‘‘‘อาราธยิตฺวา สมฺพุทฺธํ, โคตมํ สกฺยปุงฺควํ;

อุปวาโนติ นาเมน, เหสฺสสิ สตฺถุ สาวโก’ฯ

[102]

‘‘สตสหสฺเส กตํ กมฺมํ, ผลํ ทสฺเสสิ เม อิธ;

สุมุตฺโต สรเวโคว กิเลเส ฌาปยี มมฯ

[103]

‘‘จกฺกวตฺติสฺส สนฺตสฺส, จตุทีปิสฺสรสฺส เม;

ติโยชนานิ สมนฺตา, อุสฺสีสนฺติ ธชา สทาฯ

[104]

‘‘สตสหสฺสิโต กปฺเป, ยํ กมฺมมกริํ ตทา;

ทุคฺคติํ นาภิชานามิ, ธชทานสฺสิทํ ผลํฯ

[105]

‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

อิตฺถํ สุทํ อายสฺมา อุปวาโน เถโร อิมา คาถาโย อภาสิตฺถาติฯ

อุปวานตฺเถรสฺสาปทานํ ทุติยํฯ

3. ติสรณคมนิยตฺเถรอปทานํ

[106]

‘‘นคเร จนฺทวติยา [พนฺธุมติยา (อฏฺฐ.)], มาตุอุปฏฺฐาโก [มาตุปฏฺฐายโก (สี.), มาตุปฏฺฐานโก (สฺยา.)] อหุํ;

อนฺธา มาตา ปิตา มยฺหํ, เต โปเสมิ อหํ ตทาฯ

[107]

‘‘รโหคโต นิสีทิตฺวา, เอวํ จินฺเตสหํ ตทา;

โปเสนฺโต มาตาปิตโร, ปพฺพชฺชํ น ลภามหํฯ

[108]

‘‘มหนฺธการปิหิตา [ตมนฺธการปิหิตา (สฺยา.)], ติวิธคฺคีหิ ฑยฺหเร;

เอตาทิเส ภเว [ภเย (สี.)] ชาเต, นตฺถิ โกจิ วินายโกฯ

[109]

‘‘พุทฺโธ โลเก สมุปฺปนฺโน, ทิปฺปติ [ทิพฺพติ (ก.)] [ชินสาสนํ (สี.)] ทานิ สาสนํ;

สกฺกา อุทฺธริตุํ อตฺตา, ปุญฺญกาเมน ชนฺตุนาฯ

[110]

‘‘อุคฺคยฺห ตีณิ สรเณ, ปริปุณฺณานิ โคปยิํ;

เตน กมฺเมน สุกเตน, ปฏิโมกฺขามิ ทุคฺคติํฯ

[111]

‘‘นิสโภ นาม สมโณ, พุทฺธสฺส อคฺคสาวโก;

ตมหํ อุปคนฺตฺวาน, สรณคมนํ คหิํฯ

[112]

‘‘วสฺสสตสหสฺสานิ, อายุ วิชฺชติ ตาวเท;

ตาวตา สรณคมนํ, ปริปุณฺณํ อโคปยิํฯ

[113]

‘‘จริเม วตฺตมานมฺหิ, สรณํ ตํ อนุสฺสริํ;

เตน กมฺเมน สุกเตน, ตาวติํสํ อคจฺฉหํฯ

[114]

‘‘เทวโลกคโต สนฺโต, ปุญฺญกมฺมสมาหิโต;

ยํ เทสํ [ยํ ยํ เทสํ (สฺยา.)] อุปปชฺชามิ [อุปคจฺฉามิ (สี.)], อฏฺฐ เหตู ลภามหํฯ

[115]

‘‘ทิสาสุ ปูชิโต โหมิ, ติกฺขปญฺโญ ภวามหํ;

สพฺเพ เทวานุวตฺตนฺติ, อมิตโภคํ ลภามหํฯ

[116]

‘‘สุวณฺณวณฺโณ สพฺพตฺถ, ปฏิกนฺโต ภวามหํ;

มิตฺตานํ อจโล โหมิ, ยโส อพฺภุคฺคโต มมํฯ

[117]

‘‘อสีติกฺขตฺตุ เทวินฺโท, เทวรชฺชมการยิํ;

ทิพฺพสุขํ อนุภวิํ, อจฺฉราหิ ปุรกฺขโตฯ

[118]

