‘‘อปริเมยฺเย อิโต กปฺเป, สรณานิ อคจฺฉหํ;
ตโต เม สุกตํ กมฺมํ, ผลํ ทสฺเสสิ เม อิธฯ
[125]
‘‘สุโคปิตํ เม สรณํ, มานสํ สุปฺปณีหิตํ;
อนุโภตฺวา ยสํ สพฺพํ, ปตฺโตมฺหิ อจลํ ปทํฯ
[126]
‘‘เยสํ โสตาวธานตฺถิ, สุโณถ มม ภาสโต;
อหํ [อตฺถํ (สฺยา.)] โว กถยิสฺสามิ, สามํ ทิฏฺฐํ ปทํ มมฯ
[127]
‘‘‘พุทฺโธ โลเก สมุปฺปนฺโน, วตฺตเต ชินสาสนํ;
อมตา วาทิตา เภรี, โสกสลฺลวิโนทนาฯ
[128]
‘‘‘ยถาสเกน ถาเมน, ปุญฺญกฺเขตฺเต อนุตฺตเร;
อธิการํ กเรยฺยาถ, ปสฺสยิสฺสถ นิพฺพุติํฯ
[129]
‘‘‘ปคฺคยฺห ตีณิ สรเณ, ปญฺจสีลานิ โคปิย;
พุทฺเธ จิตฺตํ ปสาเทตฺวา, ทุกฺขสฺสนฺตํ กริสฺสถฯ
[130]
‘‘‘สมฺมา ธมฺมํ ภาเวตฺวาน [มโมปมํ กริตฺวาน (สี. สฺยา.)], สีลานิ ปริโคปิย;
อจิรํ อรหตฺตํ โว, สพฺเพปิ ปาปุณิสฺสถฯ
[131]
‘‘‘เตวิชฺโช อิทฺธิปตฺโตมฺหิ, เจโตปริยโกวิโท;
สาวโก เต มหาวีร, สรโณ [จรเณ (สี. สฺยา.)] วนฺทติ สตฺถุโน’ฯ
[132]
‘‘อปริเมยฺเย อิโต กปฺเป, สรณํ พุทฺธสฺส คจฺฉหํ;
ทุคฺคติํ นาภิชานามิ, สรณํ คมเน ผลํฯ
[133]
‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
อิตฺถํ สุทํ อายสฺมา ติสรณคมนิโย เถโร อิมา คาถาโย อภาสิตฺถาติฯ
ติสรณคมนิยตฺเถรสฺสาปทานํ ตติยํฯ
4. ปญฺจสีลสมาทานิยตฺเถรอปทานํ
[134]
‘‘นคเร จนฺทวติยา, ภตโก อาสหํ ตทา;
ปรกมฺมายเน ยุตฺโต, ปพฺพชฺชํ น ลภามหํฯ
[135]
‘‘มหนฺธการปิหิตา , ติวิธคฺคีหิ ฑยฺหเร;
เกน นุ โข อุปาเยน, วิสํยุตฺโต ภเว อหํฯ
[136]
‘‘เทยฺยธมฺโม จ เม นตฺถิ, วราโก ภตโก อหํ;
ยํนูนาหํ ปญฺจสีลํ, รกฺเขยฺยํ ปริปูรยํฯ
[137]
‘‘อโนมทสฺสิสฺส มุนิโน, นิสโภ นาม สาวโก;
ตมหํ อุปสงฺกมฺม, ปญฺจสิกฺขาปทคฺคหิํฯ
[138]
‘‘วสฺสสตสหสฺสานิ, อายุ วิชฺชติ ตาวเท;
ตาวตา ปญฺจสีลานิ, ปริปุณฺณานิ โคปยิํฯ
[139]
‘‘มจฺจุกาเล จ สมฺปตฺเต, เทวา อสฺสาสยนฺติ มํ;
‘รโถ สหสฺสยุตฺโต เต, มาริสายํ [มาริสสฺส (ก.)] อุปฏฺฐิโต’ฯ
[140]
‘‘วตฺตนฺเต จริเม จิตฺเต, มม สีลํ อนุสฺสริํ;
เตน กมฺเมน สุกเตน, ตาวติํสํ อคจฺฉหํฯ
[141]
