‘‘สห คาถํ สุณิตฺวาน, ปุพฺพสญฺญมนุสฺสริํ;
เอกาสเน นิสีทิตฺวา, อรหตฺตมปาปุณิํฯ
[102]
‘‘ชาติยา สตฺตวสฺเสน, อรหตฺตมปาปุณิํ;
อุปสมฺปาทยี พุทฺโธ, ธมฺมสฺสวนสฺสิทํ ผลํฯ
[103]
‘‘สตสหสฺสิโต กปฺเป, ยํ ธมฺมมสุณิํ ตทา;
ทุคฺคติํ นาภิชานามิ, ธมฺมสฺสวนสฺสิทํ ผลํฯ
[104]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[105]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[106]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา เอกธมฺมสฺสวนิโย เถโร อิมา
คาถาโย อภาสิตฺถาติฯ
เอกธมฺมสฺสวนิยตฺเถรสฺสาปทานํ สตฺตมํฯ
8. สุจินฺติตตฺเถรอปทานํ
[107]
‘‘นคเร หํสวติยา, อโหสิํ กสฺสโก ตทา;
กสิกมฺเมน ชีวามิ, เตน โปเสมิ ทารเกฯ
[108]
‘‘สุสมฺปนฺนํ ตทา เขตฺตํ, ธญฺญํ เม ผลินํ [ผลิตํ (สี. ปี.)] อหุ;
ปากกาเล จ สมฺปตฺเต, เอวํ จินฺเตสหํ ตทาฯ
[109]
‘‘นจฺฉนฺนํ นปฺปติรูปํ, ชานนฺตสฺส คุณาคุณํ;
โยหํ สงฺเฆ อทตฺวาน, อคฺคํ ภุญฺเชยฺย เจ ตทา [มตฺตนา (สฺยา.)]ฯ
[110]
‘‘อยํ พุทฺโธ อสมสโม, ทฺวตฺติํสวรลกฺขโณ;
ตโต ปภาวิโต สงฺโฆ, ปุญฺญกฺเขตฺโต อนุตฺตโรฯ
[111]
‘‘ตตฺถ ทสฺสามหํ ทานํ, นวสสฺสํ ปุเร ปุเร;
เอวาหํ จินฺตยิตฺวาน, หฏฺโฐ ปีณิตมานโส [ปีติก… (สฺยา.)]ฯ
[112]
‘‘เขตฺตโต ธญฺญมาหตฺวา, สมฺพุทฺธํ อุปสงฺกมิํ;
อุปสงฺกมฺม สมฺพุทฺธํ, โลกเชฏฺฐํ นราสภํ;
วนฺทิตฺวา สตฺถุโน ปาเท, อิทํ วจนมพฺรวิํฯ
[113]
‘‘‘นวสสฺสญฺจ สมฺปนฺนํ, อายาโคสิ [อิธ โหสิ (สฺยา.)] จ ตฺวํ มุเน;
อนุกมฺปมุปาทาย , อธิวาเสหิ จกฺขุม’ฯ
[114]
‘‘ปทุมุตฺตโร โลกวิทู, อาหุตีนํ ปฏิคฺคโห;
มม สงฺกปฺปมญฺญาย, อิทํ วจนมพฺรวิฯ
[115]
‘‘‘จตฺตาโร จ ปฏิปนฺนา, จตฺตาโร จ ผเล ฐิตา;
เอส สงฺโฆ อุชุภูโต, ปญฺญาสีลสมาหิโต;
ยชนฺตานํ มนุสฺสานํ, ปุญฺญเปกฺขาน ปาณินํฯ
[116]
‘‘‘กโรโตปธิกํ ปุญฺญํ, สงฺเฆ ทินฺนํ มหปฺผลํ;
ตสฺมิํ สงฺเฆว [สํเฆ จ (สฺยา. ปี.)] ทาตพฺพํ, ตว สสฺสํ ตเถตรํฯ
[117]
‘‘‘สงฺฆโต อุทฺทิสิตฺวาน, ภิกฺขู เนตฺวาน สํฆรํ;
ปฏิยตฺตํ ฆเร สนฺตํ, ภิกฺขุสงฺฆสฺส เทหิ ตฺวํ’ฯ
[118]
‘‘สงฺฆโต อุทฺทิสิตฺวาน, ภิกฺขู เนตฺวาน สํฆรํ;
ยํ ฆเร ปฏิยตฺตํ เม, ภิกฺขุสงฺฆสฺสทาสหํฯ
[119]
‘‘เตน กมฺเมน สุกเตน, เจตนาปณิธีหิ จ;
ชหิตฺวา มานุสํ เทหํ, ตาวติํสมคจฺฉหํฯ
[120]
‘‘ตตฺถ เม สุกตํ พฺยมฺหํ, โสวณฺณํ สปฺปภสฺสรํ;
สฏฺฐิโยชนมุพฺเพธํ, ติํสโยชนวิตฺถตํฯ
เอกูนวีสติมํ ภาณวารํฯ
[121]
‘‘อากิณฺณํ ภวนํ มยฺหํ, นารีคณสมากุลํ;
ตตฺถ ภุตฺวา ปิวิตฺวา จ, วสามิ ติทเส อหํฯ
[122]
‘‘สตานํ ตีณิกฺขตฺตุญฺจ, เทวรชฺชมการยิํ;
สตานํ ปญฺจกฺขตฺตุญฺจ, จกฺกวตฺตี อโหสหํ;
ปเทสรชฺชํ วิปุลํ, คณนาโต อสงฺขิยํฯ
[123]
‘‘ภวาภเว สํสรนฺโต, ลภามิ อมิตํ ธนํ;