‘‘ปญฺจสตฺตติกฺขตฺตุญฺจ , จกฺกวตฺตี อโหสหํ;

ปเทสรชฺชํ วิปุลํ, คณนาโต อสงฺขิยํฯ

[119]

‘‘ปจฺฉิเม ภเว สมฺปตฺเต, ปุญฺญกมฺมสมาหิโต;

ปุเร สาวตฺถิยํ ชาโต, มหาสาเล สุอฑฺฒเกฯ

[120]

‘‘นครา นิกฺขมิตฺวาน, ทารเกหิ ปุรกฺขโต;

หสขิฑฺฑสมงฺคีหํ [สาหํ ขิฑฺฑสมงฺคี (สฺยา.)], สงฺฆารามํ อุปาคมิํฯ

[121]

‘‘ตตฺถทฺทสาสิํ [ตตฺถทฺทสาหํ (ก.)] สมณํ, วิปฺปมุตฺตํ นิรูปธิํ;

โส เม ธมฺมมเทเสสิ, สรณญฺจ อทาสิ เมฯ

[122]

‘‘โสหํ สุตฺวาน สรณํ, สรณํ เม อนุสฺสริํ;

เอกาสเน นิสีทิตฺวา, อรหตฺตมปาปุณิํฯ

[123]

‘‘ชาติยา สตฺตเม วสฺเส, อรหตฺตมปาปุณิํ;

อุปสมฺปาทยิ พุทฺโธ, คุณมญฺญาย จกฺขุมาฯ

[124]

‘‘อปริเมยฺเย อิโต กปฺเป, สรณานิ อคจฺฉหํ;

ตโต เม สุกตํ กมฺมํ, ผลํ ทสฺเสสิ เม อิธฯ

[125]

‘‘สุโคปิตํ เม สรณํ, มานสํ สุปฺปณีหิตํ;

อนุโภตฺวา ยสํ สพฺพํ, ปตฺโตมฺหิ อจลํ ปทํฯ

[126]

‘‘เยสํ โสตาวธานตฺถิ, สุโณถ มม ภาสโต;

อหํ [อตฺถํ (สฺยา.)] โว กถยิสฺสามิ, สามํ ทิฏฺฐํ ปทํ มมฯ

[127]

‘‘‘พุทฺโธ โลเก สมุปฺปนฺโน, วตฺตเต ชินสาสนํ;

อมตา วาทิตา เภรี, โสกสลฺลวิโนทนาฯ

[128]

‘‘‘ยถาสเกน ถาเมน, ปุญฺญกฺเขตฺเต อนุตฺตเร;

อธิการํ กเรยฺยาถ, ปสฺสยิสฺสถ นิพฺพุติํฯ

[129]

‘‘‘ปคฺคยฺห ตีณิ สรเณ, ปญฺจสีลานิ โคปิย;

พุทฺเธ จิตฺตํ ปสาเทตฺวา, ทุกฺขสฺสนฺตํ กริสฺสถฯ

[130]

‘‘‘สมฺมา ธมฺมํ ภาเวตฺวาน [มโมปมํ กริตฺวาน (สี. สฺยา.)], สีลานิ ปริโคปิย;

อจิรํ อรหตฺตํ โว, สพฺเพปิ ปาปุณิสฺสถฯ

[131]

‘‘‘เตวิชฺโช อิทฺธิปตฺโตมฺหิ, เจโตปริยโกวิโท;

สาวโก เต มหาวีร, สรโณ [จรเณ (สี. สฺยา.)] วนฺทติ สตฺถุโน’ฯ

[132]

‘‘อปริเมยฺเย อิโต กปฺเป, สรณํ พุทฺธสฺส คจฺฉหํ;

ทุคฺคติํ นาภิชานามิ, สรณํ คมเน ผลํฯ

[133]

‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

อิตฺถํ สุทํ อายสฺมา ติสรณคมนิโย เถโร อิมา คาถาโย อภาสิตฺถาติฯ

ติสรณคมนิยตฺเถรสฺสาปทานํ ตติยํฯ

4. ปญฺจสีลสมาทานิยตฺเถรอปทานํ

[134]

‘‘นคเร จนฺทวติยา, ภตโก อาสหํ ตทา;

ปรกมฺมายเน ยุตฺโต, ปพฺพชฺชํ น ลภามหํฯ

[135]