‘‘ติํสกฺขตฺตุญฺจ เทวินฺโท, เทวรชฺชมการยิํ;
ทิพฺพสุขํ [ทิพฺพํ สุขํ (สี.)] อนุภวิํ, อจฺฉราหิ ปุรกฺขโตฯ
[142]
‘‘ปญฺจสตฺตติกฺขตฺตุญฺจ, จกฺกวตฺตี อโหสหํ;
ปเทสรชฺชํ วิปุลํ, คณนาโต อสงฺขิยํฯ
[143]
‘‘เทวโลกา จวิตฺวาน, สุกฺกมูเลน โจทิโต;
ปุเร เวสาลิยํ ชาโต, มหาสาเล สุอฑฺฒเกฯ
[144]
‘‘วสฺสูปนายิเก กาเล, ทิปฺปนฺเต [ทิพฺพนฺติ (ก.)] ชินสาสเน;
มาตา จ เม ปิตา เจว, ปญฺจสิกฺขาปทคฺคหุํฯ
[145]
‘‘สห สุตฺวานหํ สีลํ, มม สีลํ อนุสฺสริํ;
เอกาสเน นิสีทิตฺวา, อรหตฺตมปาปุณิํฯ
[146]
‘‘ชาติยา ปญฺจวสฺเสน, อรหตฺตมปาปุณิํ;
อุปสมฺปาทยิ พุทฺโธ, คุณมญฺญาย จกฺขุมาฯ
[147]
‘‘ปริปุณฺณานิ โคเปตฺวา, ปญฺจสิกฺขาปทานหํ;
อปริเมยฺเย อิโต กปฺเป, วินิปาตํ น คจฺฉหํฯ
[148]
‘‘สฺวาหํ ยสมนุภวิํ, เตสํ สีลาน วาหสา;
กปฺปโกฏิมฺปิ กิตฺเตนฺโต, กิตฺตเย เอกเทสกํฯ
[149]
‘‘ปญฺจสีลานิ โคเปตฺวา, ตโย เหตู ลภามหํ;
ทีฆายุโก มหาโภโค, ติกฺขปญฺโญ ภวามหํฯ
[150]
‘‘สํกิตฺเตนฺโต จ [ปกิตฺเตนฺโตว (สี.), ปกิตฺเตนฺเต จ (สฺยา.)] สพฺเพสํ, อภิมตฺตญฺจ โปริสํ;
ภวาภเว สํสริตฺวา, เอเต ฐาเน ลภามหํฯ
[151]
‘‘อปริเมยฺยสีเลสุ, วตฺตนฺตา ชินสาวกา;
ภเวสุ ยทิ รชฺเชยฺยุํ, วิปาโก กีทิโส ภเวฯ
[152]
‘‘สุจิณฺณํ เม ปญฺจสีลํ, ภตเกน ตปสฺสินา [วิปสฺสินา (สี.)];
เตน สีเลนหํ อชฺช, โมจยิํ สพฺพพนฺธนาฯ
[153]
‘‘อปริเมยฺเย อิโต กปฺเป, ปญฺจสีลานิ โคปยิํ;
ทุคฺคติํ นาภิชานามิ, ปญฺจสีลานิทํ ผลํฯ
[154]
‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
อิตฺถํ สุทํ อายสฺมา ปญฺจสีลสมาทานิโย เถโร อิมา คาถาโย อภาสิตฺถาติฯ
ปญฺจสีลสมาทานิยตฺเถรสฺสาปทานํ จตุตฺถํฯ
5. อนฺนสํสาวกตฺเถรอปทานํ
[155]
‘‘สุวณฺณวณฺณํ สมฺพุทฺธํ, คจฺฉนฺตํ อนฺตราปเณ;
กญฺจนคฺฆิยสํกาสํ, พาตฺติํสวรลกฺขณํฯ
[156]
‘‘สิทฺธตฺถํ โลกปชฺโชตํ, อปฺปเมยฺยํ อโนปมํ;
อลตฺถํ ปรมํ ปีติํ, ทิสฺวา ทนฺตํ ชุตินฺธรํฯ
[157]
‘‘สมฺพุทฺธํ อภินาเมตฺวา, โภชยิํ ตํ มหามุนิํ;
มหาการุณิโก โลเก [นาโถ (สี.)], อนุโมทิ มมํ ตทาฯ
[158]