1. มหากจฺจายนตฺเถรอปทานํ
[1]
‘‘ปทุมุตฺตโร นาม ชิโน, อเนโช อชิตํ ชโย;
สตสหสฺเส กปฺปานํ, อิโต อุปฺปชฺชิ นายโกฯ
[2]
‘‘วีโร กมลปตฺตกฺโข, สสงฺกวิมลานโน;
กนกาจลสงฺกาโส [กญฺจนตจสงฺกาโส (สฺยา.)], รวิทิตฺติสมปฺปโภฯ
[3]
‘‘สตฺตเนตฺตมโนหารี, วรลกฺขณภูสิโต;
สพฺพวากฺยปถาตีโต, มนุชามรสกฺกโตฯ
[4]
‘‘สมฺพุทฺโธ โพธยํ สตฺเต, วาคีโส มธุรสฺสโร;
กรุณานิพนฺธสนฺตาโน, ปริสาสุ วิสารโทฯ
[5]
‘‘เทเสติ มธุรํ ธมฺมํ, จตุสจฺจูปสํหิตํ;
นิมุคฺเค โมหปงฺกมฺหิ, สมุทฺธรติ ปาณิเนฯ
[6]
‘‘ตทา เอกจโร หุตฺวา, ตาปโส หิมวาลโย;
นภสา มานุสํ โลกํ, คจฺฉนฺโต ชินมทฺทสํฯ
[7]
‘‘อุเปจฺจ สนฺติกํ ตสฺส, อสฺโสสิํ ธมฺมเทสนํ;
วณฺณยนฺตสฺส วีรสฺส, สาวกสฺส มหาคุณํฯ
[8]
‘‘สงฺขิตฺเตน มยา วุตฺตํ, วิตฺถาเรน ปกาสยํ;
ปริสํ มญฺจ โตเสติ, ยถา กจฺจายโน อยํฯ
[9]
‘‘‘นาหํ เอวมิเธกจฺจํ [เอวํวิธํ กญฺจิ (สี. ปี.)], อญฺญํ ปสฺสามิ สาวกํ;
ตสฺมาตทคฺเค [ตสฺเมตทคฺเค (สี.)] เอสคฺโค, เอวํ ธาเรถ ภิกฺขโว’ฯ
[10]
‘‘ตทาหํ วิมฺหิโต หุตฺวา, สุตฺวา วากฺยํ มโนรมํ;
หิมวนฺตํ คมิตฺวาน, อาหิตฺวา [อาหตฺวา (สี. ปี.)] ปุปฺผสญฺจยํฯ
[11]
‘‘ปูเชตฺวา โลกสรณํ, ตํ ฐานมภิปตฺถยิํ;
ตทา มมาสยํ ญตฺวา, พฺยากาสิ ส รณญฺชโหฯ
[12]
‘‘‘ปสฺสเถตํ อิสิวรํ, นิทฺธนฺตกนกตฺตจํ;
อุทฺธคฺคโลมํ ปีณํสํ, อจลํ ปญฺชลิํ ฐิตํฯ
[13]
‘‘‘หาสํ สุปุณฺณนยนํ, พุทฺธวณฺณคตาสยํ;
ธมฺมชํ อุคฺคหทยํ [ธมฺมํว วิคฺคหวรํ (สี.), ธมฺมปฏิคฺคหวรํ (ปี.)], อมตาสิตฺตสนฺนิภํ’ฯ
[14]
‘‘กจฺจานสฺส คุณํ สุตฺวา, ตํ ฐานํ ปตฺถยํ ฐิโต;
อนาคตมฺหิ อทฺธาเน, โคตมสฺส มหามุเนฯ
[15]
‘‘ตสฺส ธมฺเมสุ ทายาโท, โอรโส ธมฺมนิมฺมิโต;
กจฺจาโน นาม นาเมน, เหสฺสติ สตฺถุ สาวโกฯ
[16]
‘‘พหุสฺสุโต มหาญาณี, อธิปฺปายวิทู มุเน;
ปาปุณิสฺสติ ตํ ฐานํ, ยถายํ พฺยากโต มยาฯ
[17]
‘‘สตสหสฺสิโต กปฺเป, ยํ กมฺมมกริํ ตทา;
ทุคฺคติํ นาภิชานามิ, พุทฺธปูชายิทํ ผลํฯ
[18]
‘‘ทุเว ภเว สํสรามิ, เทวตฺเต อถ มานุเส;
อญฺญํ คติํ น คจฺฉามิ, พุทฺธปูชายิทํ ผลํฯ
[19]
‘‘ทุเว กุเล ปชายามิ, ขตฺติเย อถ พฺราหฺมเณ;
