺเป อุปฺปชฺชิ จกฺขุมาฯ
[109]
‘‘โอวาทโก วิญฺญาปโก, ตารโก สพฺพปาณินํ;
เทสนากุสโล พุทฺโธ, ตาเรสิ ชนตํ พหุํฯ
[110]