‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
อิตฺถํ สุทํ อายสฺมา สุภูติ เถโร อิมา คาถาโย อภาสิตฺถาติฯ
สุภูติตฺเถรสฺสาปทานํ ปฐมํฯ
2. อุปวานตฺเถรอปทานํ
[52]
‘‘ปทุมุตฺตโร นาม ชิโน, สพฺพธมฺมาน ปารคู;
ชลิตฺวา อคฺคิกฺขนฺโธว, สมฺพุทฺโธ ปรินิพฺพุโตฯ
[53]
‘‘มหาชนา สมาคมฺม, ปูชยิตฺวา ตถาคตํ;
จิตํ กตฺวาน สุกตํ, สรีรํ อภิโรปยุํฯ
[54]
‘‘สรีรกิจฺจํ กตฺวาน, ธาตุํ ตตฺถ สมานยุํ;
สเทวมานุสา สพฺเพ, พุทฺธถูปํ อกํสุ เตฯ
[55]
‘‘ปฐมา กญฺจนมยา, ทุติยาสิ มณีมยา;
ตติยา รูปิยมยา, จตุตฺถี ผลิกามยาฯ
[56]
‘‘ตถา [ตตฺถ (สฺยา. ก.)] ปญฺจมิยา ภูมิ [เนมิ (สี.)], โลหิตงฺคมยา อหุ;
ฉฏฺฐา มสารคลฺลสฺส, สพฺพรตนมยูปริฯ
[57]
‘‘ชงฺฆา มณิมยา อาสิ, เวทิกา รตนมยา;
สพฺพโสณฺณมโย ถูโป, อุทฺธํ โยชนมุคฺคโตฯ
[58]
‘‘เทวา ตตฺถ สมาคนฺตฺวา, เอกโต มนฺตยุํ ตทา;
มยมฺปิ ถูปํ กสฺสาม, โลกนาถสฺส ตาทิโนฯ
[59]
‘‘ธาตุ อาเวณิกา นตฺถิ, สรีรํ เอกปิณฺฑิตํ;
อิมมฺหิ พุทฺธถูปมฺหิ, กสฺสาม กญฺจุกํ มยํฯ
[60]
‘‘เทวา สตฺตหิ รตฺเนหิ [สตฺตรตเนหิ (สี.)], อญฺญํ วฑฺเฒสุ โยชนํ;
ถูโป ทฺวิโยชนุพฺเพโธ, ติมิรํ พฺยปหนฺติ โสฯ
[61]
‘‘นาคา ตตฺถ สมาคนฺตฺวา, เอกโต มนฺตยุํ ตทา;
มนุสฺสา เจว เทวา จ, พุทฺธถูปํ อกํสุ เตฯ
[62]
‘‘มา โน ปมตฺตา อสฺสุมฺห [อสฺสุมฺหา (สี. สฺยา.), อาสิมฺหา (?)], อปฺปมตฺตา สเทวกา;
มยมฺปิ ถูปํ กสฺสาม, โลกนาถสฺส ตาทิโนฯ
[63]
‘‘อินฺทนีลํ มหานีลํ, อโถ โชติรสํ มณิํ;
เอกโต สนฺนิปาเตตฺวา, พุทฺธถูปํ อฉาทยุํฯ
[64]
‘‘สพฺพํ มณิมยํ อาสิ, ตาวตา พุทฺธเจติยํ;
ติโยชนสมุพฺพิทฺธํ [ตีณิ โยชนมุพฺพิทฺธํ (สี. ก.)], อาโลกกรณํ ตทาฯ
[65]
‘‘ครุฬา จ สมาคนฺตฺวา, เอกโต มนฺตยุํ ตทา;
มนุสฺสา เทวา นาคา จ, พุทฺธถูปํ อกํสุ เตฯ
[66]
‘‘‘มา โน ปมตฺตา อสฺสุมฺห, อปฺปมตฺตา สเทวกา;
มยมฺปิ ถูปํ กสฺสาม, โลกนาถสฺส ตาทิโน’ฯ
[67]
‘‘สพฺพํ มณิมยํ ถูปํ, อกรุํ เต จ กญฺจุกํ [สพฺพมณิมยํ ถูเป, อกรุตฺตรกญฺจุกํ (สี.)];
โยชนํ เตปิ วฑฺเฒสุํ, อายตํ พุทฺธเจติยํฯ
[68]
‘‘จตุโยชนมุพฺพิทฺโธ, พุทฺธถูโป วิโรจติ;
โอภาเสติ ทิสา สพฺพา, สตรํสีว อุคฺคโตฯ
[69]
‘‘กุมฺภณฺฑา จ สมาคนฺตฺวา, เอกโต มนฺตยุํ ตทา;
มนุสฺสา เจว เทวา จ, นาคา จ ครุฬา ตถาฯ
ปจฺเจกํ พุทฺธเสฏฺฐสฺส, อกํสุ ถูปมุตฺตมํฯ
[70]
‘‘‘มา โน ปมตฺตา อสฺสุมฺห, อปฺปมตฺตา สเทวกา;