โภเค เม อูนตา นตฺถิ, นวสสฺสสฺสิทํ ผลํฯ
[124]
‘‘หตฺถิยานํ อสฺสยานํ, สิวิกํ สนฺทมานิกํ;
ลภามิ สพฺพเมเวตํ [สพฺพเมตมฺปิ (ก.)], นวสสฺสสฺสิทํ ผลํฯ
[125]
‘‘นววตฺถํ นวผลํ, นวคฺครสโภชนํ;
ลภามิ สพฺพเมเวตํ, นวสสฺสสฺสิทํ ผลํฯ
[126]
‘‘โกเสยฺยกมฺพลิยานิ , โขมกปฺปาสิกานิ จ;
ลภามิ สพฺพเมเวตํ, นวสสฺสสฺสิทํ ผลํฯ
[127]
‘‘ทาสีคณํ ทาสคณํ, นาริโย จ อลงฺกตา;
ลภามิ สพฺพเมเวตํ, นวสสฺสสฺสิทํ ผลํฯ
[128]
‘‘น มํ สีตํ วา อุณฺหํ วา, ปริฬาโห น วิชฺชติ;
อโถ เจตสิกํ ทุกฺขํ, หทเย เม น วิชฺชติฯ
[129]
‘‘อิทํ ขาท อิทํ ภุญฺช, อิมมฺหิ สยเน สย;
ลภามิ สพฺพเมเวตํ, นวสสฺสสฺสิทํ ผลํฯ
[130]
‘‘อยํ ปจฺฉิมโก ทานิ, จริโม วตฺตเต ภโว;
อชฺชาปิ เทยฺยธมฺโม เม, ผลํ โตเสสิ สพฺพทาฯ
[131]
‘‘นวสสฺสํ ททิตฺวาน, สงฺเฆ คณวรุตฺตเม;
อฏฺฐานิสํเส อนุโภมิ, กมฺมานุจฺฉวิเก มมฯ
[132]
‘‘วณฺณวา ยสวา โหมิ, มหาโภโค อนีติโก;
มหาปกฺโข [มหาภกฺโข (สฺยา. ก.)] สทา โหมิ, อเภชฺชปริโส สทาฯ
[133]
‘‘สพฺเพ มํ อปจายนฺติ, เย เกจิ ปถวิสฺสิตา;
เทยฺยธมฺมา จ เย เกจิ, ปุเร ปุเร ลภามหํฯ
[134]
‘‘ภิกฺขุสงฺฆสฺส วา มชฺเฌ, พุทฺธเสฏฺฐสฺส สมฺมุขา;
สพฺเพปิ สมติกฺกมฺม, เทนฺติ มเมว ทายกาฯ
[135]
‘‘ปฐมํ นวสสฺสญฺหิ, ทตฺวา สงฺเฆ คณุตฺตเม;
อิมานิสํเส อนุโภมิ, นวสสฺสสฺสิทํ ผลํฯ
[136]
‘‘สตสหสฺสิโต กปฺเป, ยํ ทานมททิํ ตทา;
ทุคฺคติํ นาภิชานามิ, นวสสฺสสฺสิทํ ผลํฯ
[137]
‘‘กิเลสา ฌาปิตา มยฺหํ…เป.… วิหรามิ อนาสโว;
[138]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[139]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา สุจินฺติโต เถโร อิมา คาถาโย
อภาสิตฺถาติฯ
สุจินฺติตตฺเถรสฺสาปทานํ อฏฺฐมํฯ
9. โสวณฺณกิงฺกณิยตฺเถรอปทานํ
[140]
‘‘สทฺธาย อภินิกฺขมฺม, ปพฺพชิํ อนคาริยํ;
วากจีรธโร อาสิํ, ตโปกมฺมมปสฺสิโตฯ
[141]
‘‘อตฺถทสฺสี ตุ ภควา, โลกเชฏฺโฐ นราสโภ;
อุปฺปชฺชิ ตมฺหิ สมเย, ตารยนฺโต มหาชนํฯ
[142]
‘‘พลญฺจ วต เม ขีณํ, พฺยาธินา ปรเมน ตํ;
พุทฺธเสฏฺฐํ สริตฺวาน, ปุลิเน ถูปมุตฺตมํฯ
[143]
‘‘กริตฺวา หฏฺฐจิตฺโตหํ, สหตฺเถน [ปสาเทน (ก.)] สโมกิริํ;
โสณฺณกิงฺกณิปุปฺผานิ, อุทคฺคมนโส อหํฯ
[144]
‘‘สมฺมุขา วิย สมฺพุทฺธํ, ถูปํ ปริจริํ อหํ;
เตน เจโตปสาเทน, อตฺถทสฺสิสฺส ตาทิโนฯ
[145]
‘‘เทวโลกํ คโต สนฺโต, ลภามิ วิปุลํ สุขํ;
สุวณฺณวณฺโณ ตตฺถาสิํ, พุทฺธปูชายิทํ ผลํฯ
[146]
‘‘อสีติโกฏิโย มยฺหํ, นาริโย สมลงฺกตา;
สทา มยฺหํ อุปฏฺฐนฺติ, พุทฺธปูชายิทํ ผลํฯ
[147]
‘‘สฏฺฐิตุริยสหสฺสานิ [สฏฺฐิตูริย… (ก.)], เภริโย ปณวานิ จ;
สงฺขา จ ฑิณฺฑิมา ตตฺถ, วคฺคู วชฺชนฺติ [นทนฺติ (สี.), วทนฺติ (ปี.)] ทุนฺทุภีฯ
[148]