7. คิริเนลปูชกตฺเถรอปทานํ
[42]
‘‘มิคลุทฺโท ปุเร อาสิํ, วิปิเน วิจรํ อหํ;
อทฺทสํ วิรชํ พุทฺธํ, สพฺพธมฺมาน ปารคุํฯ
[43]
‘‘ตสฺมิํ มหาการุณิเก, สพฺพสตฺตหิเต รเต;
ปสนฺนจิตฺโต สุมโน, เนลปุปฺผมปูชยิํฯ
[44]
‘‘เอกติํเส อิโต กปฺเป, ยํ ปุปฺผมภิปูชยิํ;
ทุคฺคติํ นาภิชานามิ, พุทฺธปูชายิทํ ผลํฯ
[45]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[46]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[47]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา คิริเนลปูชโก เถโร อิมา คาถาโย
อภาสิตฺถาติฯ
คิริเนลปูชกตฺเถรสฺสาปทานํ สตฺตมํฯ
8. โพธิสมฺมชฺชกตฺเถรอปทานํ
[48]
‘‘อหํ ปุเร โพธิปตฺตํ, อุชฺฌิตํ เจติยงฺคเณ;
ตํ คเหตฺวาน ฉฑฺเฑสิํ, อลภิํ วีสตีคุเณฯ
[49]
‘‘ตสฺส กมฺมสฺส เตเชน, สํสรนฺโต ภวาภเว;
ทุเว ภเว สํสรามิ, เทวตฺเต จาปิ มานุเสฯ
[50]
‘‘เทวโลกา จวิตฺวาน, อาคนฺตฺวา มานุสํ ภวํ;
ทุเว กุเล ปชายามิ, ขตฺติเย จาปิ พฺราหฺมเณฯ
[51]
‘‘องฺคปจฺจงฺคสมฺปนฺโน, อาโรหปริณาหวา;
อภิรูโป สุจิ โหมิ, สมฺปุณฺณงฺโค อนูนโกฯ
[52]
‘‘เทวโลเก มนุสฺเส วา, ชาโต วา ยตฺถ กตฺถจิ;
ภเว สุวณฺณวณฺโณ จ, อุตฺตตฺตกนกูปโมฯ
[53]
‘‘มุทุกา มทฺทวา สฺนิทฺธา [มุทุ มทฺทวา สินิทฺธา (สฺยา.)], สุขุมา สุกุมาริกา;
ฉวิ เม สพฺพทา โหติ, โพธิปตฺเต สุฉฑฺฑิเต [สุฉฑฺฑิเน (สี.)]ฯ
[54]
‘‘ยโต กุโตจิ คตีสุ, สรีเร สมุทาคเต;
น ลิมฺปติ รโชชลฺลํ, วิปาโก ปตฺตฉฑฺฑิเตฯ
[55]
‘‘อุณฺเห วาตาตเป ตสฺส, อคฺคิตาเปน วา ปน;
คตฺเต เสทา น มุจฺจนฺติ, วิปาโก ปตฺตฉฑฺฑิเตฯ
[56]
‘‘กุฏฺฐํ คณฺโฑ กิลาโส จ, ติลกา ปิฬกา ตถา;
น โหนฺติ กาเย ททฺทุ จ, วิปาโก ปตฺตฉฑฺฑิเตฯ
[57]
‘‘อปรมฺปิ คุณํ ตสฺส, นิพฺพตฺตติ ภวาภเว;
โรคา น โหนฺติ กายสฺมิํ, วิปาโก ปตฺตฉฑฺฑิเตฯ
[58]
‘‘อปรมฺปิ คุณํ ตสฺส, นิพฺพตฺตติ ภวาภเว;
น โหติ จิตฺตชา ปีฬา, วิปาโก ปตฺตฉฑฺฑิเตฯ
[59]
‘‘อปรมฺปิ คุณํ ตสฺส, นิพฺพตฺตติ ภวาภเว;