มยมฺปิ ถูปํ กสฺสาม, โลกนาถสฺส ตาทิโน;
รตเนหิ ฉาเทสฺสาม, อายตํ พุทฺธเจติยํ’ฯ
[71]
‘‘โยชนํ เตปิ วฑฺเฒสุํ, อายตํ พุทฺธเจติยํ;
ปญฺจโยชนมุพฺพิทฺโธ, ถูโป โอภาสเต ตทาฯ
[72]
‘‘ยกฺขา ตตฺถ สมาคนฺตฺวา, เอกโต มนฺตยุํ ตทา;
มนุสฺสา เทวา นาคา จ, ครุฬา กุมฺภอณฺฑกาฯ
[73]
‘‘ปจฺเจกํ พุทฺธเสฏฺฐสฺส, อกํสุ ถูปมุตฺตมํ;
‘มา โน ปมตฺตา อสฺสุมฺห, อปฺปมตฺตา สเทวกาฯ
[74]
‘‘‘มยมฺปิ ถูปํ กสฺสาม, โลกนาถสฺส ตาทิโน;
ผลิกาหิ ฉาเทสฺสาม, อายตํ พุทฺธเจติยํ’ฯ
[75]
‘‘โยชนํ เตปิ วฑฺเฒสุํ, อายตํ พุทฺธเจติยํ;
ฉ โยชนานิ อุพฺพิทฺโธ, ถูโป โอภาสเต ตทาฯ
[76]
‘‘คนฺธพฺพา จ สมาคนฺตฺวา, เอกโต มนฺตยุํ ตทา;
‘มนุชา เทวตา นาคา, ครุฬา กุมฺภยกฺขกาฯ
[77]
‘‘‘สพฺเพกํสุ พุทฺธถูปํ, มยเมตฺถ อการกา;
มยมฺปิ ถูปํ กสฺสาม, โลกนาถสฺส ตาทิโน’ฯ
[78]
‘‘เวทิโย สตฺต กตฺวาน, ฉตฺตมาโรปยิํสุ เต;
สพฺพโสณฺณมยํ ถูปํ, คนฺธพฺพา การยุํ ตทาฯ
[79]
‘‘สตฺตโยชนมุพฺพิทฺโธ, ถูโป โอภาสเต ตทา;
รตฺตินฺทิวา น ญายนฺติ, อาโลโก โหติ [อาโลกา โหนฺติ (สฺยา. ก.)] สพฺพทาฯ
[80]
‘‘อภิโภนฺติ น ตสฺสาภา, จนฺทสูรา สตารกา;
สมนฺตา โยชนสเต, ปทีโปปิ น ปชฺชลิฯ
[81]
‘‘เตน กาเลน เย เกจิ, ถูปํ ปูเชนฺติ มานุสา;
น เต ถูปมารุหนฺติ, อมฺพเร อุกฺขิปนฺติ เตฯ
[82]
‘‘เทเวหิ ฐปิโต ยกฺโข, อภิสมฺมตนามโก;
ธชํ วา ปุปฺผทามํ วา, อภิโรเปติ อุตฺตริฯ
[83]
‘‘น เต ปสฺสนฺติ ตํ ยกฺขํ, ทามํ ปสฺสนฺติ คจฺฉโต;
เอวํ ปสฺสิตฺวา คจฺฉนฺตา, สพฺเพ คจฺฉนฺติ สุคฺคติํฯ
[84]
‘‘วิรุทฺธา [วิสทฺธา (สี.)] เย ปาวจเน, ปสนฺนา เย จ สาสเน;
ปาฏิเหรํ ทฏฺฐุกามา, ถูปํ ปูเชนฺติ มานุสาฯ
[85]
‘‘นคเร หํสวติยา, อโหสิํ ภตโก [วรโก (สฺยา. ก.)] ตทา;
อาโมทิตํ ชนํ ทิสฺวา, เอวํ จินฺเตสหํ ตทาฯ
[86]
‘‘‘อุฬาโร ภควา เหโส, ยสฺส ธาตุธเรทิสํ;
อิมา จ ชนตา ตุฏฺฐา, การํ กุพฺพํ น ตปฺปเร [กุพฺพนฺตนปฺปกํ (สี.)]ฯ
[87]
‘‘‘อหมฺปิ การํ กสฺสามิ, โลกนาถสฺส ตาทิโน;
ตสฺส ธมฺเมสุ ทายาโท, ภวิสฺสามิ อนาคเต’ฯ
[88]
‘‘สุโธตํ รชเกนาหํ, อุตฺตเรยฺยปฏํ มม;
เวฬคฺเค อาลเคตฺวาน, ธชํ อุกฺขิปิมมฺพเรฯ
[89]
‘‘อภิสมฺมตโก คยฺห, อมฺพเรหาสิ เม ธชํ;
วาเตริตํ ธชํ ทิสฺวา, ภิยฺโย หาสํ ชเนสหํฯ
[90]
‘‘ตตฺถ จิตฺตํ ปสาเทตฺวา, สมณํ อุปสงฺกมิํ;
ตํ ภิกฺขุํ อภิวาเทตฺวา, วิปากํ ปุจฺฉหํ ธเชฯ
[91]
‘‘โส เม กเถสิ อานนฺท, ปีติสญฺชนนํ มม;
