เมนู

‘‘สาวเกหิ [สาวกคฺเคหิ (สี.)] ปริวุโต, ภิกฺขุสงฺฆปุรกฺขโต;

ภิกฺขุสงฺเฆ นิสีทิตฺวา, สลากํ คาหยี ชิโนฯ

[13]

‘‘เอกํสํ จีวรํ กตฺวา, วนฺทิตฺวา โลกนายกํ;

วทตํ วรสฺส ปุรโต, ปฐมํ อคฺคเหสหํฯ

[14]

‘‘เตน กมฺเมน ภควา, ทสสหสฺสีกมฺปโก;

ภิกฺขุสงฺเฆ นิสีทิตฺวา, อคฺคฏฺฐาเน ฐเปสิ มํฯ

[15]

‘‘วีริยํ เม ธุรโธรยฺหํ, โยคกฺเขมาธิวาหนํ;

ธาเรมิ อนฺติมํ เทหํ, สมฺมาสมฺพุทฺธสาสเนฯ

[16]

‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

อิตฺถํ สุทํ อายสฺมา กุณฺฑธาโน เถโร อิมา คาถาโย อภาสิตฺถาติฯ

กุณฺฑธานตฺเถรสฺสาปทานํ ปฐมํฯ

2. สาคตตฺเถรอปทานํ

[17]

‘‘โสภิโต นาม นาเมน, อโหสิํ พฺราหฺมโณ ตทา;

ปุรกฺขโต สสิสฺเสหิ, อารามํ อคมาสหํฯ

[18]

‘‘ภควา ตมฺหิ สมเย, ภิกฺขุสงฺฆปุรกฺขโต;

อารามทฺวารา นิกฺขมฺม, อฏฺฐาสิ ปุริสุตฺตโมฯ

[19]

‘‘ตมทฺทสาสิํ สมฺพุทฺธํ, ทนฺตํ ทนฺตปุรกฺขตํ;

สกํ จิตฺตํ ปสาเทตฺวา, สนฺถวิํ โลกนายกํฯ

[20]

‘‘เย เกจิ ปาทปา สพฺเพ, มหิยา เต วิรูหเร;

พุทฺธิมนฺโต ตถา สตฺตา, รุหนฺติ ชินสาสเนฯ

[21]

‘‘สตฺถวาโหสิ สปฺปญฺโญ, มเหสิ พหุเก ชเน;

วิปถา อุทฺธริตฺวาน, ปถํ อาจิกฺขเส ตุวํฯ

[22]

‘‘ทนฺโต ทนฺตปริกิณฺโณ [ปุรกฺขโต (สฺยา.)], ฌายี ฌานรเตหิ จ;

อาตาปี ปหิตตฺเตหิ, อุปสนฺเตหิ ตาทิภิฯ

[23]

‘‘อลงฺกโต ปริสาหิ, ปุญฺญญาเณหิ โสภติ;

ปภา นิทฺธาวเต ตุยฺหํ, สูริโยทยเน ยถาฯ

[24]

‘‘ปสนฺนจิตฺตํ ทิสฺวาน, มเหสี ปทุมุตฺตโร;

ภิกฺขุสงฺเฆ ฐิโต สตฺถา, อิมา คาถา อภาสถฯ

[25]

‘‘‘โย โส หาสํ ชเนตฺวาน, มมํ กิตฺเตสิ พฺราหฺมโณ;

กปฺปานํ สตสหสฺสํ, เทวโลเก รมิสฺสติฯ

[26]

‘‘‘ตุสิตา หิ จวิตฺวาน, สุกฺกมูเลน โจทิโต;

โคตมสฺส ภควโต, สาสเน ปพฺพชิสฺสติฯ

[27]

‘‘‘เตน กมฺเมน สุกเตน, อรหตฺตํ [ตุฏฺฐหฏฺฐํ (สฺยา. ก.)] ลภิสฺสติ;

สาคโต นาม นาเมน, เหสฺสติ สตฺถุ สาวโก’ฯ

[28]

‘‘ปพฺพชิตฺวาน กาเยน, ปาปกมฺมํ วิวชฺชยิํ;

วจีทุจฺจริตํ หิตฺวา, อาชีวํ ปริโสธยิํฯ

[29]

‘‘เอวํ วิหรมาโนหํ, เตโชธาตูสุ โกวิโท;

สพฺพาสเว ปริญฺญาย, วิหรามิ อนาสโวฯ

[30]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สาคโต เถโร อิมา คาถาโย อภาสิตฺถาติฯ

สาคตตฺเถรสฺสาปทานํ ทุติยํฯ

3. มหากจฺจานตฺเถรอปทานํ

[31]

‘‘ปทุมุตฺตรนาถสฺส, ปทุมํ นาม เจติยํ;

สิลาสนํ [สีหาสนํ (ก.)] การยิตฺวา, สุวณฺเณนาภิเลปยิํฯ

[32]

‘‘รตนามยฉตฺตญฺจ, ปคฺคยฺห วาฬพีชนิํ [วาฬพีชนี (สี. สฺยา.)];

พุทฺธสฺส อภิโรเปสิํ, โลกพนฺธุสฺส ตาทิโนฯ

[33]