อมิตฺตา น ภวนฺตสฺส, วิปาโก ปตฺตฉฑฺฑิเตฯ
[60]
‘‘อปรมฺปิ คุณํ ตสฺส, นิพฺพตฺตติ ภวาภเว;
อนูนโภโค ภวติ, วิปาโก ปตฺตฉฑฺฑิเตฯ
[61]
‘‘อปรมฺปิ คุณํ ตสฺส, นิพฺพตฺตติ ภวาภเว;
อคฺคิราชูหิ โจเรหิ, น โหติ อุทเก ภยํฯ
[62]
‘‘อปรมฺปิ คุณํ ตสฺส, นิพฺพตฺตติ ภวาภเว;
ทาสิทาสา อนุจรา, โหนฺติ จิตฺตานุวตฺตกาฯ
[63]
‘‘ยมฺหิ อายุปฺปมาณมฺหิ, ชายเต มานุเส ภเว;
ตโต น หายเต อายุ, ติฏฺฐเต ยาวตายุกํฯ
[64]
‘‘อพฺภนฺตรา จ พาหิรา [พหิจรา (สี. ปี. ก.)], เนคมา จ สรฏฺฐกา;
นุยุตฺตา โหนฺติ สพฺเพปิ, วุทฺธิกามา สุขิจฺฉกาฯ
[65]
‘‘โภควา ยสวา โหมิ, สิริมา ญาติปกฺขวา;
อเปตภยสนฺตาโส, ภเวหํ สพฺพโต ภเวฯ
[66]
‘‘เทวา มนุสฺสา อสุรา, คนฺธพฺพา ยกฺขรกฺขสา;
สพฺเพ เต ปริรกฺขนฺติ, ภเว สํสรโต สทาฯ
[67]
‘‘เทวโลเก มนุสฺเส จ, อนุโภตฺวา อุโภ ยเส;
อวสาเน จ นิพฺพานํ, สิวํ ปตฺโต อนุตฺตรํฯ
[68]
‘‘สมฺพุทฺธมุทฺทิสิตฺวาน, โพธิํ วา ตสฺส สตฺถุโน;
โย ปุญฺญํ ปสเว โปโส, ตสฺส กิํ นาม ทุลฺลภํฯ
[69]
‘‘มคฺเค ผเล อาคเม จ, ฌานาภิญฺญาคุเณสุ จ;
อญฺเญสํ อธิโก หุตฺวา, นิพฺพายามิ อนาสโวฯ
[70]
‘‘ปุเรหํ โพธิยา ปตฺตํ, ฉฑฺเฑตฺวา หฏฺฐมานโส;
อิเมหิ วีสตงฺเคหิ, สมงฺคี โหมิ สพฺพทาฯ
[71]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[72]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[73]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา โพธิสมฺมชฺชโก เถโร อิมา คาถาโย
อภาสิตฺถาติฯ
โพธิสมฺมชฺชกตฺเถรสฺสาปทานํ อฏฺฐมํฯ
9. อามณฺฑผลทายกตฺเถรอปทานํ
[74]
‘‘ปทุมุตฺตโร นาม ชิโน, สพฺพธมฺมาน ปารคู;
วุฏฺฐหิตฺวา สมาธิมฺหา, จงฺกมี โลกนายโกฯ
[75]
‘‘ขาริภารํ คเหตฺวาน, อาหรนฺโต ผลํ ตทา;
อทฺทสํ วิรชํ พุทฺธํ, จงฺกมนฺตํ มหามุนิํฯ
[76]
‘‘ปสนฺนจิตฺโต สุมโน, สิเร กตฺวาน อญฺชลิํ;
สมฺพุทฺธํ อภิวาเทตฺวา, อามณฺฑมททิํ ผลํฯ
[77]
‘‘สตสหสฺสิโต กปฺเป, ยํ ผลํ อททิํ ตทา;
ทุคฺคติํ นาภิชานามิ, อามณฺฑสฺส อิทํ ผลํฯ
[78]