นีเจ กุเล น ชายามิ, พุทฺธปูชายิทํ ผลํฯ
[20]
‘‘ปจฺฉิเม จ ภเว ทานิ, ชาโต อุชฺเชนิยํ ปุเร [ชาโต, อุชฺเชนิยํ ปุเร รเม (สฺยา.)];
ปชฺโชตสฺส จ จณฺฑสฺส, ปุโรหิตทิชาธิโน [ปุโรหิตทิชาติโน (สี. ปี.)]ฯ
[21]
‘‘ปุตฺโต ติริฏิวจฺฉสฺส [ติริฏวจฺฉสฺส (สี.), ติปิติวจฺฉสฺส (สฺยา.)], นิปุโณ เวทปารคู;
มาตา จ จนฺทิมา นาม, กจฺจาโนหํ วรตฺตโจฯ
[22]
‘‘วีมํสนตฺถํ พุทฺธสฺส, ภูมิปาเลน เปสิโต;
ทิสฺวา โมกฺขปุรทฺวารํ, นายกํ คุณสญฺจยํฯ
[23]
‘‘สุตฺวา จ วิมลํ วากฺยํ, คติปงฺกวิโสสนํ;
ปาปุณิํ อมตํ สนฺตํ, เสเสหิ สห สตฺตหิฯ
[24]
‘‘อธิปฺปายวิทู ชาโต, สุคตสฺส มหามเต;
ฐปิโต เอตทคฺเค จ, สุสมิทฺธมโนรโถฯ
[25]
‘‘กิเลสา ฌาปิตา มยฺหํ, ภวา สพฺเพ สมูหตา;
นาโคว พนฺธนํ เฉตฺวา, วิหรามิ อนาสโวฯ
[26]
‘‘สฺวาคตํ วต เม อาสิ, มม พุทฺธสฺส สนฺติเก;
‘‘สฺวาคตํ วต เม อาสิ, มม พุทฺธสฺส สนฺติเก; ติสฺโส วิชฺชา อนุปฺปตฺตา, กตํ พุทฺธสฺส สาสนํฯ
[27]
‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
อิตฺถํ สุทํ อายสฺมา มหากจฺจายโน เถโร อิมา คาถาโย
อภาสิตฺถาติฯ
มหากจฺจายนตฺเถรสฺสาปทานํ ปฐมํฯ
2. วกฺกลิตฺเถรอปทานํ
[28]
‘‘อิโต สตสหสฺสมฺหิ, กปฺเป อุปฺปชฺชิ นายโก;
อโนมนาโม อมิโต, นาเมน ปทุมุตฺตโรฯ
[29]
‘‘ปทุมาการวทโน, ปทุมามลสุจฺฉวี;
โลเกนานุปลิตฺโตว โตเยน ปทุมํ ยถาฯ
[30]
‘‘วีโร ปทุมปตฺตกฺโข, กนฺโต จ ปทุมํ ยถา;
ปทุมุตฺตรคนฺโธว, ตสฺมา โส ปทุมุตฺตโรฯ
[31]
‘‘โลกเชฏฺโฐ จ นิมฺมาโน, อนฺธานํ นยนูปโม;
สนฺตเวโส คุณนิธิ, กรุณามติสาคโรฯ
[32]
‘‘ส กทาจิ มหาวีโร, พฺรหฺมาสุรสุรจฺจิโต;
สเทวมนุชากิณฺเณ, ชนมชฺเฌ ชินุตฺตโม [ชนุตฺตโม (สฺยา. ปี.), อนุตฺตโม (ก.) วงฺคีสตฺเถราปทาเนปิ]ฯ
[33]
‘‘วทเนน สุคนฺเธน, มธุเรน รุเตน จ;
รญฺชยํ ปริสํ สพฺพํ, สนฺถวี สาวกํ สกํฯ
[34]
‘‘สทฺธาธิมุตฺโต สุมติ, มม ทสฺสนลาลโส [ทสฺสนสาลโย (สฺยา.)];
นตฺถิ เอตาทิโส อญฺโญ, ยถายํ ภิกฺขุ วกฺกลิฯ
[35]
‘‘ตทาหํ หํสวติยํ, นคเร พฺราหฺมณตฺรโช;
หุตฺวา สุตฺวา จ ตํ วากฺยํ, ตํ ฐานมภิโรจยิํฯ
[36]