‘ตสฺส ธชสฺส วิปากํ, อนุโภสฺสสิ สพฺพทาฯ
[92]
‘‘‘หตฺถี อสฺสา รถา ปตฺตี, เสนา จ จตุรงฺคินี;
ปริวาเรสฺสนฺติ ตํ นิจฺจํ, ธชทานสฺสิทํ ผลํฯ
[93]
‘‘‘สฏฺฐิตูริยสหสฺสานิ, เภริโย สมลงฺกตา;
ปริวาเรสฺสนฺติ ตํ นิจฺจํ, ธชทานสฺสิทํ ผลํฯ
[94]
‘‘‘ฉฬาสีติสหสฺสานิ, นาริโย สมลงฺกตา;
วิจิตฺตวตฺถาภรณา, อามุตฺตมณิกุณฺฑลาฯ
[95]
‘‘‘อฬารปมฺหา หสุลา, สุสญฺญา ตนุมชฺฌิมา;
ปริวาเรสฺสนฺติ ตํ นิจฺจํ, ธชทานสฺสิทํ ผลํฯ
[96]
‘‘‘ติํสกปฺปสหสฺสานิ, เทวโลเก รมิสฺสสิ;
อสีติกฺขตฺตุํ เทวินฺโท, เทวรชฺชํ กริสฺสสิฯ
[97]
‘‘‘สหสฺสกฺขตฺตุํ ราชา จ, จกฺกวตฺตี ภวิสฺสสิ;
ปเทสรชฺชํ วิปุลํ, คณนาโต อสงฺขิยํฯ
[98]
‘‘‘กปฺปสตสหสฺสมฺหิ, โอกฺกากกุลสมฺภโว;
โคตโม นาม โคตฺเตน, สตฺถา โลเก ภวิสฺสติฯ
[99]
‘‘‘เทวโลกา จวิตฺวาน, สุกฺกมูเลน โจทิโต;
ปุญฺญกมฺเมน สํยุตฺโต, พฺรหฺมพนฺธุ ภวิสฺสสิฯ
[100]
‘‘‘อสีติโกฏิํ ฉฑฺเฑตฺวา, ทาเส กมฺมกเร พหู;
โคตมสฺส ภควโต, สาสเน ปพฺพชิสฺสสิฯ
[101]
‘‘‘อาราธยิตฺวา สมฺพุทฺธํ, โคตมํ สกฺยปุงฺควํ;
อุปวาโนติ นาเมน, เหสฺสสิ สตฺถุ สาวโก’ฯ
[102]
‘‘สตสหสฺเส กตํ กมฺมํ, ผลํ ทสฺเสสิ เม อิธ;
สุมุตฺโต สรเวโคว กิเลเส ฌาปยี มมฯ
[103]
‘‘จกฺกวตฺติสฺส สนฺตสฺส, จตุทีปิสฺสรสฺส เม;
ติโยชนานิ สมนฺตา, อุสฺสีสนฺติ ธชา สทาฯ
[104]
‘‘สตสหสฺสิโต กปฺเป, ยํ กมฺมมกริํ ตทา;
ทุคฺคติํ นาภิชานามิ, ธชทานสฺสิทํ ผลํฯ
[105]
‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
อิตฺถํ สุทํ อายสฺมา อุปวาโน เถโร อิมา คาถาโย อภาสิตฺถาติฯ
อุปวานตฺเถรสฺสาปทานํ ทุติยํฯ
3. ติสรณคมนิยตฺเถรอปทานํ
[106]
‘‘นคเร จนฺทวติยา [พนฺธุมติยา (อฏฺฐ.)], มาตุอุปฏฺฐาโก [มาตุปฏฺฐายโก (สี.), มาตุปฏฺฐานโก (สฺยา.)] อหุํ;
อนฺธา มาตา ปิตา มยฺหํ, เต โปเสมิ อหํ ตทาฯ
[107]
‘‘รโหคโต นิสีทิตฺวา, เอวํ จินฺเตสหํ ตทา;
โปเสนฺโต มาตาปิตโร, ปพฺพชฺชํ น ลภามหํฯ
[108]
‘‘มหนฺธการปิหิตา [ตมนฺธการปิหิตา (สฺยา.)], ติวิธคฺคีหิ ฑยฺหเร;
เอตาทิเส ภเว [ภเย (สี.)] ชาเต, นตฺถิ โกจิ วินายโกฯ
[109]
‘‘พุทฺโธ โลเก สมุปฺปนฺโน, ทิปฺปติ [ทิพฺพติ (ก.)] [ชินสาสนํ (สี.)] ทานิ สาสนํ;
สกฺกา อุทฺธริตุํ อตฺตา, ปุญฺญกาเมน ชนฺตุนาฯ
[110]
‘‘อุคฺคยฺห ตีณิ สรเณ, ปริปุณฺณานิ โคปยิํ;
เตน กมฺเมน สุกเตน, ปฏิโมกฺขามิ ทุคฺคติํฯ
[111]