‘‘ตตฺถาปิ ภวนํ มยฺหํ, สตฺตภูมํ สมุคฺคตํ;

กูฏาคารวรูเปตํ, เอกตฺถมฺภํ มโนรมํฯ

[23]

‘‘เอกวีสติกปฺปมฺหิ, อุเทโน นาม ขตฺติโย;

ตตฺราปิ ภวนํ มยฺหํ, สตฺตภูมํ สมุคฺคตํฯ

[24]

‘‘ยํ ยํ โยนุปปชฺชามิ, เทวตฺตํ อถ มานุสํ;

อนุโภมิ สุขํ สพฺพํ [สพฺพเมตํ (สฺยา.)], เอกตฺถมฺภสฺสิทํ ผลํฯ

[25]

‘‘จตุนฺนวุติโต กปฺเป, ยํ ถมฺภมททํ ตทา;

ทุคฺคติํ นาภิชานามิ, เอกตฺถมฺภสฺสิทํ ผลํฯ

[26]

‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

อิตฺถํ สุทํ อายสฺมา เอกตฺถมฺภิโก เถโร อิมา คาถาโย อภาสิตฺถาติฯ

เอกตฺถมฺภิกตฺเถรสฺสาปทานํ ทุติยํฯ

3. นนฺทตฺเถรอปทานํ

[27]

‘‘ปทุมุตฺตรสฺส ภควโต, โลกเชฏฺฐสฺส ตาทิโน;

วตฺถํ โขมํ มยา ทินฺนํ, สยมฺภุสฺส มเหสิโนฯ

[28]

‘‘ตํ เม พุทฺโธ วิยากาสิ, ชลชุตฺตรนามโก;

‘อิมินา วตฺถทาเนน, เหมวณฺโณ ภวิสฺสสิฯ

[29]

‘‘‘ทฺเว สมฺปตฺตี อนุโภตฺวา, กุสลมูเลหิ โจทิโต;

โคตมสฺส ภควโต, กนิฏฺโฐ ตฺวํ ภวิสฺสสิฯ

[30]

‘‘‘ราครตฺโต สุขสีโล, กาเมสุ เคธมายุโต;

พุทฺเธน โจทิโต สนฺโต, ตทา [ตโต (สฺยา.)] ตฺวํ ปพฺพชิสฺสสิฯ

[31]

‘‘‘ปพฺพชิตฺวาน ตฺวํ ตตฺถ, กุสลมูเลน โจทิโต;

สพฺพาสเว ปริญฺญาย, นิพฺพายิสฺสสินาสโว’ฯ

[32]

‘‘สตฺต [สต (สฺยา.)] กปฺปสหสฺสมฺหิ, จตุโร เจฬนามกา;

สฏฺฐิ กปฺปสหสฺสมฺหิ, อุปเจลา จตุชฺชนาฯ

[33]

‘‘ปญฺจ กปฺปสหสฺสมฺหิ, เจฬาว จตุโร ชนา;

สตฺตรตนสมฺปนฺนา, จตุทีปมฺหิ อิสฺสราฯ

[34]

‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

อิตฺถํ สุทํ อายสฺมา นนฺโท เถโร อิมา คาถาโย อภาสิตฺถาติฯ

นนฺทตฺเถรสฺสาปทานํ ตติยํฯ

4. จูฬปนฺถกตฺเถรอปทานํ

[35]

‘‘ปทุมุตฺตโร นาม ชิโน, อาหุตีนํ ปฏิคฺคโห;

คณมฺหา วูปกฏฺโฐ โส, หิมวนฺเต วสี ตทาฯ

[36]

‘‘อหมฺปิ หิมวนฺตมฺหิ, วสามิ อสฺสเม ตทา;

อจิราคตํ มหาวีรํ, อุเปสิํ โลกนายกํฯ

[37]

‘‘ปุปฺผจฺฉตฺตํ คเหตฺวาน, อุปคจฺฉิํ นราสภํ;

สมาธิํ สมาปชฺชนฺตํ, อนฺตรายมกาสหํฯ

[38]

‘‘อุโภ หตฺเถหิ ปคฺคยฺห, ปุปฺผจฺฉตฺตํ อทาสหํ;

ปฏิคฺคเหสิ ภควา, ปทุมุตฺตโร มหามุนิฯ

[39]

‘‘สพฺเพ เทวา อตฺตมนา, หิมวนฺตํ อุเปนฺติ เต;

สาธุการํ ปวตฺเตสุํ, อนุโมทิสฺสติ จกฺขุมาฯ

[40]

‘‘อิทํ วตฺวาน เต เทวา, อุปคจฺฉุํ นรุตฺตมํ;

อากาเส ธารยนฺตสฺส [ธารยนฺตํ เม (ก), ธารยโต เม (?)], ปทุมจฺฉตฺตมุตฺตมํฯ

[41]

‘‘สตปตฺตฉตฺตํ ปคฺคยฺห, อทาสิ ตาปโส มม;

‘ตมหํ กิตฺตยิสฺสามิ, สุณาถ มม ภาสโตฯ

[42]

‘‘‘ปญฺจวีสติกปฺปานิ, เทวรชฺชํ กริสฺสติ;

จตุตฺติํสติกฺขตฺตุญฺจ, จกฺกวตฺตี ภวิสฺสติฯ

[43]